Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Kalamuatik Txargainera / "Black friday" edo ingelesez bataiatzeko joera txatxua

"Black friday" edo ingelesez bataiatzeko joera txatxua

Leire Narbaiza 2014/11/28 11:50
2014ko azaroaren 28ko Euskadi Irratiko Faktoria saiorako

Ostiral Beltza. Orain urte bira arte inoiz entzun bakoa nintzen. Thanks giving day edo esker emate egunaz etengabe bete dizkigute igande eguerdiko film txepelak, mantaz eta siesta egitekoak, baina halakorik sekula ez dut ikusi; nahiz eta jai horren osteko eguna izan. Hau da, Esker emate eguna azaroko azken ostegunean izaten da beti eta AEBetan festa handia, Gabonak bezain bestekoa. Jai izaten dute, zubia askok, eta Thanksgiving day eta asteburuaren artean dagoen ostiral horri esaten ei diote Ostiral Beltza. Gaur, alegia.


Dendek prezio bereziak izaten ei dituzte eta jendeak erosketak egiteko aprobetxatzen du jaia. Eskaintza onen amuari kosk egin eta behar ez diren beste hainbat produktu irentsi. Antza denez, dendetan gehien saltzen den eguna da. Beraz, ez du garratzi gutxi Estatu Batuetan.

Badirudi, moda honek ozeanoa zeharkatu eta Europara ere etorri dela. Espainiako telebistetan hasi dira iragarkiak ematen egun honetako eskaintzak zabaltzeko. Eta izena dagoen-dagoenetan jarri diote “Black friday”.


Ez dakit nik, estatu espainiarrean arrakastarik izango duen, jairik ez dagoelako, eta krisia itzela delako. Baina eskaintza handiak beharrean ez litzateke hobea prezioak merketxoagoak izatea beti? Ez dakit, dendariek esango digute. Nik hartzen diodan itxura azalera handietako dendek eta kate handien kontua baino ez dela. Dena den, denborak esango digu zer etorkizun duen.


Baina beste kontu bat ere ekarri nahi nuke honen harira: Black friday. Beharrezkoa da ingelesez jartzea, benetan? Ostiral beltza ez litzateke ulertuko? Ez dakit ze obsesio dagoen ingelesezko izenak jartzearekin. Batzuetan, ziur naiz euskarazko izena ez jartzeagatik dela, badakizue, euskara zabarra eta abarkadunen hizkera basa delako. Beste batzuetan euskara-gaztelania hautua ez egiteagatik, erdiko bidea hartzea. Baina zenbat halako dauzkagun! Bilbao Exhibition center, Basque culinary center, BAT Basque team,… Hamaikatxo! Eta ez dezagun “basque” hitza ahaztu, gainera, horrek ematen baitigu autentikotasuna! (ironic mode on).


Joera hau herrietara ere iritsi da, zoritxarrez: Eibarren merkatariek merkealdiko hondarrak saltzeko “Eibar factory” egiten dute eta Elgoibarren duela aste bi “Friday Market” antolatu zuten! Begiak talo eginda dauzkat oraindik! Zer, dendara joan eta How much is it? galdezka ibili behar dugu? Ala natural jokatua: Zenbat balio du honek?

Tristeena da asko munduko hiritar sentitzen dela halakoak esanda, eta Anjel Lertxundik artikulu bikain honetan zioen bezala "Nago ez ote gaituzten Basque Tontoland Center izeneko hiritarrak egin nahi…". Dena den, jarrera kanpolarrosa hauek etxekardo bihurtzen dituzte bataiatzaileak, barregarri geratzen dira, erridikulo, ustez kosmopolita dena, kosmopaletoa bihurtuta. Benetan, ufa!!!!

Aritz
Aritz dio:
2014/11/28 11:55
"Ostiral beltza" baino, "ostiral buruzuria" nahiago aukeran!!!
Nahia
Nahia dio:
2014/11/28 14:25
Zaila da... Nik hilabete pasa dut pentsatzen zer eta nola egin... Aldeko eta aurkako aldeak bilatzen... Eta egitea eta izena mantentzea erabakia dut. Zergatik? Batez ere posizionamenduarengatik eta somatzen zelako aurten gure inguruan jende askok egingo zuela. Egingo ote nuen galdezka jendeak idatzi du azken asteetan... Ostiral beltza jarri banio, ez luke inork googleen bilatuko, ez luke inork ulertuko... Ez zait gustatzen ingelesera ez beste erdaretara jotzea... Baina honako honetan egitea erabaki dut.

Orain arte, normalean baina mugimendu gehiago dauka webguneak, erosketak antzera, baina bisita gehiago bai. Ikusiko dugu astelehenean merezi izan duen.

Azken batean deskontu hori dendariak hartzen du beregain... Banatzaileek ez dute eskaintzarik egiten eta.

Zaila da herri ez den herrian, berea ez den estatuan eta mundu globalean mugitzen asmatzea...
Iker
Iker dio:
2014/11/29 23:22
Aupa Leire! Bilbon, zazpi kaletako merkatari elkarteak "bariku baltza" erabili du eta denda askok izan dute euskarazko txarteltxoa kalean, iragartzen. Hortxe duzu irudia: http://www.cascoviejobilbao[…]cias&id=111&lang=eu
Egun horrek etorkizunean indarra izango duela ematen du (jadanik badu), ondo legoke euskarazko izendapena zabaltzea.
Ivan
Ivan dio:
2015/02/11 17:57
Nahiago dut "ostiralera beltza" erosketak Interneten, hainbat gehiago eskaintzen ditu eta gero denbora gehiago eraikinak birgaitzeko laguntzeko herriko zahar Bilbao esker aldera http://www.bilbao.net/cs/Sa[…]isaBilbao%2FPage%2FSUR_Home
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Leire Narbaiza Arizmendi

Irakaslea eta blogaria (+)

Madalenak Kafesnetan

Madalenak Kafesnetan

Madalenak Kafesnetan atala
#MadalenakKafesnetan

Artxiboa
2024 2023 2022 2021 2020 2019 2018 2017 2016 2015 2014 2013 2012 2011 2010 2009 2008 2007 2006 2005
Kontagailua