Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Kalamuatik Txargainera / Pandemia

Pandemia

Leire Narbaiza 2007/05/04 18:57

Izurrite berria dago gure artean. Izurri beltza bezain kutsakorra, legena bezain baztertzailea. Ez dakigu nola kutsatzen den, baina hemen da, gure artean. Kontrol barik zabaltzen ari da, gainera. Housek ere ez luke jakingo zelan aurre egin.

Birusa izan daiteke, edo bakterioa. Inork ez daki. Radar berezi batzuekin detektatzen dute, urrunera. Madrilen baino ez daukate antzemateko modua. Madrilen oso bizkorrak baitira.

Gaixoek oso itxura ona daukate. Inork ez luke esango kutsatuta daudenik. Madrilen bai, jakina. Gaixo batzuen osasunak ere oso ona dirudi. Baina kutsatuta daude. Izan liteke erradiazio batek kutsatu izana, hori ez dakigu. Gauza bakarra jakin litekeena da kutsatuta daudela.

Hain izurrite larria izanda, kutsatuak ez dituzte bakartzen toki berezietan, kalean dabiltza denok arriskuan jarriz! Lehen, behintzat, leproseriak eta lazaretoak zeuden legenardunak hartzeko, baina orain libre dabiltza. Ez dakit inor salbatuko den!

Bitartean, euron senideak kezkatuta gaude. Hain gutxi dakigu kutsaduraz, gu ere kutsatuta gauden beldur gara. Egia esan, bizimodu normala egin liteke kutsatuta egonez gero. Hori bai, inor ezin da hauteskundeetan aurkeztu, kargu publiko izatea oso txarra baita. Kutsagarria zeharo.

Umetan harrapatzera ibiltzen ginen. Bazegoen jolas berezi bat:gelditzen zenak ukitzen gintuenean, gu gelditu eta eskua gorputz-atal horretan jarrita eraman behar genuen. Hau ere berdina da: ukitu eta kutsatu.

Nik ez nekien kutsadurak pertsona ilegalak sortzen zituenik. Pentsatzen nuen eskubide zibil barik gelditzeko, lehengo epaile batek pertsona horri kendu behar zizkiola epaiketa baten ostean. Orain, modernitatearekin, ukituz gero, edota izena zerrenda betean idatziz gero, ilegala! Idatziaren magia, boterea.

Sortzez Birjinaren misterioa baino, sortzez kutsatuaren mugimendua errebindikatu behar dugu. Zikina izatearen plazera, bekatudun hobe, garbi, aratz eta garden baino.

Kutsatu barik dauden beste batzuk, bada, nik ikusten ditut eskuak zikin dituztela. Korrupzioz eta saldukeriaz zikin. Zer ote da hobea? Nik argi daukat!

etiketak: ,
flap
flap dio:
2007/05/24 12:33

Ez dakit sinpleegia den ala ez nire iritzia, baina gauza bat galdetuko dizuet: Azken urteotan zer abantaila ekarri digu Ezker abertzalekoak garenoi ETAk?? Hori da gakoa, nik ikusi dudana hauxe da: Euskal Herritarrok, ezker abertzaleko talde inportanteena zatitu, eta horren ondorioz ezker abertzalearen indarra gutxitu, eta gure artean iskanbilak sortu. Ez duzue uste ETA-ren garaia pasatu dela??

Aitziber
Aitziber dio:
2007/05/22 14:51

Agertu behar zen hemen ere ETA... Aspertuta nago beti berdina entzuteaz. Hori aitzaki hutsa iruditzen zait gauzak berdin uzteko eta betikoek poltsikoak betetzen jarraitzeko.Sinpleegia iruditzen argumentu hori. Bitartean, asko eta asko bozkatzeko eskubiderik gabe...

flap
flap dio:
2007/05/10 12:32

Oso “torpe” ibili nintzen atzo... ea hirugarrenean asmatzen dudan, esan nahi nuena hauxe zen: ETA, “kutsakor ospetsuena”, desagertuko balitz gauzak oso bizkor konponduko liratekeela. Barkatu nire akatsak...

flap
flap dio:
2007/05/09 19:09

Ez nago ados alderdien legearekin. Arazoak besterik ez dute ekarri, baina gauzak oso erreza konponduko direla, ETA, “kutsakor ospetsuena” desagertzen bada behingoz...Telebistako “Gran Hermano”arekin nahikoa daukat eta...

Jozulin
Jozulin dio:
2007/05/04 22:10

Eurena zikinkeria, baina gurea zikintasuna. Eta harro gaude. Bidebatez, "Madrilen baino ez daukate antzemateko modua. Madrilen oso bizkorrak baitira" diozu, baina ,zoritxarrez, auzokoen herrialdeko hiriburuan ezezik berton ere badiran kutsaketa kutsakorraren aldekoak.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Leire Narbaiza Arizmendi

Irakaslea eta blogaria (+)

Madalenak Kafesnetan

Madalenak Kafesnetan

Madalenak Kafesnetan atala
#MadalenakKafesnetan

Artxiboa
2019 2018 2017 2016 2015 2014 2013 2012 2011 2010 2009 2008 2007 2006 2005
Kontagailua