Motxo barkua ikusteko
Motxo barkua Baratzazaurre izeneko tokian gelditu da, Zumaia eta Deba artean, baina Debako terreno aurrean. Zehazki hemen dago:
B5M zerbitzuaren webgunean badago Baratzazarrak izeneko toki bat. Uste dut bertara iristeko bide egokiena dela. Baina bi aukera proposatuko ditut:
Elorrixatik
Elorriaga edo Elorrixara, Zumaiatik Itziarrera goazela txatarreria alboko eskumarako bidegurutzea hartuta iristen gara. Debako auzo honetan bizpahiru jatetxe eta sagardotegi bat daude. Errepidearen bukaeran picnic gune polita, komun eta guzti. Zuhaitzik ez dagoenez ez da izaten toki erosoa egun eguzkitsu eta haizetsuetarako. Hor aparkatu kotxea. Aurre-aurrean izan arren hortik ez da barkurik ikusiko.
Nik ez dut hortik kostarako bidea ezagutzen, baina B5M-ren webgunean pista dagoela ikusten da. hori bai, aldapa handia izango duela dudarik ez. Agian gogorra da bidea, baina barkua bertan ikusi ahal izango dugu.
Sakonetatik
Hau umeekin ibilaldi polita egiteko egokiagoa da. Kilometro bateko ibilbidea, (20 minutu) lasaia eta polita. Baina barkua nahiko urrun ikusten da, txiki-txiki, Hala ere naturaren aldetik izugarrizko toki polita da, eta agian horrek konpentsatuko dizue barkua hain ondo ez ikustea.
Hona joateko, autoa Errota-Berri landaetxe-jatetxean aparkatu behar da. OpenStreetMap-en ongi mapeatuta dago errepidetik haraino hartu beharreko pista, eta baita Errotaberritik kostalderainokoa. Hona hemen Errota-Berri eta Sakonetako mapa.
Bazkaltzeko, inguruko edozein toki da gomendagarria: Errota-Berri bera, Urberu sagardotegia, edo Elorrixa inguruko taberna-jatetxeak ere.
