Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Teknosexua / Amañako igarilekua

Amañako igarilekua

Gari Araolaza 2019/07/04 07:05
70. hamarkadan jaio ginenon ametsa Eibarren igerilekua izatea zen. Ez genuen imajinatzen gerra aurretik ere Eibarren "igarilekua" egon zenik.
Amañako igarilekua

Eibarko planoa 1940 inguruan - Egogain-Amaña ingurua

Askotan entzunda eta argazkiren bat ikusita, baina aste honetan Eibarko industria-sarearen berreraikuntza 1938-1942 erakusketan plano gainean bere kokapena argi eta garbi ikusi ahal izan dut. (Bide batez, ez galdu erakusketa eder hau, Armagintzaren museoan daukazue 2019ko uztailak 19 arte.)

Igerilekua (Igarilekua Eibarren) gaur egungo San Andres nagusien egoitzaren parean zegoen, Ego ibaiaren ura desbideratu eta saltoak eta guzti egiteko jarrita. Gaur egun "Slow" taberna dagoen tokian edo agian Ermua aldera metro batzuk haruntzago. Gaur errepidea dagoen tokian ibaia pasatzen zen garai hartan. Felix Arrietak detaile gehiago eman zituen, igerilekua betetzeko modua eta eraikitzeko moduaz Eibarko lehen bonbardaketari buruzko kontaketa zirraragarrian.

Amañako igerilekua 1930
Ume taldea Amañako igerilekuan. (Argazkiaren jatorria ezezaguna)

Beste argazki honetan argi ikusten da Alfaren hasierako eraikina, lehen unean Ego ibaiaren ezker aldean, eta badirudi igerilekuak zanga egiteko pretil ederra zeukala.

Amañako igerilekua
Amañako igerilekua Alfa atzean duela (Ojanguren fondoa, Eibarko Udala)

Jakina denez, gero Alfa handitu zen eta askoz luzeago egin zen, Barrenenguaraino. Argazki honetan ikusten da nola ibaia estali zuten, Amañako zubitik begiratuta:

Amañako zubia
Amañako zubia atzean Alfa ikusten dela (Argazkiaren jatorria ezezaguna)

Beste igerilekuak Eibarren

Uste dut garai batean Jose Etxeberria "Kerido"-ri entzun niola beste igerileku bat aipatzen, Casa del Pueblo gaineko terrazan zegoela eta umeei igeriketa ikastaroak ematen zizkietela, gerra ondoren uste dut. Norbaitek entzun du horrelakorik? 1954ko ortofotoan ez da hainbesterako bereizten.

etiketak: ,
leire
leire dio:
2019/07/08 11:00
Aupa, Gari!
Zenbat kostau jakun pizinia eukitzia, ezta? Artikulu politta egin dozu, baiña beste bat be bazeguala esan nahi detsut. Gure amak eta Matxarixan ikasi zeben igarixan. Ez dot uste hain haundixa zanik baiña han ibiltzen ziran txipli-txapla.
Bariantiak be desegin zittuan eibarren zeguazen pare bat putzu, (betiko) ospittal atzian.
Besarkada bat!
asier
asier dio:
2019/07/09 10:02
Politta da, bai, Eibarko igarilekuen historixia. Beste hainbat potzu be bazeren. Leirek diñuan Matsariko hori geuk be ezagutu genduan gure ume denporan, Matsariko tallarrak amaitzen ziran tokixan presa txiki bat eta potzu txiki bat. Uste dot lixibatokixa be bazeguala bertan. Gure denporarako zikin samarra, baina oindiokan ugaratxuak eta beste animalixa batzuk harrapatzera juaten giñan. Bestela, lehenago, Ariatza aldia zan Eibarko "hondartza" ofiziala. Toribio Etxeberriak hainbat pasarte jaso zittuan bere "Viaje por el país de los recuerdos" liburuan.

Queridok aittatzen daben Casa del Puebloko hori, ez da izango Ego Gain aldia? Han be bazeguan presa txiki bat, labaderua... eta txipli-txapla ibiltzeko tokitxo bat.

Eta bañurako tokirik onena, behin koskortuta, Maltzaga zan. Han "betekuak" zeguazen, igarixan egin leikian, zubittik salto egin...

Bartolok eta Agustinek laburpen txiki bat eitten dabe hamen:
https://ahotsak.eus/eibar/pasarteak/eib-026-005/

Berbia bera be, "ikastolan ikasittakua" iruditzen jaku guri, baina ez, gerra aurreko eibartarrak be "igarilekua" esaten zeban, eta ez pizinia, jakiña.
Gari
Gari dio:
2019/07/09 15:59
Eskerrik asko bixori!
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

naiz. Teknogauza guzti hauetaz idazteko sortu nuen bloga, baina orain gai eta maiztasun librean nabil.