Munduari buelta eta errebuelta ur azpittik
Hor ba, irakorri juat azkenian juan dan 100 urteko gaztetxuen abentura-liburu paradigmatikua. Veinte mil “lenguas” hau nobela famosúa izanda be, oiñ arte ez najekan pasarte solterik be irakorritta; Nemo kapittana eta Nautilus submarinuan izenak baiño ez najittuan ezagutzen. Liburu eder eta mamintsua topau juat, karga zientifiko haundixakin, eta ediziño honetako guztiak lez, grabau eta ohar interesantez beteta. Nautilus estetika victoriarrezko mirari teknologiko erakargarrixa dok. Nemo kapittanan pertsonajia barriz, misteriotsua eta melankolikua, bere tripulaziño internazional-esperantistian aurrian erabateko protagonistia. Liburuan ez dok guztiz azaltzen bere pentsakeria eta mundutik aparte bizitzeko arrazoiak; halan be, pare bat pasarte motzetan sozialismua aittatzen dok modu esanguratsuan. Antza danez, pertsonaje honen historixia hobeto azaltzen dok “La isla misteriosa” nobelan, eta hori be irakorri biharko juagu ba.
Liburua irakorri ostian, Tagzanian bidaiatzia etorri dok, berez faszinantia dan gauzia. Leku asko entzunda najittuan (Hawai, Bahamas, Long Island, Fiji, Tahiti...) baiña ez nintzuan mapan kokatzeko gai; oiñ sikieran ba jakixat ze zonatan billau. Halakuetan, beti gogoratzen juat gure aitta zana: 40 hamarkadako Eibar frankista hartan, ume askoren modura, liburu eta atlasak zittuan haren hegan iges egitteko modu bakarrenetakua. ¡Zelan gustauko jakozen hari, gero, halako jostailluak!
Nautilusen biajia, mapa gaiñian.
Vingt mille lieues sous les mers map
Eta hamen, "Iñobez" kapittanan azken ibilbidia puntoz punto jarraittu heinke.
