Farolen keriza ritmikuen harira

Umetako errekuerduetako bat, etxerako bueltak diraz. Goguan dakatena biajiak diraz (Bittorixatik gabaz urtetzen, Kas eraikiñan argixak, abenida luzietako farolen keriza ritmikuak kotxe barruan, begixakin kiñu egiñ eta argi arraixuen irudixekin olgetan) eta “Eibarrera” berbian ahoskatzian zentzu ixa majikua. Eta kotxian lotan nagola, bateronbatek aidian jaso eta besuetan Mekolako eskillaretan gora naroiala; eta etxera allegautakuan, foball partiduen berbarua.

Biajiak Bittorixatik izango ziran; Tio Felix eta amamanian egun pasara juaten giñanekua, diñot nik. Ordu biko biajiak, Urbina aldeko kamiñuan tiobibo-gorabehera gogoangarrixekin (¡sabela ahora igo eragitten zebenak!).

Ez dakat goguan zeiñek eruaten ninduan besuetan, baiña aitta izango zuan ¿zein bestela? Gaur egunian Ane eta umiak Oiartzundik allegatzen dirazenian be, Nikokin hala egittia tokatzen jata, eta nere buruari galdetzen detsat: ¿zerekin gogoratuko ete dok nagusittan? ¿Niko maitte doten beste maittatuko ninduan ni aittak?

Gurian ez da foball partidorik entzutzen domeka arratsaldetan; baiña nik Estudio Estadion musikia gogoratzen dot ondiok, Hammond organuan pilpilleko soniduakin.