Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Ingelesen hilerria / Intelektualen teknofobia jarrera marginatua da gaur

Intelektualen teknofobia jarrera marginatua da gaur

Luistxo Fernandez 2008/01/25 11:59

Eta Kitto aldizkariak galdera batzuk bidali zizkigun Eibar.org elkarteak prentsaurreko bat eman ondoren. Hor doaz  nik emandako erantzunak. Gaur irtengo ei da paperean, ez dakit editatuta ala ez.

  • Eibartarrak' posta zerrendak 10 urteko ibilbidia dauka eta urtetik urtera hazten juan da. Gaur egun internet ezagunagua da eta eskurago daukagu, baiña bere sorrerako sasoia zelan gogoratzen dozue?


Zirrara bereziko momentuak. Uholde teknologiko berri bat dator, Internet, eta hark irentsiko gaituen ala guk geure helburuetarako erabili behar dugun erabaki behar da. Eta bigarrena aukeratu genuen, horretarako bidea ikusi genuen lehenengo aukerarekin, kasu honetan, posta-zerrenda bat egiteko sareko doako tresna sinple batekin. Gero webgune sinple bat egiteko aukera ikasi, eta egin. Eta bilatzaile bat antolatu zitekeela ikusi, eta egin (Aurki.com), eta munduan blogak indartzen doazela ikusi, eta egin.

  • Zelako jendiak hartzen dau parte zerrendan?


Suerteagatik edo batek daki zergatik, itxura batean kontatzeko gauza interesgarriak dauzkan jendea elkartu da, batzuk eibartarrak, eta beste mordoxka bat kanpokoak.

  • Zelako gaixen inguruko eztabaidak egoten dira?


Sartu eta irakurri.

  • Nundik etorri leike zerrendaren arrakasta?


Funtzionatzeko arau sinpleak inportanteak dira. Partaidetza publikoa, hau da, izen-deiturekin identifikatutako jendea bakarrik, eta mezu guztiak artxibo publiko batean. Eztabaidatu daiteke, baina modu zibilizatu batean. Hori, eta jarduna euskaraz dela. Interneteko euskarazko foro biziena da, oinarri sinple horien gainean.

 

  • Eibar.org pegoria be sasoi barrixetara moldatzen juan da. Zelakua izan da eboluziñua?


Herriaren ondare digitala sortu edo gordetzeko asmo batetik, berez berrizten doan webgune batera igaro da, eta komunitatea (blogak) dira ardatz nagusia orain. Hedabide lokal baten tankera gehiago ere hartu du orain. Teknikoki, webgune estatiko eta baldar samar bat izatetik, webgune dinamiko eta aurreratu bat izatera igaro da, software libre euskaratuarekin egina, gainera.

  • Eibarko blog komunidadia sortu zenduen 2004an, berbia askorendako oindiok nahiko ezazaguna zanian. Internetekiko lilura berezixa dago Eibarren?


Ez dut uste.

  • Zelakua da eibartarren blog komunidadia?


Nahasketa berezi bat, kanpoko eta herriko jendearena. Blog batzuk aktiboak, beste batzuk mutu geratu zirenak, etorri-berririk ere bai. Idazle jende batek, adibidez, bultzada nabarmena eman zion geureari kanpotik etorri eta bloga egiten hasita (Xabier Mendiguren Elizegi, Julen Gabiria, Volgako Batelariak, Sareinak...). Geure komunitateari eman zioten bultzada, eta euskal blogosferari oro har. Teknofobia euskal intelektualitatearen adierazgarri izatetik, jarrera marginala (marginatua) izatera igaro da, neurri handi batean geurekin urratsa eman zutelako lagun horiek.

  • Zeuenian, bestiak beste, blog-a sortzeko aukeria eskintzen dozue, euskerazko baliabidiak eskura ipiñitta. Zer egin bihar dau eibar.org-en blog-a sortu nahi dabenak?


Elkarteko bazkide bihurtu (baina ez da oso zaila). Lehen urrats gisa, zerrendara apuntatzeko esango genioke jendeari: eibar.org/zerrenda

  • Teknologia barrixak garatzen diran abiadia ikusitta, eibar.org etenbarik barriztatzen juango zarie, sasoi barrixetara moldatzeko ahalegiñetan, ezta?


Sasoi berrietara aurreratzeko ahaleginetan, bereziki.

Amatiño
Amatiño dio:
2008/01/25 14:52

Dena errelatiboa da, baina nik beti (1992tik edo bai behintzat) uste izan dut informazio-gizartearen berezitasun historikoa intelektualen onespena izan dela, teknofobiarik eza alegia. Nere ustez, aurretik izan diren tekno-eusgailu guztiek (edo sortarazi izan dituzten formato eta generoek) askoz ere fobia nabarmenagoak eragin izan dituzte historian zehar. Kazetaritzak (vs. literatura), argazkiak (vs. pintura), zine modernoak (vs. zine mutua) eta, zer esanik ez, telebistak, kontrako argudio gehiago suspertu izan zuten intelektualen artean. Eta, gainera, diferentzia handi batez. Intelektualen teknologia berriekiko fobia, txarrenean ere, pasiboa izan da. Inor gutxi ausartu izan da agerian kontrakorik argumentatzen. Kazetaritza, argazkaritza, audiodun zinema eta telebistaren kontrako kritikak, aldiz, artearen, eliteen eta goi mailako intelektualen izenean formulatu izan ziren.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Luistxo Fernandez

Lan egiten dut CodeSyntaxen, Sustatun ere dexente editatzen dut. Eibarren jaioa naiz (1966) eta Donostian bizi naiz. Twitterren @Luistxo naiz. Azpìtituluak.com proiektuan ere banabil, eta niren kontsumo kulturala zertifikatzeko. Gainera, blog honek erdarazko bi bertsio ditu:

The English Cemetery

El cementerio de los ingleses

Nire kontsumo kulturala: 2012/13 | Zinea | Telebista | Artea | Liburuak | Antzerkia | Musika

Hemengo edukien lizentzia: Creative Commons by-sa.

E-postaz harpidetu: hemendik.