Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Joana Albret / Euskarazko Dekretuari buruz

Euskarazko Dekretuari buruz

Joana Albret 2010/12/22 10:31
Hizkuntz Eskakizunei, EGAri, eta gaiontzeko tituluei garrantzia ez ematea...

Ez da ezer berri esatea hizkuntzari dagokionez herri berezi batean bizi garela. Logikoa da pentsatzea D ereduan batxilergoa egin dutenek EGAren baliokidea den titulua egiaztatzeko beharrik ez izatea. Areago, logikoa da pentsatzea unibertsitateko titulua euskaraz atera dutenek ere azterketarik ez edukitzea, eta EGAdunak izatea.

Proiektu horri alderdi onak ikusten dizkiot. Hemendik aurrera gutxik ikasiko baitute A eta B ereduetan, D ereduaren mesedetan.

Beste aldetik, alderdi txarrak pilatzen zaizkit. Oraingo egoerari erreparatuz gero, ez dut uste administrazioak aipatutako euskarazko dekretua abian jartzea irtenbidea izango denik. Alde batetik baieztatuta baitago D ereduan ikasten dituzten ikasle askok ez daukatela mailarik euskara lantzeko. Euskal Herria, tamalez, hizkuntzari dagokionez ez da herri arrunta. Badakigu ikastetxeetako eta unibertsitateetako ikasle gehienek euskarazko maila ona dutela, eta gaitasuna daukatela hizkuntza horretan edozein gai lantzeko, baina, beste aldetik badakigu hainbat ikaslek aurrekoek beste urte ikasten igaro arren, gaitasuna ez dutela bereganatzen eta batez ere euskara erraz ahazten dutela.

Honen gainean Administrazioan eskarmentua daukagu 3. HE eta 4. HE atera dituzten langileekin. Gehienek ez dute oztopo handirik eduki goi-maila horiek lortzeko; baina erabileraren kopuruari erreparatuz gero hutsaren hurrengoa izan dela esan dezakegu. Maila horiek lortzea baitzen, hain zuzen ere, Administrazioan lanpostu finkoa ateratzeko ezinbesteko baldintza, eta hortaz, ikasteko helburua maila horiek lortzea izan da eta ez euskara jakitea eta erabiltzea.

Ez nator bat Celaak eta Urgellek diotenarekin: “ikasketak euskaraz egin dituztenei hizkuntzaren ezagutza egiaztatzeko titulazioa eskatzea ez da premiazkoa, eta gainera diskriminatzailea da. Ikasle horiei ez zaie antzeko probarik eskatzen gazteleraren ezagutza frogatzeko”.

Agian ailegatuko da eguna, non Euskal Herrian gaztelaniazko ezagutza frogak egingo diren, baina horretarako ohiko azterketa guztiak euskaraz izan beharko lirateke, eta egun ez gaude egoera horretan. Garai horri heldu arte, hona hemen nire proposamena: Hizkuntz Eskakizunei, EGAri, eta gaiontzeko tituluei garrantzia ez ematea, eta gutxienez 3. Hizkuntz Eskakizuna eta 4. Hizkuntz Eskakizuna duten lanpostuak lortzeko azterketak euskaraz egitea. Gainontzeko irtenbideak orain bezala jarraitzeko aitzakiak direlakoan nago.

Dena den arestian esan dudan moduan aurrerapausoren bat ikusten dut dekretu honetan, A eta B ereduak desagertuko baitira, lana aurkitzeko mesedetan soilik bada ere.

Gerardo Luzuriaga

MJ
MJ dio:
2010/12/23 02:56

(Iztuetaren ideiari jarraiki) D ereduan ikasten duenak, LEGEZ euskaraz ongi jakingo du. Legez, baina izatez, ez. Diglosia erreala da eta erabaki honekin nik galera dakusat. D ereduan bukatu baina bere ideiak euskaraz (erdarakadark gabe) esateko gai ez denari LEGEAK euskaraz badakiela bermea emango dio. Hau dela eta, inork ezingo dio pertsona horri hobetu egin behar duela esan ahal izango: legeak babestuko duelako, berak ondo dakiela dekretatuz. Euskaraz ondo ez dakienak euskaraz ondo dakiena isilaraztea gerta liteke honela ere, berak ere EGAren pareko maila duelako. Zoritxarrez, euskaraz -"ongi"- jakitearen neurketa hezkuntza eta eskolaratzearen gain utziz (askok euskaraz jakin gabe amaitzen du D eredua), handik haratagoa den neurketarik gabe, presio okerra lekarke hezkuntzara: euskara irakasteko ez dela hizkuntza-tresna egokia lekarke ondorio gisa, D ereduko ikasleak, "EGAdun" ikasleak denak, ez direlako denak nahi duten guztia hizkuntza horretan azaltzeko gai izango. EGA (edo 3.Hizkuntz eskakizuna) eta baita gaztelera maila lortzeko EspGA ere, biak egingo nituzke, honela, batek baino gehiagok ikusiko bailuke zein den parekotasuna. Esan nahi dudana esatera heldu ote naiz...

iztueta
iztueta dio:
2010/12/23 10:57

Egunon,

MJk zuzen dioen bezala D eredutik euskara maila duin bat erdietsi gabe irteten duten ikasleak asko dira.

Alde horretatik, oso argi daukat eskoletako egoera bere horretan utzi eta EGA agiriak kristo guztiari banatzen hastea IRUZUR galanta litzatekeela eta, bai, erdiesten den euskara mailaren jarraipena egiteko ezinbestekoak izango direla nolabaiteko neurketak.

Baina, kontua da, kaskoan sartu behar dugula ez dela posible unibertsitate karrera amaitu bitarteko ikasketak euskaraz egin eta euskaraz normal egiteko gaitasunik ez izatea.

Galderak ondorengoa izan behar du: nahiz eta egoera diglosikoa izan, eta eragozpenak mila, orain artekoa baino ezer gehiago egiterik ba al du D ereduak ikasleak euskalduntzeko?

Nire ustez bai, badu egiterik.

Hizkuntza baten ezagutzaren bermea -gaztelerarena adibidez- horren eguneroko erabilera normalizatua da. Hogeitapiku urtez egunero sei bat orduz, gutxienez, euskaraz irakurri, idatzi eta hitz egin duen ikasleak euskara maila egokirik eskuratu ez badu... gazteleraz esaten den bezala, apaga y vamonos.

Hor, agerian, eskola eta unibertsitateetan euskararen erabilerari eta ezagutzari buruz oraindik ere zer hobetu eta landu AAAAASKO dagoela geratzen da. Lana dago eskola eta unibertsitateetan euskararen kalitatea zaintzen. Eta uste dut egin daitekeen lana dela, ez bereziki zaila horretara espreski jarri eta interesik eta ardurarik izanez gero.

Puntu horretan, beraz, ez nago zurekin ados MJ. Euskara ikasteko ez dela tresna egokia esanez presionatuz etorriko dena ezin da aintzakotzat hartu, borondate txarrez datorrelako. XIX. mendeko lumbrera españolen eta aurreragokoen argudioekin eztabaida gaiztotzera letorke eta ez dut uste erantzunik merezi lukeenik. Alperrik nekatzea litzateke.

Adeitasunez.

iztueta
iztueta dio:
2010/12/22 22:14

Gai interesgarria da, Gerardo.

Ni neu dekretu honena mesedetan izan daitekeelakoan nago. Alde batetik, zuk diozun bezala, D ereduaren mesedetan egingo du, zalantzarik gabe. Eta bestetik, hainbeste azpimarratzen ez dena, arreta EGA azterketa gainditzeko edo ez gainditzeko gaitasunetik D ereduan bertan eskuratzen den euskara mailaren nolakoan jartzeko aukera handituko da.

Zeren eta hori baita, izan, egiazko arazoa, gaur egun eskoletan zer nolako euskalduntzea ematen den. Irakaskuntzan dabilen edonork daki egoerak irakaslegoaren ahala eta prestakuntza aspaldian gainditu zuela: gune erdaldunenetan, bereziki, ez da lortzen ikasleek eroso moldatzeko adinako mailarik lortzerik.

Urteak joan, urteak etorri, eta ez zaio gaiari fundamentuz heltzen. Ea, orain, behingoz, EGA bai EGA ez alde batera utzi, eta eztabaidaren ardatza hezkuntzak ematen duen euskara mailaren auzira aldatzen den.

Neurri hauen balorazio politikoa beste kontu bat da.

Inozoak ere ez gara eta Ceela eta lagunak euskararen erabilerak eta etorkizunak zenbat kezka ditzakeen imajinatzeko zailtasun handirik ez dut. Harrigarria -eta etsipengarria-, baina, alderdi abertzaleek, berez behintzat euskararen kontuaz arduraturik behar luketenek, eskoletako aspaldidanik atzemandako ezin horren aurrean ezikusiarena egiteko izan duten tema eta egoskorkeria da.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Katalogatzeko Terminologia

Euskaraz katalogatzeko terminologia Joana Albret mintegikideen ahaleginez egindako lana da. 2000 urtean argitaratu zen Eusko Jaurlaritzako IZOren gainbegiratuarekin eta Iametza enpresaren laguntzarekin internet datu-base bezala eskaintzen da hemen.