EUSKAL HERRIKO LIBURUTEGI DIGITALAK
Jakin 160. zenbakian lehendabiziko artikuluan “liburutegi digitalak” ikertu ditut. Sarean jarri arte, artikuluaren ildo nagusiak aurreratuko dizkizuet: Liburutegi digatalari buruzkoen gogoetak sarreran aurki ditzakezue. Europako liburutegi digitalak egindako urratsak hurrengo orrialdeetan aztertu ditut, Euskal Herriko egoeraz ere mintzatu naiz, bereziki proiektu bateratua egiteko premia eta abentaiak azpimarratuz, Euskal Herriko liburutegi digitalen helbide elektronikoak, ezaugarriak eta bibliografia funtsen zerrenda artikuluaren zati potoloena bihurtu da.
Zure gustukoa izango delakoan…
Liburuen azalak eta ataria
Xan Airen liburuaren atarian izeneko artikulu interesgarria gustatu zait. Mamiarekin bat nator, ñabardura batearekin izan ezik. Beste hizkuntza batzuetan gertatzen den bezala, (gurean ere) azala, ataria eta portada hitzak artikulu honetan ere nahasten dira. Artikuluaren paragrafo bat kopiatuko dut: «Liburuan sartzeko atea dela esanez aurkeztu du Gantzarainek liburuaren azala. Horregatik portada hitza erabiltzea gehiago gustatzen zait azala baino. Irakurleak liburua eskuetan duenean, mundu baten atarian egoteko sentipena izan behar du. Baina mundu horretan sartzeko urratsa ere egin behar du irakurleak".
Hona hemen labur-labur, liburuaren azalaren eta liburuaren atariaren definizioa: Liburuaren azalak liburuen gaineko eta atzeko orriak dira, gehienetan barrukoak baino gogorragoak dira; berriz, liburuaren ataria horrela deskribatuko nuke: izenburu nagusia, erantzukizunaren aipua eta argitalpenari buruzko datuak dituen dokumentuaren hasierako orrialdea.
Gaztelaniaz ere askotan nahasten da “cubierta eta portada”ren artean.
Susmoa daukat nahasketa hau liburuen aurretikoen bilakaeran datzanik. Jakina da, lehendabiziko liburuetan, inprenta sortu arte ataria ez zela existitzen, egileen, inprenten eta liburuen datuak azken orrialdean jartzen zirela, liburuek ez zeukaten aurretikorik. Inprenta sortzearekin batera lehendabiziko atariak azaltzen ari ziren.
Liburuen azalak, berriz, aspalditik existitzen ziren, hasieratik helburu liburuak babestea eduki dute, horregatik gehienak larruzkoak ziren. Mendeak aurrera joan ahala azalek gero eta garrantzia handiago hartu dute, atarian agertzen diren datuak errepikatzen dira, eta azken finean liburua babesteaz gain geheinetan adituak ez direnentzat azala atari bihurtzen da.