Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Markos Zapiain / Bikocrash, bikobai, lotsapro

Bikocrash, bikobai, lotsapro

Markos Zapiain 2021/07/04 11:50

Normalean, hizkuntza errealitatea baino pobreagoa izaten da, badira hitzik gabeko hainbat eta hainbat sentsazio eta emozio; edo hitz bakar batek oso fenomeno desberdinak biltzen ditu, hala nola "maitasuna", "maitatu": bikotekidea maite dugu, seme-alabak, Jaione Alberdiren itzulpenak, katua, Izaki Gardenak, gurasoak, zigilu-bilduma... Etsigarria da hain sentimendu desberdinak etiketa bakar baten pean hertsatu beharra.

Ikasle batzuek desoreka horiek leundu eta orain arte izendatu gabeko emozio eta aurreikuspenak bataiatzeko joera izaten dute, hitzak eta esamoldeak asmatu eta beren jargoia osatzeko ohitura, eta litekeena da kurtso-amaierako nerbioek asmakuntza mota hori sustatzea.

Asteartean, pasilloan ikasle batzuekin nengoela, gelan sartzeko itxoiten, sortu berria den bikote bat pasilloko mutur batetik agertu eta ikasle batek esan zuen,

-Bua, bikocrash.

-Zer da hori? -galdetu nion.

-Ingurukoek garbi ikusten dugu bikote hori berehala hondoratuko dela. Bikotekideek berek oraindik ez.

Ea antzeko hitz gehiago erabiltzen dituzten galdetu nien: baietz, bikocrashen kontrakoa den "bikobai": bikoteak iraun egingo du, San Roke arte gutxienez.

Hitz berri hauek Bilboko Sani eta Elorrieta inguruko kuadrilla batean erabiltzen dituzte. Asmatu duten beste hitz bat "lotsapro" da: zenbait ikasgaitan ikaskideen eta irakaslearen aurrean aurkezpenak egin behar izaten dituzte. Batzuk lotsatu egiten dira baina aurrera jotzen dute, lotsa gainditu gabe duten arren. Emozio nahasi horri deitzen diote "lotsapro". Auskalo zergatik izango diren aipatu dizkidatenak hiru silabakoak eta azentua azkenekoan.

Orain dela hogeita bost urteko ikastalde txiki batean ere ikasleek hiru silabako izenekin bataiatzen zuten elkar. Izenaren aurreneko silaba biak eta deituraren lehenbizikoa batzen zituzten: Iban Bilbao Ibanbi zen (twitterra dauka, Zital da bertan), Aitziber Lasa Aitzila, Iker Garai Ikerga, Iñaki Monasterio Iñamo, Iker Monasterio Ikermo, Imanol Betolaza Imabe, eta abar. Azentua beti ere bigarren edo erdiko silaban. Nik dakidala, ikastalde hartan baino ez zen gertatu eta ez zen zabaldu.

Ezin jakin bikocrash, bikobai eta lotsapro horiek Saloura eta Mallorcara hedatuko ote diren, edo Sarrikora bederen; ez zenbat iraungo duten. Erne egon beharko.

Oier G
Oier G dio:
2021/07/04 20:26
Nere 13 urteko semian klasian, bat bada gitxienez, oin dala 25 urteko era horretan izendatua: Markelmu (Markel Murelaga)
Markos Zapiain
Markos Zapiain dio:
2021/07/04 23:40
Eta Markélmu ahoskatzen dute? Ala Márkelmu? Zer izango da, kostaldeko ohitura zaharra? Ala edozein belaunalditan beste barik ager daitekeen ikaskideak bereizteko modu erraz eta praktikoa, batez ere klasea Markelez edo Ikerrez josita badago? Galdetuko dut, Oier, eta fundamentuzko erantzunik lortuz gero kontatuko.
Oier G
Oier G dio:
2021/07/07 22:29
Markélmu. Eta gaur bertan, foballa ikusten, "Unáisi" deittu detsa Unai Simon izeneko bati.
Markos Zapiain
Markos Zapiain dio:
2021/07/10 16:42
Ez dago kostaldean, baina Arrigorriagan ere erabili izan dute. Hori bai, soilik izen edo deitura bera dutenak bereizteko (Joseba Bilbao, Joseba Kintana> Josébil, Josékin...). Baliteke Bermeon ere hori izatea abiapuntuko bultzatzailea (gela hartan Iker Monasterio, Iker Garai eta Iñaki Monasterio zeuden), nahiz eta gero beste edonori ere aplikatu.
Markos Zapiain
Markos Zapiain dio:
2021/07/10 16:50
Oier, zure semearen ikaskidea Markelmú litzateke beharbada Zumaian edo Bidarten? Bizkaitik kanpo azkeneko silaban jartzen zaio azentua zenbait izeni, Frantzian bezala: Martín, Antón, Gotzón.

Bizkaian, ostera, ingelesen edo alemanen azentuazioa erabiltzen da: Gótzon, Ánton, Mártin. Joera hau zabaltzen ari da: gero eta Rákel eta Íbon gehiago dauzkagu.

Zaila, Gipuzkoatik kanpo entzutea "xilik on hai, Markóx!"
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Markos Zapiain

1963an jaio nintzen. Markos Zapiain naiz ia beti. Baina ez zidaten soldaduzka egiten utzi, nortasun bikoitza dela eta. Batzutan Pelipe pizten da ene baitan. Pozik ibiltzen da oro har Pelipe. Baina haserretzen denean, kontuz.

Azken erantzunak
Bai, izebarekin zein aitarekin bihotzez ... Markos Zapiain, 2022/08/03 10:38
Hala ere, umorea galdu behar ez den moduan, eta ... Amatiño, 2022/08/03 07:48
Kar-kar-kar, zein poliedrikoa den giza ... Markos Zapiain, 2022/08/02 16:39
Aukeran datorkidan gaia. Aurretiazko Borondateen ... Amatiño, 2022/08/02 16:11
Filosofiaz kanpo ere bai, zoritxarrez. Bestela, ... Markos Zapiain, 2022/07/18 17:10
Sergio Ramos andaluziarra da, eta Darwinek ... Amatiño, 2022/07/17 18:41
Alfonso, idatzi duzun guzti-guztiarekin ados. ... Markos Zapiain, 2022/07/04 11:34
Brabo, Markos!!👌 Izaskun Olaskoaga, 2022/07/03 15:46
Kaixo, Markos: Barrura iritsi zait gai hau. Egoak ... Alfonso Guilló, 2022/07/02 16:35
Gari, mila esker ni pentsalarien artean ... Markos Zapiain, 2022/06/28 11:30