Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Markos Zapiain / Ordutegi librearen alde

Ordutegi librearen alde

mzap 2005/01/17 08:32

Hain zaigu miresgarri ziminoa!

Eta, Elias Canettik dioenez, gizakiok salerosketan gabiltza tximinoengandik antzekoen.

Zuhaitzaren adarretatik goiti doala, ziminoaren esku biek ez dute zeregin berdina: lehenbizikoak adar berri bati heltzen dion bitartean, bigarrenak aurreko adarrari oratu behar dio. Abiada arriskutsuz doalarik gora, sarritan oratze horrek salbatuko du erortzetik, bigarren esku horrek bakarrik eusten baitio gorputzaren pisu guztiari.

Lehenbiziko eskuak adar berria hartu orduko, hori bai, ziztuan askatu beharko du bigarrenak adar euslea. Lasterrago, bizkorragoa igoera.

Esku bakoitzak, hortaz, oratu eta askatu beharko du, arin-arin. Noski, ezkerrak eskuinekoaren aurkakoa egin beharko du, txandaka.

Zuhaitzetik lurrera jaitsi ondoren ere tximinoak eskuen arteko txandakatze azkarrarekin jarraitu zuen.

Eta Canettik jatorri horixe bera ikusi dio komertzioari.

Izan ere, salerosketan, jasoriko zerbaiten ordainez beste zerbait ematen duzu. Lehenbiziko eskua nahi duzun salgaira abiatzen den bitartean, bigarrenak oraindik zurea duzun trukegaiari oratzen dio. Behin lehenbizikoak gutizia harturikoan, bigarrenak ordaindu egingo du. Ez lehenago. Estu zaindu beharra dago saleroskidea.

Iruzurra arbolatik erortzea duzu: lehenbiziko eskua hutsik baina bigarrena jadanik sosa emana.

Edonola ere, gizakiok salerostean sentitzen dugun poz fisikoak adieraziko luke arrakastaz errepikatu dugula antzinako igoera adarrez adar.

Horrexegatik gaude gizakiok tximinoarengandik hurbilen saltzaile zein erosle gisa.

Zergatik oztopatu poz hori igandez zein jaiegunez?

Izan ere, ez ote da askoz ere desorekatuagoa eta arriskutsuagoa igandez Anoetara zein San Mamesera joaten dena Max Centerrera joan nahi duena baino? Begien bistakoa den arren, sindikatuek ez dute txintik ere esaten.

Ez gara gutxi haatik aukeran nahiago dugunok tximinoa alboan, futbolzalea edo ehiztaria baino.

Sindikatuek langileentzako baldintza eta soldata egokiak lortzen ahalegindu behar lukete eta ez lanpostu berriak itotzen, ondoren beren ezina eta porrota ezkutatzeko erru alegiazkoak besteri garrasika leporatuz.

Langabetuak ez dira sindikatzen eta langabetuak dira ahulenak. Baina sindikatuek afiliatukeria babesten jarraitzen dute. LABeko eta ELAko militantea naiz aldi berean, eta lotsatuta nago.

Drogaren eta abortuaren zigor-gabetzearen aldekoek aldarrikatzen genuen legalizatzeak inor ez duela drogatzera edo abortatzera behartzen. Orobat erosteko orduan, eta ez dugu zertan onartu erosketak noiz egin behar ditugun gure ordez eta gure onerako erabaki nahi dutenen gurasokeria.

Jaiegunez eta igandez, menturaz, euskal ehiztariek mendia hustu eta saltoki tzarra beteko dute aurrerantzean. Eta, Jainkoa lagun, beharbada, amets bat dut, etorkizun eder batean, ehiztariz zein futbolzalez bete Max Centerrak Saturno aldera hegaldatuko dira, edo ifernu zulora amildu, eta tximinoak izango gara berriro Lurrean nagusi, eta bozkarioz beteko dugu Lurra, zeren Lurra berez ez baita bizkarroi bat, ez baita esaterako kuskuta edo, Zuberoan esaten den bezala, ogitina.

etiketak:
Patxi
Patxi dio:
2005/01/31 01:26

Ondo legoke osotasuna bai. Mundu mailako estatu bakar bat, aberastasunaren banaketa suposatuko lukeelako.

Eta utopia hutsa dirudien arren, nik inoiz baino gertuago ikusten det. Teknologiaren abiadura izugarriak, laister lanik gabe utziko gaitu, eta datorren iraultza, lanik ezean, aberastasunaren banaketa izan liteke.

Ea egia den.

Esperantoa? Zertarako, ingelesa badaukagu?

Ni pixkatxo bat ibili naiz, munduan zehar, eta oso gauza bitxia gertatu zait. Nere halamoduzko ingeleraz aritu naiz, gustora aritu ere, angolatarrekin, marrokiarrekin, daniarrekin, italiarrekin, frantzesekin... Baina ezin izan det inoiz lau hitz baino luzeagoko alkarrizketa txiki bat osatu, ingelesekin. Beti uzkur eta hotz,nerekin.

Beharbada, gogaituta daudelako, ingelera hain gaizki hitzegiten duten haiekin saiatzeaz...

Eurei tokatu zaie. Ze pena.

Euskerari uko egin? Sakrilego halakoa...

asel
asel dio:
2005/06/29 20:39

karkarkar, aspaldian ez dot ezer erosi corteinglesean, baia aitortu behar neuk be ezagutzen dotala poltsa salagarri horren lotsa, bai... Agian denda guztiak behartuta balegoz egun kopuru jakin bat ixtera, baia egun horreek egutegian ipinteko askatasuna baleukie... Ez da kontu erraza, ez, baia interesgarria ahalik eta ikuspuntu gehienetatik begiratzea. Edozlean bere, ia funtzionarioen esku dagozan zerbitzu batzuen ordutegia luzaten dan, horrek ez dau dendarik arriskuan ipinten! A, eta bai, Asel Luzarraga naz, opor usainak alaiturik eta bero nekagarri honek urturik, teklatu ganean nagi.

markos zapiain
markos zapiain dio:
2005/06/27 12:22

Zalantza ugari, bai.

Ordutegi libreak langile arruntoi egingo ligukeen mesedeaz gainera, zuk eskertuko zenukeena, fabore itzela litzateke gainera etorkinentzat.

Aurrera ateratzeko, hasieran txiringito txiki bat ipini, berton ordu mordo latza emon, sarritan berton behearen gainean lo egin eta seme-alabei beraiena baino egoera txukunagoa eskaintzea lortzen dute horrela geldika-geldika, bitu txinoak Friscon.

Asel, Asel Luzarraga bazaran, ezagutuko dozu agian Talako harategia, Joserena. Nik ez dot bertan ia astero erosten duela hamabost urtez geroztik soilik janari bikaina duelako, Joseren nortasun finagaitik baino, beran berbakera ederrarengaitik. Behar be, gogor arraio itxen dau, abuztuan goizez igiriten dau, oporretan joateko zarratu egundo bez. Kontrol orokor zentzudun batek Joseri mesede egingo lioke beharbada, baina etorkinari ez.

Bestalde, FNAC Bilbon zein Donostian jarriko da. Jai egunetan eta domekatan zabalduko balu, geure Katukalek lez zarratu beharko lukete ziur aski Urretxindorrak, Megadendak eta antzekoak.

Ni orain Joserenera lotura afektiboengatik noa neurri batean, baina etxetik hurbil eta eroso dudalako egin ditut lotura horiek.

Zenbat lotura afektibo beharko lituzke Urretxindorrak FNAC-i aurre egiteko?

Gainera, askotan gurago dugu batere lotura afektiborik gabeko erosketa.

Aitormen lotsagarri bat: lehengoan Corte Inglésen aftershave bat erosi neban. Hori ez da oso-oso lotsagarria. Baina itxaron. Gero kalean corteingleseko poltsatxo hori neroan, bistan.

Pentsatu neban: "joder, eta orain Alizia Stürtzek ikusiko banindu? Eskerrak ez nauela ezagutzen."

Dena den, baezpada ere poltsa sastarrontzira bota eta ezaugarri errudunik gabeko aftershavea erakusten nebala trankilago jarraitu neban aurrera Urretxindorrarantz.

asel
asel dio:
2005/06/20 15:08

Niretzako amorragarria da asteburuetan hainbat zerbitzu ez egotea. Asteko ordutegiagaz eta etxera iritsita leher eginda egonda, supermerkatua da, goseak hilko ez banau, ezagutzen dotan denda bakarra, eta batzuetan, bidean dekodalako, liburudenda. Ez dot uste nik horrek mesede handirik egiten dotsenik nire herriko dendei. Itzela da, ostera, munduko beste leku batzuetan zagozanean, edozein ordutan zein asteko edozein egunetan, denda jakin batzuk igirita dagozala jakitea, benetan. Zergaitik ez itxierazo dendak astean behin, baina denda bakotxak gura dauen egunean? Beitu tabernak! Imajinetan dozue tabernarien eskubideen alde egitearren zapatu arrastietan eta domeketan itxierazoko bageuntsie, eta jaiegun ofizial guztietan be bai? Ondo izorratuta egongo nintzake ni domeka goizeko txakolin eta pintxoak kenduko baleustez! Baina ordutegia luzatu behar daben lehenak, funtzionarioak! Noz egin neike nik edozer gauza udalagaz, eurak igirita dagozan orduetan ni beharrean banabil, ta ni kalean egon neintekeanean eurak itxita? Ta ganera geuk ordaintzen dotsegu soldataren zati bat! Sindikatuen ganien zer esango dot... Politikarien aje berberak dekoiez, tamalez... Ni ez nago inon izena emonda, ezta asmorik be!

Patxi
Patxi dio:
2005/01/26 22:18

  • Labur labur (zerbait esateagatik):
  • Maxiak hiriguneetatik urruti daude. Kotxea behar dezu bertara joateko. Atmosfera kutsatzen degu, ai! toallaren balea aldatzea ahaztu zaigulako, edo metxero bat gustatu ez eta beste bat hartzeko. (adi, ez nago kotxeen kontra. Erabilera kontsumista aberranteaz ari naiz).
  • Jendeak erosteko diseinatuak daude. Gauza merkeen usaiaren atzetik, nahi ez dituenak erosteko. Eta erosten ditu horratio! Engainuaren paradigma dira, neretzako.
  • Zer ikusteko gehiegi. Zeini ez zaizkio begiak nekatzen? Burukomina jartzen?
  • Haurrak dituenak... Zeinek asetu umeak? Erosi! Erosi! Erosi!
  • Dependienteen ardura bakarra, irtetzeko ordua noiz iritsi izaten da. Bezeroa zaindu? Sinpatia? Eta kualifikazioa? Beti langileak aldatzen ari dira.
  • Jendeak ez du harremanik izaten ondokoekin. Beti desberdinak, beti ezezagunak direlako. Denda txikietan, hitzegin egiten da. Maxietan EZ.
  • Benetako borrokak zenbait produkturen azken aleekin. Espektakulu benetan tristeak, neri ikustea tokatu zaizkidanak.
  • Orduak egiten dituzu toki berean, haizea hartu ezinik. Toki berean dena erosi beharrean. Ito egiten zera azkenerako.
  • Giroa: Jendea serio, mesfidati, isil... Hiri haundietako giroa, toki itxi batean konzentratuta.

Abantailak badituzte bai, Maxi-ek, baina balantzan, neretzako behintzat, oso pisu txikia dutenak.

Kontra pixkat gehiago, hurrengo batean.

iigo aranburu"moi"
iigo aranburu"moi" dio:
2005/01/28 14:36

q dices txo loko!pelipe zelan zaude?aer jarto konta zeozr interesantie tio aburrido

Benetako Goiko
Benetako Goiko dio:
2005/04/04 20:27

Markos, ni enai esan hor goidxen idatzi dauena, papauren bat baiño. Nik eztakot astirik interneten bobadak idazteko, igual neure anaidxie ezan da, edo sino potruek berotutie gustaten datzon nonor. Bueno Pelipe

Goiko
Goiko dio:
2005/01/17 18:05

Konparaketa oso arraroa bezain intersgarria da erakusten diguzuna. Baina nik uste, guri eta tximinoei ere, ez ligukela grazi askorik egingo jaiegunetan lan egiten joan behar izateak. emango lizuke zuri domeka goiz batean klaseak emoteak?(niri ez behintzat)

markos zapiain
markos zapiain dio:
2005/01/17 19:45

egia esango dizut, ez nire iritziaren alde egiteagatik:

askoz ere nahiago nuke domeka goizetan eskolak emon, eta martitzena libre, etxe inguruko denda txikietan erosketak patxadaz egiteko

Patxi
Patxi dio:
2005/01/17 21:34

“Moral unibertsalaren aldekoak ez du dagoena begirunez ezagutu nahi izaten, eta desberdintasunak aintzat hartu, baizik arrotz zaiona berdindu, burua larregi ez nekatzearren edo patologia uniformizatzaileren batek joa.”

Hau esaten zenuen “Atxagaren ustelkeria morala” mezuan.

Uniformizatzea ez da hitz egokia nere ustez. Hitz egokia jatea da. Suntsitzea, desagertaraztea. Gure tamaina txikiak eraginda, ez diferentziak. Euskal-Herriak Marruecosen azalera balu, 40 miloi lagun bagina, uniformizatze nahirik ez zan izango. Beste kontu bat izango litzateke.

“Harrigarri gerta daiteke banakoenean bezala herrienean ere jarrera moral nagusi definigarriak antzeman ahal izatea”

Arrazoi. Eta gu, zerbait bagera, txikiak gera, oso txikiak, oso jangarriak. Horrek bihurtzen gaitu abegikor, umil, bihotz oneko (eta baita gixajo ere, askotan).

Gaurkoaren harira etorriz, bat nator zurekin sindikatuen afiliatukerian, eta gure agintarien gurasokerian, eta beste gauza batzurekin ere bai...

Baina denda txikiak horixe dira, txikiak, bulnerableak, jangarriak... Euskaldunak bezelaxe.

Nik Saturnora, Maxiak bidaliko nituzke, oso gustora. Eta arrazoi sentimentalak baino, baditut beste batzuk, baina orain ere gehiegi luzatzen ari naiz.

Deskantsu egunak berriz, jarrai dezatela beti larunbata eta igandeetan izaten, mesedez. Beste gainerantzean, mendiak astegunetan ere, ehiztariz eta kotxedun mendizalez beteko liratekeelako. Utzi mendiari astegunetan deskantsatzen!

(ez dezu probatu zalantzarik gabe. Baina astegunetan deskantsatzea, ez deskantsatzea da)

anasintxa
anasintxa dio:
2005/01/19 22:07

Astegun buru-zurian ere uste dut komeni zaigula jai egunen bat ezta? Zer du domekak Eguaztenak ez duena?

"Jaunaren Eguna" modaz kanpo dagoela esango nuke, nire inguruan sikeran.

markos zapiain
markos zapiain dio:
2005/01/20 22:24

bai, eguaztena jai egun, mesedez

bestalde, ana, beldurgarria benetan mugikorrera bidali didazun mezua

norena da ifernuko ahots hori? zergatik bidali didazu?

mehatxu bat da?

ze nota nahi duzu ba?

markos zapiain
markos zapiain dio:
2005/01/20 22:32

patxi, zergatik diozu astegunetan ezin dela deskantsatu?

ez dut uste

eta zeintzuk dira Maxiak Saturnora bidali nahi izateko arrazoi sentimental horiek?

denda txikiak, hizkuntza txikiak...

suntsitu eta irentsi beharrean, zentzunez antolatuko balute OSOTASUNA...

mundu mailako Estatu bakar bat, munduko hiritarrek onartua, egokia litzateke esate baterako Hirugarren Munduko gosea baretzeko

baina euskaldunoi proposamen onargarriak egin beharko lizkigukete

Europan adibidez nik euskarari uko egingo nioke... baldin eta ingelesek, alemanek, frantsesek eta espainolek nirekin ESPERANTOZ egingo balute

bestela, zer egiten du ingeles batek nik ingelera ikasten dudan bitartean?

anasintxa
anasintxa dio:
2005/01/21 16:30

Egia gura badozun esatea, Ingelesek ezer gitxi egingo dabe.

Markos, Eskola Frantses batzuetan Eguaztenetan jai dabe ez da holan?

Ala agur...

  1. S: Ez da mehatxu bat, jolas bat baino. Ouija joastaldi bat egitekotan gabiz, erdu gaur Mundekako Katalin deuna baselizara.
Patxi
Patxi dio:
2005/01/22 03:49

Galdera guztiei erantzuten hasten banaiz, blog-a lapurtuko dizut. Nerea dela emango du.

Epeka beraz:

Astegunetan, haur txikiak dituztenak, iratzargailua jarri beharra daukate, jai izanagatik ere. goizeko 7,45 etan gora. Gero eskolara joan haien bila. Arratsaldean "bis" amorragarri bat.

Familia dutenak, mesedeak eskatzen dizkizute: Patxi, jai daukazunez... lagunduko etxeko trasladoa egiten? Ezin det eta... ITVa pasatzera eramango kotxea?

Mendizaleak... Joxe? nerekin mendira etorriko? A, klaro klaro, lana daukazula... Bale bale, bakarrik jungo naiz.

Telefonoa! "Mira, que te llamo de Venca catalogo; edo bankutik, edo lanetik, edo, edo, edo...

Atariko bilerak, ostegunetan beti, nere atarian.

Bestelako bilerak, beti astegunetan. Errukarria, batzorde batetan bazaude...

Isiltasunik ez kaleetan. Trafikoa, bozinazoak...

Patxadaz egin erosketak denda txikietan bai, baina ai! azukrea ahaztu zaizu. Buelta! Denda zabalik dago ta, noski. Baina arin, itxi egin behar dute eta.

Zinemarik ez asteazken eta ostegunetan.

Eta hauek denak, pentsatu beharrik gabe atera zaizkidanak. Gehiago daude.

Abantailak ere baditu, bai, astegunetan atseden hartzeak, baina balantzan, neretzako behintzat, oso oso pixu txikia dutenak.

Ados ez nagoen beste gaietaz, hurrengo batean.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Markos Zapiain

1963an jaio nintzen. Markos Zapiain naiz ia beti. Baina ez zidaten soldaduzka egiten utzi, nortasun bikoitza dela eta. Batzutan Pelipe pizten da ene baitan. Pozik ibiltzen da oro har Pelipe. Baina haserretzen denean, kontuz.