Telefono berria daukat

... eta tentazioa ere izan nuen, baina ez: lehendik ere nahiko adikzio eta lotura daukat sare sozialekin, lanetik eta etxetik kanpo nagoenean ere konektatuta egoteko. Beraz, ahalik eta trasterik merkeena, txikiena eta soilena hartu nuen, eta urte askoan irautea espero dut.

Hala ere, beste kontu bat nahi nuen aipatu: alegia, nire harridurarako, euskaraz konfiguratuta dator tresna berria; badakit aspalditik dagoela aukera hori, zenbait marka eta modelotan, baina aitortu behar dut inoiz ez diodala garrantzi handirik eman kontu horri; beharbada teknologia beti izan zaidalako arrotza, edozein hizkuntzatan etorrita ere.

Oraingoan ere ez nuen nik eskatu euskarazkorik. Saltzaileak eman dit hala, ezagutzen nauen seinale, eta eskertzen diot. Lagun batek esaten zuen moduan, "Normalak bagina bezala" sentiarazi nau. Nahiz badakidan inporta duena ez dela hori, baizik ze hizkuntzatan egiten dugun telefonoz nahiz aurrez aurre, twitter zein facebooken, blogean edo emailetan.