Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Nire uste harroan / Pernando bakarrik ez

Pernando bakarrik ez

Xabier Mendiguren 2008/01/09 11:10

Amezketak eman duen herritar ospetsuena izango da Fernando Bengoetxea Altuna, izen-abizenez ez baizik Pernando Amezketarra goitizenaz ezagunagoa (entziklopedian begiratu dut deituraren berri jakiteko, eta hor ikusi dut ni baino juxtu bi mende lehenago jaio zela). Gaur egun, berriz, herriko seme aski ezagunak dira Pello Zabala frantziskotar meteorologoa eta Joxean Tolosa pilotari ohia eta esataria (gehi euskal imitatuen parnasoan leku nabarmena duena), biak ere hiztun egokiak eta herriaren izena munduan altxatuko dutenak (gure mundutxoan, bederen).

Nik ere Amezketaren izena altxatu nahi nuke bada. Izan ere, joan den urte amaieran ezagun batek eskatu zidan, Amezketako liburutegian euskarazko liburuak jende gutxik hartzen zituela-eta, euskaraz irakurtzeko ohitura zabaltzeko talde bat osatu nahi zutela-eta, ea nik akuilatzaile-lanak egingo nituen. Baietz esan nion, eta hilero hasi gara biltzen, hileko lehen astelehen arratsaldean. Aldi bakoitzean liburu bat hautatu eta huraxe komentatuko dugu hurrengo hilean. Bilerari itxura akademikoa kentzeko eta denok lasaiago jarduteko, txorixoa, ogia, gazta eta  txorixoa eramaten ditugu, eta orain arte umore eta giro onean joan dira gure tertuliak.

Ez dut esan nahi Sarako eskolaren hurrena izango denik Amezketakoa. Herriko jende normala da bildutakoa, 20 eta 50 urte bitartekoak gehienak, batzuk irakurtzeko ohitura badutenak eta besteak ez hainbeste, baina 1000 biztanletara iristen ez den herrian 20 lagun biltzen gara, hilero euskarazko liburu bat irakurri eta komentatzeko. Egin kalkuluak herri handiago bateko biztanle-kopuruarekin, eta berehala ohartuko zarete zenbat den hori.

Oraindik ez didate txisterik-edo kontatu, baina ea hurrengoan, ardo pixka baten laguntzaz...

etiketak:
Eider
Eider dio:
2008/01/19 01:56

Bai ekimen polita Amezketan sortu dena. Saioetara joango ez naizen arren neu ere agian animatuko naiz Karmele Jaioren “Amaren eskuak” irakurtzera. Ea norbait animatzen den saioetan egiten dituzuen komentarioak blogen batean jartzera. Latuko Aritz behar bada?

Ugarteri dagokionez, eta bestelako eztabaidetan sartu gabe, egia da Ugarte badela eta existitzen dela aldarrikatzea gustatzen zaigula. Baduelako bere nortasun edo izaera eta maite dugulako. Zuri izugarri gustatzen zitzaizun Wazemank saioan Joxean Tolosa “Ugartekoa” esaten zuten beti, eta guk pozik entzuten genuen hori

Ondo izan!

Aritz
Aritz dio:
2008/01/10 02:44

Gabon, eta eskerrik asko, Xabier, hire blogean amezketarron aipamena egiteagatik. Estimatuta zagok!

Hik ederki esan (idatzi) duan bezala, hasi baino ez gaituk egin euskarazko literatur tertuliekin, baina martxa polita hartu diagu, bai horixe! Ederra duk, kuriosoa oso, estilo diferente askotako amezketarrak gisa honetako ekimenetan biltzea: ikasleak, etxekoandreak, irakasleak, emakumezkoak, gizonezkoak, lotsatiak, isilik egon ezin dutenak, altuak, baxuak, elizkoiak, jentilak... En fin, zoragarri!

Badirudi, gainera, elkarri ESKU emanda ibili beharrean garela, ESKUAK gora eta ESKUAK behera ibili beharko dugula; izan ere, irakurri dugun estreinako liburua Karmele Jaioren "Amaren eskuak" izan da, eta segidakoa, otsailerako irakurri beharrekoa, "Arotzaren eskuak". Kar, kar!

Ba, horixe, inspirazioa-edo azaldu zaidala (ez dakit nondik), eta hire mezuari erantzun hauxe idaztea pentsatu dudala, Xabier. Ez ahaztu: hurrengo zita katu hilean, inauteri ostean.

Ordura artean (eta aurrerantzean ere bai, noski), POZIK BIZI!

Latuko Aritz.

xme
xme dio:
2008/01/10 10:38

Horixe txistea! Ardoaren partez, txorixoa bi aldiz. Ondo lehorra geratuko zitzaigun merienda.

Tintxarrisfera
Tintxarrisfera dio:
2008/01/14 10:05

Uste dut Ugartekoek herri beregaintzat dutela eurena. Amezketarrak ote diren... bertan galdetu behar akaso!

Ander
Ander dio:
2008/01/09 23:53

Zorionak ekimenarengatik, zuri eta amezketarrei. Falta den txiste amezketarra "txorixoa, ogia, gazta eta txorixoa" zerrenda bitxi horren atzean egon daitekeela iruditzen zait. Nolatan bi txorixo? Eta Pernandoren erantzuna.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Xabier Mendiguren Elizegi

Xabier Mendiguren Elizegi dut izena. Beasainen jaio nintzen, 1964an. Filologoa naiz formazioz, editorea ofizioz, irakurlea afizioz, idazlea bokazioz, berritsua bizioz, euskalduna bedeinkazioz edo madarikazioz. Lagunen eskariei ezetz esaten jakin ez eta blog honetan idazten hasi naizenez gero, ea gauza naizen, egunen harian, nire giza kondizio horien inguruan bururatzen zaizkidanak kontatzeko.