Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Nire uste harroan / Galarrena Lekitxoko erara

Galarrena Lekitxoko erara

Xabier Mendiguren 2012/08/16 22:27
Ehun urte dira egundoko galerna batek ehunka marinel hil zituela, Bermeon eta Lekeition batez ere. Blog honetan idazle gonbidatuak sartzen hasiko gara, eta urrezko estreinaldian, Miren Agur Meabek galera haren mendeurrena dela-eta idatzi duen kopla-sorta, Lekeition bertan egin zen ekitaldi baterako propio sortua.

GALARRENA LEKITXOKO ERARA

 

Hamabitik hamabira dator / haizetan dan zantarrena,

ehun urteko itsasoan zehar / ukabilka galarrena.

 

San Nikolas ta San Juan Bautista, / pal-pal daroizuez belak!

Iluntzerako beharko dozuez / kanpaiak eta kandelak.

 

Krabelin eta larrosa meheak / itxi genduzan portuan.

Egunen baten batuko doguz / zeruetako ortuan.

 

Mariposa bat bialdu eidazu / olatutxuen artean,

Lekitxo bidean para naiten / izarrik ez dagoenean.

 

Antiaguakoa, libratu gaizuz / uraren haginetatik!

Korroskadaka jan nahi gaitu-eta /ezer ez eginagaitik.

 

Egurren untzek urratu dabez / gure eskuetako maminak.

Atun bila urten gendun baina / geu gara orain txitxinak.

 

Bai gau luzea! Bai alba baltza! / Urrun ikusten da lurra;

luze ta baltzagoa da ondino / heriotzaren adurra.

 

Palu bi ahal bestean lotuta / egin eben kurtzioa;

hari heldu nahia ta ezin heltzea, / gizonen kalbarioa.

 

Ai, laguntzarra, banoia eta / entzuixu nire mezua:

txarto eginak parkatu eta / etxekoentzat mosuak.

 

Izaratxu bat zabalduko dot, / arreorako josia,

neure maitxia hartzeko ez bada, / neutzako da mortajia.

 

Kalatxori lemazain leialak, / mututu jat eztarria.

Altxa zaiteze mastatik eta / sokorro eskatu herrian.

 

Izurdak harro bronpadaka, / lazunak olgetan kaian,

nahi ez danean ez dago agurrik / memoriaren talaian.

 

 

Miren Agur Meabe

Lekeition, 2012ko abuztuaren 12an

Emma
Emma dio:
2012/08/18 14:57
Quisiera entender este poema. Me fascina Miren Agur Meabe.
Ander
Ander dio:
2012/08/22 10:19
Kopla ederrak!! Ez nekien Lekeition ere ekimenik antolatu zenik... "Galarrena Bermioko erara" gaur gauean, Oizmendi telebistan.
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Xabier Mendiguren Elizegi

Xabier Mendiguren Elizegi dut izena. Beasainen jaio nintzen, 1964an. Filologoa naiz formazioz, editorea ofizioz, irakurlea afizioz, idazlea bokazioz, berritsua bizioz, euskalduna bedeinkazioz edo madarikazioz. Lagunen eskariei ezetz esaten jakin ez eta blog honetan idazten hasi naizenez gero, ea gauza naizen, egunen harian, nire giza kondizio horien inguruan bururatzen zaizkidanak kontatzeko.