Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Nire uste harroan / Emakumeak entzierroan?

Emakumeak entzierroan?

Xabier Mendiguren 2012/07/12 08:17
Iruñeko entzierroa ikusi berri dut, telebistaz. Une batez begiak zezenetatik apartatu eta korrikalariengan jarri ditut, eta, lehendik ere banekienaz bat-batean ohartu banintz bezala, esan dut: ez dago emakumerik eta!

Andrazkorik lasterka ez ibiltze horrek arrazoi eta interpretazio anitz izan dezake: emakumezkoak jaiegunetik baztertzea, kiroletatik uxatzea, ekintza sakratuetatik egoztea… Niri, baina, beste burutazio bat datorkit gaur, aurreko horien gainetik: nolako ergelak diren (garen) gizasemeak, zenbat harrokeria eta erokeria dituen potrodun jendeak!

Badakit neskaren batzuk ere ateratzen direla lasterka: bejondeiela! Eta eskerrak, esaten diot neure buruari, Iruñeko buruargituren bati ez zitzaiola bururatu entzierroa emakumezkoei galaraztea. Bestela, diskriminazio onartezinaz eta emakumearen eskubide utziezinaz aritu beharko bainuke hizketan, isildurik ohitura hori benetan iruditzen zaidana: majaderokeria galanta.

Oier Araolaza
Oier Araolaza dio:
2012/07/12 12:01
Gure alaba horrekin kezkatuta zegoen aurrekoan ere, neskarik ez zegoela eta neskarik ez zegoela. Eta nik baietz, gutxiago, baina badaudela. Eta azkenean, kamara geldoan ematen duten errepikapenean ikusi genituen laupabost neska. Ni pozik alabari, ikusten?? Baina umearen amak bestelako ikuspuntua zuen: "Ez dago neskarik, neskok ez daukagulako beharrik horrelako tontakeriak egiteko eta matxitoarena egiteagatik gure burua arriskuan jartzeko". Neskaren bati ere entzun izan diot antzeko argumentua Alardeen kontuarekin. Eta hari horri tiraka gaiztakeria bat: entzierroetan emakumeen parte hartzea sustatu nahi badu inork, debekatu dezala!
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Xabier Mendiguren Elizegi

Xabier Mendiguren Elizegi dut izena. Beasainen jaio nintzen, 1964an. Filologoa naiz formazioz, editorea ofizioz, irakurlea afizioz, idazlea bokazioz, berritsua bizioz, euskalduna bedeinkazioz edo madarikazioz. Lagunen eskariei ezetz esaten jakin ez eta blog honetan idazten hasi naizenez gero, ea gauza naizen, egunen harian, nire giza kondizio horien inguruan bururatzen zaizkidanak kontatzeko.