Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Nire uste harroan / Gure egoeraren pareko

Nire uste harroan

Gure egoeraren pareko

xme 2006/05/11 09:01

Euskal Herria delako hori fikzioa dela esaten dabiltza Raxoi-eta, Sanz-eta... Ez naiz halakoekin eztabaidan hasiko, dena dela; ez dut uste nire bloga irakurtzen dutenik.

Euskal Herria badela sinesten dugunok, ordea, zuzentasun politikoaren izenean, fikzioaren mugan ibiltzen gara batzuetan.

Orain dela gutxi kaleratu da "Euskal Herria datuen talaiatik" estatistika-liburu ederra, Udalbiltzaren ekimenez Aztikerrek prestatu eta Txalapartak argitaratua. Zazpi herrialdeen mapa bat egiten dugunean bezala, EH osoari dagokion estatistika bat plazaratzen dugun bakoitzean errealitate bat irudikatzen dugu; hori zer da: fikzioa gizentzea, ala muga administratiboek ezkutatu nahi luketen egiazko izate bat agerira ekartzea? Bakoitzak nola ikusi nahi duen.

Batzuetan fikzioaren mugan ibiltzen garela esan dut arestian, eta adibide bat ematera noa. Gure egoera soziolinguistikoaren parekoen bila ibiltzen garenean, Katalunia, Korsika, Galizia, Bretainia, Gales, Flandria eta horrelako herriak aipatu izan ditugu. Hemendik aurrera, berriz, lagun berri bat gehitu behar zerrenda horretara.

"Datuen talaiatik" delako liburuan, hizkuntzaren egoerari dagokion atalean, gaztelania eta frantsesa hizkuntza ofizialtzat dituzten estatuen mapa bat dator, mundu osokoa. Frantsesaren kasuan, Kanada eta Afrikako frankofonia osatzen duten erresuma guztiak datoz: Senegal, Mali, Niger, Txad, Kamerun eta abar. Espainolarenean, Amerika hispano guztia, Mexikotik Argentinara. Eta hirugarren atal bat dator azkenik; "gaztelania eta frantsesa" ofizialak diren herrienak, eta hor bi kasu mundu guztian: Euskal Herria eta... Ekuatore Ginea.

etiketak: Saski Naski
Eneko
Eneko dio:
2006/05/11 21:39

Beno, etorkizuna eraikitzea ere badela iruditzen zait.

Fikzioa bai, bale, baina fikzioak errealitate berriak gauzatzen lagundu du maiz. Etorkizuna eraikitzerakoan "zientzia-fikzioa" lagungarri izan da askotan. Normalean, ezin dugu sortu imajinatu ezin duguna, kasualitatez edo txiripaz ez bada behintzat. Berrikuntza, produktu berriei zein politika edo beste arlo askori aplikatu daitekela uste dut.

EH osoari dagokion estatistika bat plazaratzen dugun bakoitzean errealitate bat irudikatzen dugu; hori zer da: fikzioa gizentzea, ala muga administratiboek ezkutatu nahi luketen egiazko izate bat agerira ekartzea?

xabier andonegi
xabier andonegi dio:
2006/05/11 12:50

Oso zuzen ari zarela iruditzen zait. Maiz mintzatzen gara muga esistitu ere egingo ez balitz bezala, eta gure izateko moduan, gure ohituretan eta gure baitan eraginik ez balu bezala. Eta izugarria du. Irudipena dut fikzioan ibili gabe batzuek ez dakitela abertzale izaten, eta hori da abertzaletasunaren akats larrienetako bat.

Joan
Joan dio:
2006/05/14 16:33

Gaztelera eta Frantsesa hizkuntza ofizialtzat duten Herri bakarrak EHa eta Ekuatore Ginea direla "bakarrik"?... urrutira joan zarela uste dut. ta Katalunia?, ez al dago Frantzia eta Espainia handiaren artean banatua?

xme
xme dio:
2006/05/15 20:46

Estatistika-liburu horretan, Euskal Herriaz kanpo estatuak baizik ez dira hartzen erreferentziatzat, estaturik gabeko nazioei buruzko datuak biltzeko zailtasunagatik.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Xabier Mendiguren Elizegi

Xabier Mendiguren Elizegi dut izena. Beasainen jaio nintzen, 1964an. Filologoa naiz formazioz, editorea ofizioz, irakurlea afizioz, idazlea bokazioz, berritsua bizioz, euskalduna bedeinkazioz edo madarikazioz. Lagunen eskariei ezetz esaten jakin ez eta blog honetan idazten hasi naizenez gero, ea gauza naizen, egunen harian, nire giza kondizio horien inguruan bururatzen zaizkidanak kontatzeko.