Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Nire uste harroan / Bolantean egin litezkeenak

Nire uste harroan

Bolantean egin litezkeenak

xme 2006/03/08 17:17

Legearen inguruko gogoetak amaitzeko, azken alea.

Dakizuen bezala, Hego Euskal Herriko errepideetan, autoa gidatzen goazela eskuko telefonoa erabiltzea legez kanpo jarri dute (ez dakit "debekatu" egin duten, edo azio hori egiten duenarentzako zigorra ezarri, besterik gabe). Erabaki normala da alde batera, arreta galduz gero asko handitzen baita istripuren bat izateko arriskua.

Telefonoa bezala debekatu omen dute MP3 entzungailu bat eramatea belarrietan, arrazoi berberarekin. Hori ere zabalduz doan ohitura izango da noski. Dena dela, pentsatzen jartzen da bat: jokaera arriskugarri guztiak aurreikusi behar ote ditu legeak? Arriskutsua izango baita, esate baterako, gidatzen goazen bitartean ogitarteko bat jatea, betaurrekoak garbitzea, mukiak kentzea, aldamenean doanarekin zirrika hastea, gustuko irrati-sintoniaren bila jardutea... Ez dut jendaurrean aitortuko jokabide horietan guztietan zein praktikatu dudan, poliziaren bat ere izan baitezaket zelatan, baina bat edo beste bai.

Bekatu bat aitortzen ausartuko naiz hala ere: autoa martxan doala ez, baina semaforo baten aurrean geldirik dudala, ezin tentazioari eutsi eta, behin edo behin, aldean daramadan liburua hartu izan dut, pasarte bat irakurtzeko. Semaforo gorriek eskuarki sortu ohi diguten irudipenaren kontra, ez dakizue ze laburra egiten den tartea!

Gaur, adibidez, Leire Bilbaoren Ezkatak neukan aldamenean, eta "Gereziondoak loretan" poema eder hau bezlakoak irakurtzeko aprobetxatu dut:

Bere haur negarra isilarazteko
bueltatu nahi duela herrira esan dit,
maiatzak ertza jo aurretik
gereziondoak loretan ikusteko.

Denborarekin kaleak eta iritziak
okertzen joan zaizkiola,
arnasa ez duela jada
utzi zuen lekuan aurkitzen.

Bakardadea neguko kaleetan
beroki lodi batekin ibiltzea dela,
badirela atea zabaltzean
inoiz ezer sartzen ez den etxeak,
kanpoko hotza ez bada.

Egunak hausten zaizkiola eskuetan,
hil berriak bezala prestatzen dela gauero,
lotsa ematen diola ohean biluzik hiltzeak.

Maiatzak ertza jo du,
eguzkiak berotu harriak sartu ditu poltsikoan.
Bere haur negarra isilarazteko
bueltatu nahi duela herrira esan dit.

Magabila
Magabila dio:
2006/03/08 22:01

Ez dakit zeinena den poema baina gauza bat argi dut: SARRI, ETXEAN NAHI ZAITUGU!

Usuaian galdutako pinguino bat

leire
leire dio:
2006/03/10 13:52

Orain urte batzuk Galdakaon lanean nenbilela "De parte de la princesa muerta" irakurri nuen autoan, semaforo eta atasko guztietan tartetxo bat hartzen nuelako. Gozada bat izan zen!

Gidatzen gauza arriskutsuenetakoa doministiku egitea da, edo niri horrela iruditzen zait, ba. Hori ere debekatuko digute?

Lander
Lander dio:
2006/03/11 01:57

Debekua eta olerkaritza lotu dituzu, Xabier, eta hara non agertu da Sarri atzean ezkutatzen duen olerki bat. Ez dakit, egia esan, Leirek olerkia Sarriren harriak gogoan zituela idatziko ote zuen; baiezkoan nago... Debekuez ari zarela, ni ere horretaz jabetua naiz, eta ez pentsa bueltak eman ez dizkiodanik. Autoan noala, bada nire onetik ateratzen nauzen zera. Hiri handietan, adibidez, egunez nola, semaforoek gauez funzionatzen dute. Batzuetan begibistakoa da beharrezkoak direla, semafororik gabe ezbeharren bat gertatzeko arriskua dagoenean, adibidez. Beste batzuetan, aldiz, han geratzen zara, semaforoan geldi, bakar-bakarrik, semaforoaren gorriari inozoaren atzera begira. Begiratzen duzu aldeetara, eta ez duzu semaforoan gelderik egoteko arrazoia ikusten. Hantxe dago autoa, zu barnean, eta kalea hutsik. Ez da bide gurutzea ere, zebra bide bat baino. Semaforo horiek gutxi irauten dute, baina, niri behintzat, segundutxo horiek sumindu egiten naute: zertarako daude piztuta? Zergatik ez dituzte anbarrean jartzen? Nahita egiten al dute den-dena aldrebes? Ni, azken urteotan, horiek pasa egiten ditut, gasoleoa aurrezteko bada ere. Galdera da: oinezkoentzako diren semaforoak, oinezkorik ez dagoenean, behaharrezkoak al dira?

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Xabier Mendiguren Elizegi

Xabier Mendiguren Elizegi dut izena. Beasainen jaio nintzen, 1964an. Filologoa naiz formazioz, editorea ofizioz, irakurlea afizioz, idazlea bokazioz, berritsua bizioz, euskalduna bedeinkazioz edo madarikazioz. Lagunen eskariei ezetz esaten jakin ez eta blog honetan idazten hasi naizenez gero, ea gauza naizen, egunen harian, nire giza kondizio horien inguruan bururatzen zaizkidanak kontatzeko.