Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Nire uste harroan / Borroka-zelaiaren hedaduraz

Borroka-zelaiaren hedaduraz

Xabier Mendiguren 2006/03/02 13:13

Michel Houellebecq idazle frantsesak bere hasierako obretako bat du "Extension du domaine de la lutte" (gaztelaniaz, "Ampliación del campo de batalla"). Liburu horrekin ez du zerikusirik baina, izenburu hori etorri zitzaidan gogora atzo, berriak entzuten ari nintzela.

Imajinatu borroka-zelai bat. Gerra baten erdian gaude, gudaldi bat jokatu berri da, eta armada biak zein bere lubakitara erretiratu dira. Erdian, berriz, hildakoak, alde bateko nahiz bestekoak. Borrokaldia amaitu eta gero, izango da momentu bat, handik ordu batzuetara edo biharamunean, gorpuak jasotzekoa, eta nik imajinatu nahi dut lubakietako inori ez zaiola burutik pasako une hori aprobetxatzea etsaiari jo eta tiro bat sartzeko kopetaren erdian.

Ez dakit gudaren humanizazioa den hori, edo Genevako konbentzioaren atal bat, edo logika militarraren azpitik dagoen zentzunak agindutakoa. Berdin zait: gorrotoaren gainetik, hildakoari gutxieneko errespetu bat zor zaio, eta harekin bat egiten dutenei ere bai.

Gizalege hori ez da askotan betetzen, zoritxarrez. Lasa eta Zabalaren gorpuzkinak gogora ditzaket, Tolosako hilerrian, eta beste hainbat, zerrenda nahi beste luza dezaketenak. Beste aldetik ere gogoan daukat noizbait komunikabideetan irakurria (ezin jakin egia den baina), ETAkoek asmoa zutela Ordoñezen hilobi ondoan lehergailua jartzeko, haren omenezko ekitaldian PPko kide mordoxka akabatzearren; hilketak berez duen zirrarari makabrotasun berezia eransten zion plana, dudarik gabe.

Horregatik penatu eta haserretu nau Jaurlaritzako Barne Sailaren erabakiak Igor Anguloren hileta-omenezko ekitaldia debekatu duenean, terrorismoaren apologia izan zitekeelakoan. Javier Balza pertsona neurritsu eta bizkortzat daukat, baina kargu horretan dagoenak jakin behar du, legearen interpretazio estutik harago (kasu honetan ez da inongo epaileren agindurik izan), gizatasunez jokatu behar lukeela. Hildakoei eta bizidunei zor zaien errespetuarekin.

Borroka-zelaia, zabaldu ordez, ea denon artean murrizten hasten garen.

etiketak:
Gaztelako bat
Gaztelako bat dio:
2006/03/03 18:16

Kepa Ele: Ez desitxuratu hemen gertatuakoa. Ni hasi nintzen ematen ETAkideak eta borroka-zelaietan eroritakoak alderatzearen kontrako arrazoiak (zuzenak ala okerrak baina arrazoiak). Hori baldin bada Mendigurenen mezua desitxuratzea, ba errazegi desitxuaratzen dira ba Mendigurenen mezuak.

Gero Olegario, ironia baliatuz, saiatu zen ni jartzen ETA eta ETAkideen jarduera eta motibazioa sinpleegitzat jotzen dituztenen parean, eta ironiaz ere eskatu nion bera hain sinplea ez izateko. Olegario berriro saiatu denean ETAkideak aurkezten gizajoak bezela, izugarri sufritzen dutenak, esan diot barregarria gelditzen ari zela. Eta gero zu agertu zara putreetaz hitz egiten. Ikusten duzunez, kontua ez da izan borrero-biktimen aldetatik ibiltzea.

Nola nahi ere, eskerrik asko Unamonori zuzentzen laguntzeagatik: Ez dago ezer gaizki euskaran arrazoiketarako, baizik eta ETAkideen ongizatea hainbeste inporta zaien euskaldun batzuengan.

Kepa Ele
Kepa Ele dio:
2006/03/03 16:07

Gaztelako bat: Lehendabizi Xabierren mezua erabat desitxuratzen duzu zure mitina botatzeko eta gero ironia mingarriaz aritzen zara hildako batekin... Hobe duzu zure mezuak ondo berrirakurtzea besteei, aurreiritzirik gabe, juzkatu baino lehen. Oharra: Gizarte honetan borrero izatetik errugabe izatera pasatzea, eta alderantziz, ze erraza den frogatu duzu. Nahita egin duzu? Eskerrik asko lekzio magistralagatik.

Gaztelako bat
Gaztelako bat dio:
2006/03/03 14:11

Beste behin ere agerian geratu da ze motakoak diren euskal blogosferan ibiltzen diren lagun asko. Gustokoa ez zaien iritzi baten aurrean, iraintzen besterik ez dakite egiten. "astakirten", "kabroia!" "putre" irakurri daitezke hemen. Badirudi batzuk tematuta daudela Unamunori arrazoia ematean, Euskarak arrazoiketarako balio ez zuela esaten zuenean.

Kepa Ele
Kepa Ele dio:
2006/03/03 13:26

Gaztelako bat: Nazkagarria zait EDOZEIN hildakoari buruz ironia mingarriaz irakurtzea. Hildakoak desberdinak izanda ere putreek ez dituzte desberdintzen. Hori behintzat pentsatzen nuen nik, baina zuri irakurtzean konturatu naiz badirela ere putre moeta desberdinak ere. On egin.

Gaztelako bat
Gaztelako bat dio:
2006/03/03 12:47

A ETAkide gizajoak! A zenbat sufritzen duten! Beren sufrimendu itzelak izugarrizko errukia sortzen dit nere baitan. Benetan gero eta parregura gehiago ematen dute ETAkideengan baliagarria den zerbait dendendatzeko aurkitu nahi dutenek. Nola daiteke hain etsita ibiltzea? Ene!

Anda, balaklaba, zu ere barregura emateko nahian?

balaklaba
balaklaba dio:
2006/03/03 02:09

Jode, goiko anonimoak pertsona bera ziren, kabroia! Truko zahar horrekin batenbat engainatu du, baina www.eibar.org zerbitzariak ez du gezurrik esaten. LSSICE legeak, besteak beste, zerbitzarietarako atzipenak hilabetez gutxienez gorde behar direla dio eta zorriaren arrastoa hortxe geratu da denboraldi baterako. Antza, bere burua ezkutatzen ez du ikasi oraindik baina errespetua zer den aspaldi ahaztu zitzaion... Erraza izan da; euskal blogosferan denek ezagutzen dugu elkar... Zerbitzariko Auditorien 'log'a kontsultatu hemendik, WHOIS bat handik eta ipurdia garbitzeko erabiltzen duzun paperaren marka agertzen zaigu pantailan... Zoragarria!

Olegario
Olegario dio:
2006/03/03 00:17

Ez dakit non ikusi duzun iraina nire berbetan. Agian txarto espresatu naiz ironia erabili gureta, seguraski hori izango da, baina esan nahi nuen bakarra da ETAkoek ez dutela dibertsioz egiten egiten dutena eta eurek ERE (alegia, besteen sufrimentua onartzen dut) sufritu egiten dutela.

Gaztelakoaren "ETAko egiten dira errugabe askoren bizitza bukatzen laguntzeko" esaldiak harritu nauelako idatzi dut. Agian txarto espresatu naiz, berriro diot.

Barkatuko didazu, baina nik ez dut inor iraindu (zuk bai Donostia) eta ez dut astakirtentzat nire burua, ez naiz lotsatzen idatzitakoaz.

Hori esanda uste dut nire jarrera argi gelditu dela eta hemen bukatzen dira Xabierren mezuarekiko nire interbentzio guztiak. Portzierto: nik zuek besteko gogoa dut, edo are gehiago, hau guztia buka dadin.

donostia
donostia dio:
2006/03/02 20:54

Flipatu egin dut zuen elkarrizketa honekin, oso ondo, zorionak bioi, hortxe, hortxe, min gehien ematen duen lekura bota gezia, ez, oraindik bizi da, rematatu... A ze astakirten parea. Idatzitakoa irakurtzean lotsarik ez al duzue sentitzen? Ta gero konponbidea politikoei exijituko diegu... Guk hala jarraitzen dugun bitartean... JAI.

Gaztelako bat
Gaztelako bat dio:
2006/03/02 20:02

A, nik uste nuen ETAkide sartzen zirela kausa zehatz baten alde, alegia, Euskal Herri independiente (eta sozialista) bat lortzeko. Eta ez nekien beraiek hildakoak jaten zituztela. Ba bai tontoak direla, hori egiten badute beste janari batzuk jan beharrean, (legatza saltsan, bakailua pil-pilean, Tolosako babarrunak plup plup plup, eta euskal sukaldeak eskaintzen zigun hainbeste plater eder). Gero ez da harritzekoa bere buruaz beste egiten badute ...

Olegario
Olegario dio:
2006/03/02 19:03

Arrazoi osoa duzu Gaztelar.

ETAkide sartzen denak ez du egiten egoerak behartuta , ezta kausa baten alde ere. ETAkide sartzen denak "errugabe askoren bizitza bukatzen laguntzeko" egiten du. Gustatzen zaio sufrimendua eragitea eta beretzat komodoa da bizimodu hori. Sadiko hutsa da. Eta gero errugabe horiek jaten ditu, ondo egosi eta gatza bota ostean.

Bukaeran ere arrazoi. Jende askoren arrazonamendu formak ez dira aldatu. Tematuta eta itsu jarraitzen dute. "Beti bezala."

Kepa Ele
Kepa Ele dio:
2006/03/03 18:45

Eskerrik asko berriro ere lekzioagatik.

Nere uste apalean, politika edo edozein ironia mingarri gainetik dago Mina.

Zu izan zara lehena besteak aurre juzkatzen. Lan samurra omen da zuretzat "akomodadore" lana egitea. Argi geratu da hildakoen sufrimenduak parekatzerik ez dagoela zuretzat. Nik behintzat ez dut zuk bezala pentsatzen.

Etazaleak nonnahi somatzen badituzu zure arazoa da, baina ez duzu batere eskubiderik nere iritziak etakideen aldeko mezutzat hartzea.

Agur Ben Hur.

Gaztelako bat
Gaztelako bat dio:
2006/03/02 18:12

Beste behin ere, ETA den zaborrari duintasuna ematen saiatzen. Borroka-zelaietan erori diren gehienak askotan izan dira gizajo talde bat, beren gaineko indar boteresuek borrokara behartu dituztenak. Beste asko erori dira beren familien defentsan, edo lan haudiz eraikitako gizarte bat defendatzen, beren ondorengoak behar bezala bizi daitezela. Egoera larri batean beren bizitza galdu dute arriskuan zegoen beste bizitza batzuk salbatzeko. Baina ETAkide bihurtzen denak bere borondatez egiten du, inork behartuta, inoren bizitza salbatzeko, baizik eta errugabe askoren bizitza bukatzen laguntzeko, eta beste modu baketsuago batzuen bidez defendatu ez daitekeen ezer defendatzeko. Batzuk eta besteak alderatzeak ozen hitz egiten du zutaz. Beti bezala.

Gztelako bat
Gztelako bat dio:
2006/03/03 19:48

Zer Mina da hori? Hildako batek eragiten duena?

Nik dakidanez, hemen borroka-zelaietan hildakoetaz eta beren buruaz beste egiten duten ETAkideetaz hitz egin da. Batez ere azken hauetaz. Baina zuk esaten baduzu hauen heriotza beste edonorena bezain mingarria iruditzen bazaizu, eta hauei ez diezula zaletasunik, sinistu beharko dizut.

Baina atrebentzia baldin ez bada, zer ulertu behar dut nik ba? Anguloren heriotza bezain mingarria iruditzen zaizkuzula, adibidez, Leganesen hil egin ziren zazpi terrorista islamiko haiena? Agian azken hau bezain mingarria zazpi haiek Madrilgo trenetan erail zituztenena?

Niri ez zaizkit berdinak iruditzen hildako guztiak. Eta pozik nago horregatik. Gizalegearen seinalea delakoan nago eta.

Gaztelako beste bat
Gaztelako beste bat dio:
2006/03/04 13:51

1976ko martxoaren 3an Gasteizen hil eta zauritu zituzten pertsonak be terrorismoaren biktimatzat jotzen dau Eusko Legebiltzarrak eta beste hainbeste egitea eskatu deutsa Espainiako gobernuari. Honetan, guzurra badirudi be, alderdi guztiak bat etorri dira. Danak? Bai. Dependentistak eta independentistak, alde bietako nazionalista epelak eta mediopensionistak.

Honek esan nahi dau posiblea dala. Zubiak egitea be posiblea dan legez. Goian bego Jose Luis.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Xabier Mendiguren Elizegi

Xabier Mendiguren Elizegi dut izena. Beasainen jaio nintzen, 1964an. Filologoa naiz formazioz, editorea ofizioz, irakurlea afizioz, idazlea bokazioz, berritsua bizioz, euskalduna bedeinkazioz edo madarikazioz. Lagunen eskariei ezetz esaten jakin ez eta blog honetan idazten hasi naizenez gero, ea gauza naizen, egunen harian, nire giza kondizio horien inguruan bururatzen zaizkidanak kontatzeko.