Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Nire uste harroan / Geografia-ikasgaia

Nire uste harroan

Geografia-ikasgaia

xme 2005/02/14 09:32

Iñigo Aranbarriri

Hizlandia egitera jolastuko naiz gaur, kazetetako hutsak agerian jartzera.

Azken Aizu! hartu, eta elkarrizketa txiki bat Jose Luis Mendilibar Eibar taldeko entrenatzailearekin (elkarrizketa luzea Agurtzane Ormatza sexologoari egin diote, eta mamitsua atera zaie zinez). Gatozen Mendilibarrengana ordea.

Hasieran bere fitxa: "Zaldibian jaioa (1961)". Zaldibar esan nahiko zuen, ezta?, pentsatzen du batek berehala. Barkabera jarriz gero, errata dela pentsatzen duzu ondoren. Gaizto jarriz gero, berriz, goierritarroi euskal gauzetan leporatu ohi diguten inperialismo zabar hori ote dagoen. Bada hirugarren aukera bat: deskuidoan Zaldibian jaioa izatea, nahiz gero handik alde egin.

Elkarrizketa barruan, baina, desegin egiten dira posibilitate horiek guztiak: Mendilibarrek berak dio gaztetan pilotan ibiltzen zela, eta birritan atera zela Bizkaiko herri artekoan txapeldun, Zaldibiarekin. Bizkaiko herri artekoan Zaldibiarekin! Erratarik ez, deskuidoko jaiotzarik ez, eta goierritarren inperialismorik ere ez. Kazetariak ez daki Zaldibar existitzen denik ere, eta Zaldibia berriz oso toki euskaldun eta exotikoa irudituko zaio, Mendilibar bezala mendebaldeko euskaraz primeran mintzatzen den tipo bat pilotan aritzeko modukoa.

Aizu! euskara-ikasleentzako aldizkaria da, baina, baten batek aspaldi esan zuen bezala, euskara gutxi daki euskara besterik ez dakienak.

etiketak: Saski Naski
Gari
Gari dio:
2005/02/14 12:17

Sarean ere badago artikulua, hemen

iturri
iturri dio:
2005/02/14 17:53

Kaixo Mendiguren:

Tipoa Zaldibarren jaio zen. Hori irakurri nuen noizbait.

Oker ez banago, bertakoa da ere Ignacio Gallo, Gipuzkoako Poliklinikako gerentea-edo izandakoa eta Realeko presidentetzerako kandidatoa izandakoa 2001 urtean.

Garai hartan aurpegiratu zioten Gallori bizkaitarra zela. Betikoa. Orain ez dakit aurkeztuko ote den.

Zaldibarren ba omen dago Realarekiko zaletasuna. Mendilibar, inkluso, realista omen zen gaztetan, nahiz eta gero karrera Athletic-en egin.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Xabier Mendiguren Elizegi

Xabier Mendiguren Elizegi dut izena. Beasainen jaio nintzen, 1964an. Filologoa naiz formazioz, editorea ofizioz, irakurlea afizioz, idazlea bokazioz, berritsua bizioz, euskalduna bedeinkazioz edo madarikazioz. Lagunen eskariei ezetz esaten jakin ez eta blog honetan idazten hasi naizenez gero, ea gauza naizen, egunen harian, nire giza kondizio horien inguruan bururatzen zaizkidanak kontatzeko.