Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Nire uste harroan / Oroitzen zaitudanean, ama

Oroitzen zaitudanean, ama

Xabier Mendiguren 2004/12/14 09:43

Atzo Santa Luzia eguna, jostunen zaindaria, urteko egun bakarra gure ama beste andrazko batzuekin afaltzera bere kasa ateratzen dena. Bista nekatuago, urteak ere bai, eta orain ez du horrenbeste josten, bilobentzako gauzatxoren batzuk gehienez.

Aurreko batean emakume gazte bat neukan gogoan, bufanda bat egiten ari zena, eta amarekin gogoratu nintzen. Zehazki, nola batzuetan, berak artilea bola batean txukun biltzeko nik laguntzen nion, bi eskuen artean hariari harro baina suelto eutsiz eta pixkanaka askatuz. Binaka egiten diren lanek ematen duten betetasun hori zeukan ekintza isil, eguneroko, xume hark.

Beste oroitzapen maite bat etorri zitzaidan aurrekoaren eskutik, amari maindireak tolesten laguntzen nionekoa: bakoitzak bi punta helduta, haiek elkartu, tenk egin arte zabaldu, eta berriz ere bi punta batu; eta azkenean, izara zabalean bildu eta gero luzean ere biltzeko, ama eta biok elkartu egingo ginen, nork bere puntak bestearenekin batzeko. Ez dut uste ondo azaltzen asmatu dudanik, baina lan horretan aritu dena berehala oroituko da.

Eta nostalgiaren erasopean segi nezakeen arren, hor uzten zaituztet, nor bere etxeko sukaldeko oroitzapenekin.

etiketak:
P. Gaztelumendi
P. Gaztelumendi dio:
2004/12/14 16:56

Ama gogoratzen duzue izarak batzen. Eta orain nork batzen dizkizue ba?

Nik oraindik izarak labadoran sartu, doblatu eta eskegi, lehortutakoan berriro batzen ditut. Amaren ordez, beste lagun batekin egin ohi dut ariketa bera.

Izarak batzea ez da sekula bukatzen, lo beti izara artean egiten dugu eta. Ez duzue ba, hori ere etxekoandrearen eskuetan utziko ezta, gizonok?

Ea ba. Gehiago harritu ez naid.

Patxi
Patxi dio:
2004/12/14 11:59

Primeran azaldu dexu, Xabier. Nik ere oso gogoan daukat izarena. Eta nola josteko makinaren gaineko estalkiarekin kaniketan jolasean ari nintzela, amak eskatu egiten zidan haria jostorratzaren begitik sartzeko.

Nostalgia gauza ederra da oso, baina dosis txikitan, egia.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Xabier Mendiguren Elizegi

Xabier Mendiguren Elizegi dut izena. Beasainen jaio nintzen, 1964an. Filologoa naiz formazioz, editorea ofizioz, irakurlea afizioz, idazlea bokazioz, berritsua bizioz, euskalduna bedeinkazioz edo madarikazioz. Lagunen eskariei ezetz esaten jakin ez eta blog honetan idazten hasi naizenez gero, ea gauza naizen, egunen harian, nire giza kondizio horien inguruan bururatzen zaizkidanak kontatzeko.