The Searchers edo zentauro aspergarri eta arrazistak
The Searchers.
Zinearen historian John Ford-en western bikainena dela irakurria dut, eta Top zerrenda askotan ere bai. The Searchers, edo, gaztelaniaz zabaldu zen bezala, Centauros del Desierto. Kritikarien puntuazioetan ere, 100 puntutik gertu hemen.
Baina ikusi gabe neukan eta Joxe Aranzabal xaxatu nuen, zinearen historiako ale aukeratuak euskaratzen ari denez, hau ere euskaratu zezan. Ez dakit zer pentsatzen duen filmaz Joxek, baina nik, ikusi eta gero, dezepzio handia jaso dut eta damutzen naiz Joxe bultzatu izana hau euskaratzera.
The Searchers iruditu zait filma arrazista eta txar bat. Doinu ideologikoa garaiarekin lotu daiteke, eta hortaz, horren gainetik igaro gintezkeen, baina kasu honetan filman ezerk gutxik zuritzen du bekatua. Istorioa jauzi logiko absurdoz betea dago, eta ildo arrazista da, azken batean, zentzu pixkat ematen duen hari bakarra.
Tira, western-aren urrezko garaiko film hobeak egon badaude, eta pare bat euskaratuta daudenak gomendatzearren, beste bat zuzendari berarena eta John Wayne ere agertzen dena: Liberty Valance tirokatu zuen gizona. hau ere Joxe Aranzabalek itzulia.
Bestea, 1940ko The Westerner, Gary Cooper antologiko batekin.
Bestalde, zuk hor nabaritu duzun arrazismo hori western askotan ikusiko duzu, nahiz eta ez hain agerian beharbada. "Butch Cassidy and the Sundance Kid":http://azpitituluak.com/euskaraz/1488529351 filmean, esate baterako, lapur iparamerikarrak ezinago guapoak eta argiak dira; Boliviakoak, aldiz, ezinago itsusiak eta ezinago lerdoak. Hori ere arrazismo era bat da, sotilagoa den arren.