Steve Jobsen benetako ume gipuzkoarrak
Ez nieke erreportaia honetan agertzen direnei (tartean apreziatzen ditudan lagunak) edo artikuluaren inspiratzaileari (Iñigo Kortabitarte, suposatzen dut) kontra egin nahi, baina Steve Jobs-en benetako lehen ume gipuzkoarrak 1980ko hamarkadaren 2. amaieran hasi ziren ernaltzen. Joxe Aranzabal izan zen bataioaren aita-pontekoa, Arrasaten, eta hornitzaile nagusia, oker ez banago, Gros auzoan zegoen Raxon informatika-denda izan zen. Autoediziorako Mac eta inprimagailuak ziren Apple-ren orduko produktu izarrak, eta softwarearen aldetik beste etxe batzuen ekarpenak, hala nola Aldus Freehand edo QuarkXPress bezalako programak. Baita Microsoft Word ere, orduko Windowseko testun editoreak baino txukunagoa baitzen MSren produktu hura, Mac-etan interfaze iraultzaile bat zeukana!
Ume haiek izan ziren euskarazko herrietako aldizkariak, eta Arrasate Press izan zen haietan lehena.
Bai, badakit, erreportaia zehatz hori ez da horrenbeste Apple produktuen inguruko ezer, baina, tira, #esanbeharnuen eta barkatuko didazue. Ze Gipuzkoa iristen da Zarauzko peajetik haratago ere. Eta bai, euskaraz funtzionatu izan duen ekintzailetza teknologiko eta komunikatiboaren historia bat ere esistitzen da.
Mila esker Luistxo zure iradokizunagatik asteburu honetan argitaratutakoari buruz. Dena den erreportaiaren helburua ez zen hainbeste Apple produktuen erabileran nor izan zen aintzindari Gipuzkoan azpimarratzea, baizik eta inguruan ditugun zenbait ekintzaileen lanari prestigioa eman. Ekainean diariovasco.com sarien banaketa aprobetxatuz antolatu genuen "baikortasun digitala" ekimenarekin batera, edo eta Klik eta Klik egitasmo pedagogikoaren barruan 14 eta 15 urteko gazteekin izaera ekintzailea bultzatzeko jorratzen ditugun edukiekin batera, erreportaia ekimen multzo baten zati bat baino ez da norabide horretan. Tira, ea guztion artean lortzen dugun :)
Besarkada bat eta eskerrik asko berriz ere.