Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Ingelesen hilerria / Ereserki duin bat

Ereserki duin bat

Luistxo Fernandez 2007/09/20 17:48
Kantu bat blogera atera du Amatiñok, eta lehengoan Euskadi Irratian abesten ere ausartu ei zen: Jeiki jeiki, etxekoak... Kantu honen inguruan Xabier Mendigurenek zerbait komentatuko zuela uste nuen, baina bera lotsatiagoa denez, nik esango dut haren partez. Kontua da, Mendigreen lagunaren iritziz edo, Euskal Errepublika independiente batean, himno ofiziala bihurtzeko hau baino kantu hoberik ez legokeela: ez Gora ta Gora, ez Eusko Gudariak, ez Gernikako Arbola. Eskoziarrek eta, rugby partiduetan denak kantuan hasten diren ereserki horietako baten tankera duela honek, doinu epiko bat. Ados nago berarekin.



Aste honetan kamiseta showa Espainiako Kongresuan. PPkoak ere igo zuen Espainiako selekzioaren gorria. Kamisetena barik, himnoena izan balitz auzia? Txunta-txuntaren ondoan Gora-ta-gora ere ondo gera zitekeen konparazioan, baina zer esanik ez Jeiki-jeiki, Kongresuko mikrofonoetatik...

etiketak: ,
zubiartea
zubiartea dio:
2007/09/22 14:29
  1. urtea izango zen eta Euskal Autonomia Erkidegorako ereserki ofiziala aukeratzeko lanetan zebilen Garaikoetxea lehendakaria. Gogoratu Ramon Labaien zela Kultura sailburu eta Juanjo Pujana Legebiltzarburu. Eztabaida piztu zen EAJren baitan eta baita Jaurlaritzako kideen artean ere: batzuk, Alderdiaren eta aita Sabinoren fidelenak, "Gora eta gora" izan behar zuela, duda izpirik gabe; bestetzuk, "Gernikako Arbola", karlista kutsukoa izan arren, APtik hasi eta EEraino gainerako talde guztiek onartuko zutela-eta, adostasun zabalaren bila; oraindik beste batzuk, doinu epiko eta ereserkitarako ezin egokiagoa zatekeen "Jeiki jeiki" zaharraren bidez erdibidea ata adostasuna aurkitu nahirik.
    Adituek (Labaienek bera, noski, baina baita Pujanak eta beste zenbaitek ere) iritzia eman zuten eta ahalik eta iritzi gehien jasotze aldera, kasete-zinta bat grabatu zuen Ertzaintzako musika-banda sortu berriak, hiru doinuekin: Gora eta gora, Gernikako Arbola eta Jeiki-jeiki. Zinta hori etxean dut.
    Jakina denez, azkenean Legebiltzarrak, Jaurlaritzaren proposamenez, "Gora eta gora" izendatu zuen Euskadiko ereserki, 3/1983 Legearen bitartez, hori bai, letrarik gabe.
    Bukatzeko gogoratu  "Jeiki-jeiki" doinuak baduela, letra tradizionalaz gain, Sabin Aranak egindako beste bat:
    "Jeiki, jeiki euskotarrak
    Laster dator eguna.
    Sorkaldetik agiri da
    Argi gozo biguna
    Bere aurrian bildurtuta
    Igesi doa illuna.

    Jeiki, jeiki euskotarrak
    Eta batu gaitezen!
    JEL-argia alde orotan
    Hasi zaigu zabaltzen,
    Ekin bai beti gau ta egun
    Bihotz danak berotzen."
    Azkenik, apunte bat: Bizkaiko zenbat lekutan "Jagi-Jagi" esaten eta kantatzen izan da abesti hau. Zerikusirik bai ote "Jagi-jagi" talde politiko erradikalarekin?
xabi
xabi dio:
2010/01/09 13:51

Nik ere ez dut ezagutzen "jeiki jeiki euskotarrak" kanta. Entzun nahiko nuke. Eta ahal balitz bi letrekin; orijinalarekin eta Sabinorenarekin. Eta proposamen bat: ez litzateke txarra izango hainbat kanta (hautagaiak) web orri hontan bertan entzun ahal izatea.

Eskerrik asko gai hau eztabaidan jartzeagatik. Nahiz eta Euskal Herrian badauden aurretiko lanak, gai hau jorratzea ere garrantzitsua da.

Anjel
Anjel dio:
2007/09/25 13:41

Ederra! Mendiguren, halako batean, "Mendigreen" bilakaturik! Txaloak aurkikunde ekologista eta kosmopolitari…

Mikel
Mikel dio:
2007/09/21 14:40

Nik ez dut Jeiki-jeiki hori ezagutzen. Mp3rik edo al dago nonbaiten jarrita entzun dezagun?

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Luistxo Fernandez

Lan egiten dut CodeSyntaxen, Sustatun ere dexente editatzen dut. Eibarren jaioa naiz (1966) eta Donostian bizi naiz. Twitterren @Luistxo naiz. Azpìtituluak.com proiektuan ere banabil, eta niren kontsumo kulturala zertifikatzeko. Gainera, blog honek erdarazko bi bertsio ditu:

The English Cemetery

El cementerio de los ingleses

Nire kontsumo kulturala: 2012/13 | Zinea | Telebista | Artea | Liburuak | Antzerkia | Musika

Hemengo edukien lizentzia: Creative Commons by-sa.

E-postaz harpidetu: hemendik.