Donosti? :-(
Luistxo Fernandez
2011/05/07 11:11
Amorrua eman dit Donostiako Turismo Bulegoak martxan jarritako azken kanpainak. Donosti, smiling city. :-D
Ze kalitate kontrol (komunikazio enpresarena edo enkargatzaile publikoarena) gainditu du gure hiriaren izena gaizki idatzita dakarren lema horrek?
Ez da irudia bakarrik... Kamisetak ere inprimatu dira. Auskalo zenbat, gure hiriaren izen okerra zabaltzen lagunduko dutena. Berandu da. Baina, kalitate deskontrola non egon den jakitea ondo legoke, hurrengoan ez dadin berriro gertatu.
Turismo Patronatuarekin Internet bidez saiatu nintzen honetaz ohartarazte, kasurik ere ez. Euskara Patronatuarekin saiatu nintzen, eta uste nuen hauek ere kasurik ez zidatela egin, ze gaur honekin egin dut topo, aurten berriro lema eta irudi berdinarekin kanpaina. LOTSAGARRIA. Euskara Patronatura deitu dut nire protesta azaltzeko eta, hara!, jakinaren gainean zeuden, konturatuta iazko akatsaz, eta nonbait jakinarazi zuten Udal barruan Donosti hori okerra zela. Telefonoa hartu didan Patronatuko langilea ni bezain harritua zegoen akatsa errepikatu dela ikusita. Turismo Patronatua inutilen esku dagoela ondorioztatu beste erremediorik ez dut.