Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Ingelesen hilerria / Darfurko haur euskalduna

Darfurko haur euskalduna

Luistxo Fernandez 2007/09/04 09:38
Aiherran, Nafarroa Beherean, bizi diren lagun batzuk dira Eñaut eta Patrizia. Hiru seme-alaba dituzte, baina beste bat adoptatuko dute laster, Darfurkoa. Gutuna zabaldu dute lagunen artean.

Darfurreko haur bat Otamendian

Gutun honen bidez, hartu dugun erabaki baten berri eman nahi dizuegu, eta zuen laguntza eskatu ere.

Aste batzuen buruan, Darfurreko haur umezurtz bat hartuko dugu gure familian : Otamendian 5etik 6 izatera pasako gara.

L'Arche de Zoe gobernuz kanpoko erakundeak Darfurretik 10 000 haur umezurtz ateratzea erabaki du, han ez baitute bizitzeko esperantzarik, azken urteetan bizi duten gerlarengatik. 1 000 haur Frantziako estatura ekarri nahi dituzte, 250 inguru lehen operazio honetan.

Horra zenbait datu, Nazio Batuen bilanetatik hartuak : azken lau urteetan 2 000 000 jende desplazatuak izan dira Darfurren (Sudan), 1 195 hiri edo herri osoki suntsituak, 200 000 pertsona bederen hil dira, eta orotara gatazka horrek 4 000 000 pertsonei eragiten die.

Ondorioz, Lapurdi eta Baxe Nafarroako 5 familia engaiatu gara Darfurreko haur umezurtz bat hartzera, 5 urte petikoa. Arche de Zoe erakundeak eginen duen operazio horren finantzatzeko, familia bakoitzak 1 400 euro ordaindu dugu. Baina azken berrien arabera, dirua eskas da.

Bestalde, haurrak etxean hartuko dituzten familiak kolektibo batean antolatu gara, hainbat arazori aurre egiteko : prozedura administratiboak, abokaten gastuak, osasun gastuak, eta abar. Kolektibo hori COFOD deitzen da (Collectif des Familles pour les Orphelins du Darfour), eta haurrak etorri bezain laster COFODek ditu gauza guziak kudeatuko, Arche de Zoe-ren betebeharra haurrak ekartzera mugatzen baita. COFODek dirua behar du bere beharrei aurre egiteko.

Ulertu duzuen bezala, zuei zuzentzen gara, gure erabakiaz informatzeaz gain, diru-laguntza eskatzeko. Diru-laguntza COFODen izenean egin behar da. Zuen jestuaren eskertzeko, karta postal batzuk inprimatu ditugu, eta berantago emanen dizkizuegu.

Milesker zuen arretarengatik. Milesker ere mezu hau zuen inguruan ahal bezain zabal hedatzeagatik.
etiketak: ,
Luistxo
Luistxo dio:
2007/11/06 13:21

Txadeko kontu ilun hori gertatu baino lehenago, pare bat egun lehenago, berriz idatzi ziguten lagun hauek:

Iraila hastapenean idatzi genizuen, gure etxean Darfurreko haur umezurtz bat hartzeko proiektua azalduz, eta laguntza eskatuz. Arche de Zoe erakundeak 250 haur inguru ekarri nahi zituen frantziako estatura lehen operazio batean. Operazio hori bihar bururatuko da, dena ongi baldin badoa. 100 bat haur umezurtz baizik ekartzea ez dute lortu, hainbat arazo direla medio. Hala ere Arche de Zoek Darfurren bildu dituen eta ekarri ahal izan ez dituen hainbat haur han artatzeko konpromisoa hartu du, bederen 2 urtez.

Gaur jakin dugu gure etxera ez dela haurrik etorriko ; eskaera egin zuten familia anitz kasu hortan dira, Euskal Herriko familia guziek ukan dugu berri hori.

Gure abentura hortan gelditzen da, beraz. Hala ere kontent gira egin ahalak egiteagatik haur umezurtz horien laguntzeko. Adi egonen gara Darfurreko egoerari...

Laguntza eskaini diguten guziak eskertu nahi ditugu, haien berotasunak eta sustengua beharrezkoak izan ditugu hilabete hauetan.

Ainitzek diruz lagundu nahi izan dute operazio hori. Bada ez bada ere, eman diguzuen dirua ez dugu oraino igorri, segur izan nahi ginuen ongi pasatzen zela. Beraz dirua itzultzeko prest gara. Zuekin harremanetan sartuko gara hortarako.

Hau idatzi eta gutxira, Txadekoa. Eta hortik datozen informazioak: ez direla umezurtzak, Gobernuen jarrera indignatu eta irmoa (ordura arte isilik zeudenak), eta susmoak laguntza eman nahi zuten familia batzuen gainean: kolonialismo eta bahiketa asmoetatik ezin urrunago dauden familia batzuk.

luistxo
luistxo dio:
2007/11/21 10:43

Beste gutun bat gute lagunengandik. Bertsio mediatiko eta ofizialetatik urrun, Txaden gertatu denaz guraso euskaldun hauek pentsatzen dutena.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Luistxo Fernandez

Lan egiten dut CodeSyntaxen, Sustatun ere dexente editatzen dut. Eibarren jaioa naiz (1966) eta Donostian bizi naiz. Twitterren @Luistxo naiz. Azpìtituluak.com proiektuan ere banabil, eta niren kontsumo kulturala zertifikatzeko. Gainera, blog honek erdarazko bi bertsio ditu:

The English Cemetery

El cementerio de los ingleses

Nire kontsumo kulturala: 2012/13 | Zinea | Telebista | Artea | Liburuak | Antzerkia | Musika

Hemengo edukien lizentzia: Creative Commons by-sa.

E-postaz harpidetu: hemendik.