Fernando Pessoa eta Interneteko txakurra: troll bat sartu da Sustatun
Troll bat sartu da Sustatura, Iban Zaldua eta Xabier Mendigurenen artean adostu/idatzitako liburu promozio baten harira, jendea molestatzera. Fernando Pessoa ezizena erabili du. Nik erantzun egin nion, honela:
Ba idatzi zuk gustuko dituzun liburuen berri, eta "Zeuk idatzi" aukeran klikatu.
Interneteko txakurrarena badakizu, ezta? fernando pessoa ezizenarekin sinatzen zuen txakur bat bazegoen, eta bere lagun txakur bati esan zion behin etxean:
- Interneten inork ez daki txakurra naizela eta Pintto dela nire benetako izena.
Eta beste txakurrak erantzun zion:
- Baina denek dakite tontoa zarela.
***************************
Interneteko txakurrarena ez da nik asmatua, noski. The New Yorker aldizkarian azaldu zen Interneteko prehistorian, 1993an. Mezu honekin pegatu dut irudia.
Pessoa delakoak bere kexuetan esaten den guztia kaka besterik ez da: totxoak idazten direla, Interneteko copypastearen kalitatea, anonimotasunaren inguruko filosofaldiak, errespetuaren arauena. Dena gezurra, dena kaka. Zera da asunto honen egia, benetako koxka: troll bat da hori. Troll bat da Interneteko foro edo halakoren batean "joditzeko" helburuarekin sartzen den bat. Batzuetan, sartzeko unean forma konstruktiboak erakusten ditu, baina bere asmoa suntsitzea da. Kasu honean troll-aren helburua da:
- Sustatu bera eta han jendeak egiten dituen aportazioak zapuztea
- edo, beharbada, Elkarren liburu promozioa eragoztea Sustatun
Baina helbururako jomuga taktikoa ez da Sustatu. Jomuga dira Iban Zaldua edo Xabier Mendiguren. Taktika da lagun horiek akojonatzea, horiek beldurtzea ez daitezen ausartu erreseina edo totxo gehiago bidaltzen. Hau ere oso teknologikoa da, oso Internetekoa: FUD taktika esaten zaio. FUD = Fear, Uncertainty, and Doubt.
Fear: Zaldua edo Mendiguren kikildu.
Uncertainty: argudio guztiak (totxoak, copypastearen kalitatea eta filosofia...) despisterako gezurrak besterik ez dira.
Doubt: anonimoarekin berriketan, nor ote? ezagutzen ote dut?
Errespetuarena, jakina, pertsonei aplikatzen ahal zaie. Fernando Pessoa ez da pertsona bat, ex-pertsona bat da, Monty Pythonen loroa baino hilago dago. Pintto txakurra da. Eta troll bat troll bat da.
Ez zait gustatzen halakoetan polemizatzen ibiltzea, baina kontua nahikoa pertsonala bihurtu denez, eta, Luistxok ondo asmatu bezala, pixka bat kikildu ninduenez Fernando Pessoaren erantzunak, hementxe esateko ditudanak. a) Eskerrak harreman pertsonala dugun, ohar horren egileak eta biok. Falta da zehazteko adiskidantzakoa ote den, edo bestelakoa. Nik behintzat, haren mezuak irakurrita, ez dakit. b) Kontua Xabier Mendigurenek kontatu bezala izan zen: nik hari testua pasatu, Word-en, eta hark Sustatu-n zintzilikatu, horretarako egokia ikusten zuelako. Baina horretarako propio egindako testua zen, Sustatura (nire kabuz edo beste norbaiten bitartez) bidaltzen ditudan guztiak bezalaxe: aurreko egunean egindako aurkezpenean oinarritu banintzen ere, ez zen testu berbera; gauza batzuk gehiago (eta batzuk gutxiago) baitzituen. Alderantziz ere egin dut: testu bat Sustatura bidali, gero ikusi egokia izango litzatekeela paperean argitaratzeko (adb. Ostiela!-n), berrikusi, gauza batzuk gehitu, beste batzuk kendu, eta han argitaratu. Irakurle batzuk berdinak izango dira, eta horientzat ez du akaso interesik izango, baina beste batzuk, ziurrenik, ez dira berdinak izango. Eta agian haiek interesa izango dute eta guzti... c) Luzeak ateratzen zaizkit gauza hauek, badakit. Sakontasun minimo bat lortze aldera, beharrezkoa iruditzen zait, batzuetan. Txapa bat? Akaso. Irakurleak erabaki beharko du irakurriko dituen ala ez, ezta? d) Nire ohitura hau da, bestalde: testu bat Sustaturako idazten edo apailatzen dudanean, testu-prozesatzaile batean egiten dut beti. Eta gero, amaitu ondoren, hor itsasten dut. Segurtasunagatik egiten dut hori. Horren txarra al da? Besterik gabe, eta Luistxori animoak emanez, agur.