Zortzi urte kalez kale putz egiten
Beste batzuk futbolean aritzen diren bezala, nire gaztetako hobbia fanfarre batean jotzea izan da, eta izaten jarraitzen du, oraindik ere. Askori jarduera baldar samarra iruditzen bazaio ere, beti aldarrikatu dut txarangako kide izateak asko aberastu nauela.
Txarangan ezagutu ditut Euskal Herriko jai mordo bat, eta txarangan ikasi dut gaupasa egiten, edaten, poteatzen, afariak noiznahi egiten... eta bertan ikasi dut estatutuak idazten, aktak jasotzen, fakturak egiten, bezeroekin negoziatzen, diru-kontuak egiten, artxiboak kudeatzen, pregoi bat egiten, prentsa oharrak idazten, giza-taldeak kudeatzen, jaiak antolatzen... gazte talde autogestinatu bateko kide aktibo izateak izugarrizko esperientzia ematen duelakoan nago. Esango nuke partaidetza honek lanerako prestatu nauela.
Eta aurretik 7 urtez egindako oinarrizko musika eta saxofoi ikasketek zentzua izan dute txarangari esker. Ustekabe ikasketa horien ondorengo zubi bat da duela 9 urte 16 gazte kementsuk taldea sortu zutenetik, eta datorren urtean X. urteurrena iritsiko zaio. Biba!
Idazkariaren anekdota
Irakasle batek askotan esaten zidan horrelako gauzetan denbora larregi galtzen nuela. Irakasle hark puntu erdi eskeini zuen galdera bat erantzuten zuenarantzat. Bilera historiko bat aipatu zuen, eta bilera horren idazkaria nor zen esan ondoren, horrek zein garrantzia zuen galdetu zuen. Nire harridurarako, inork ez zuen erantzun, eta nik erantzun nion: idazkariak aktak idazten dituelako. Lotsagarria iruditu zitzaidan nire ikaskideek hori ez jakitzea. Irakasleak galdetu zidan ea zergatik nekien nik hori, eta orduan konturatu nintzen: "txarangako Estatutuetan hala jasoa daukagulako". Amorru eman zion, baina isildu behar.
Zorionak Josu eta Ustekabe osatzen duzuen guztioi. Horrelako ekimenak eta lan eta ondo pasatzeko gogoa da aurrera egiteko benetan behar dena. Azkenaldian bati baino gehiagori komentatu izan diodan moduan "geuk ez badugu egitek, inork ez du egingo gugatik". Eta hori afizio "minoritario" orori aplika dakioke: nire kasuan bezala xakeari, eta baita fanfarre baten jotzea, jendea "mobilizatzen" eta "mugitzen" hastea. Zuek bezalako jendea behar dugu !