Poeten uharan 2
I
Maite nau, bai-ez
Maite nuela nekien
azken petaloaren aurretik
nire baitan dirau maitasunak
ez da inola oroitzapena
maite dudala dakit
ez da margarita-jolasa
Ipurtargi
Ez gara jaio ipurtargi izateko
ameslari egiten gaitu ilargiak
bizimin gara eguzki epelean
baina ipurtargi izaten ikasi behar genuke
kaleko argiek itsutzen gaituztenean
argi izpi bat izan dezagun jarraitzeko.
Esperantzaz
Esperantzaz elikatzen gara
abioi arrasto zuria ezabatzean.
Bortitzak
Eskuburdinak jarri zizkiguten
pilotari egin ginenean
hankak lotu zizkiguten
bidean jarri ginenean
begiak estali zizkiguten
itsu bihurtu nahian
ezpainak josi zizkiguten
mututu gintezen edo
lobotomizatu nahi izan gintuzten
amets egiten genuelako.
Orain
bortitzat
salatzen gaituzte
Marea gora
Olatua-harkaitza
natura lehian
nor-nork
berritzearen dialektika
zer-zerk
aldaketen borroka.
Likin
Aingira atzaparretan bezala
labaintzen zaizkigu urtaroak
bizitza
esku likinak ohi dira sarri
arrantzaren arrasto bakarrak.
Utopia
Zer naizen ere ia ez dakit
besteek dute naizenaren azken hitza,
ibilian nabil tairik gabe
okupatu gabeko aulkirik ba ote,
ez dakidan norako ate bila diraut
giltza beste batek daukala jakinik,
eguzkia dut amets
ekaitz beltzeko lainopean.
Utopia besterik ez da
patrikan geratzen zaidana.
Itsu
Gorpua da Justizia
hilotzak epaileak
begiak jan dizkiete putreek
bihotza otsoek
garuna harrek
Gizaki maspildua ekarri zioten
baina kodigoaz urkatu zuten
Gu
Eskutik heldu zintudan
eriak korapilatu zenizkidan
geroztik
ez nik ez zuk
ez nire ez zure eskuek
guk, gureek baizik
eragiten diraute arraunari
nora bereko batel bakarrean.
Zauriak
Kolpez kolpe
itxaropena
arrakalatu nahi izan digute
baina udaberri da geroa
bizipoza
loratu egin zaigu zauri bakoitza
Laguna
Ez nintzaion joan bila
hor zegoen
aukeratu egin nuen
kidetasunez
ez zitzaidan bila etorri
hor nengoen
onartu egin ninduen
hurbiltasunez
Mina da laguna
huts egiten ez duena
auzo izateaz harago.
Gaztaina
Nago gaztainondoa dela gizartea
mardula emankorra itzaltsua
gaztainak ginateke gizakiok
oskol zorrotzez babesten den fruitua
Trikuak ote garen ere banago
eztenez gotortuak gaztainak antzo,
baina errepidean zapaltzen gaituztenak.
Neguko bakardadea
Supazterrean dago katua
leinu gorrian lozorro
lagunartera doa gizakia
bizipoza ezten eta hauspo
hotza baita negua
hitsa bakardadea.
Nire bidexkak
Tren bat noiz pasako
zein bagoira igoko,
geza geratuko zaio bizinahia
oasirik gabe desertua
Nork bere erraila
bakoitzak bere oin-hotsa
norbere hegadan datza
ibilirako kemena
arnas bizigarria.
