Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Eibarko periferiatik

Mikel Larreategiren bloga

London 2. eguna: merkatuak elkarrizketak dira

Mikel Larreategi 2010/10/31 21:27
Hildako animaliak Boroughko merkatuan

Mikel Lizarraldek behin baino gehiagotan esan digu CodeSyntaxen merkatuak elkarrizketak direla. Londonera etorri aurretik batek baino gehiagok esan zidan bisitatzeko bertako merkatuak, murgiltzeko bere giroan eta kontatzeko ondoren. Han eta hemen begira ibili ostean batzuk begiz jo nituen: Borough, Camdem eta Covent Garden (bale, norbaitek esango du hirugarrena ez dela merkatu bat, baina beno, dena-delakoa).

Borough

Hyde Park udazkenean

Larunbat eguerdian egon nintzen Boroughko merkatuan. Kalean dago!! Eta hemen zenbat zalaparta Errebalen inguruan... En fin. Erabat turistifikatuta aurkitu nuen merkatua, hau da, turistaz beteta. Baina zerbait ikusi nion merkatuari. Badu horrelako toke arrunt bat. Hau da, jendearentzat eguneroko merkatua balitz moduan.

Jendea Camdemgo merkatuko txoko baten

Gure eguneroko erosketak egiteko erabiltzen dugun edozein merkaturen modukoa da zentzu baten, fruita dendak, arraindegiak, harategiak, ... baina horretaz gain beste hainbat gauza ere baditu, beste gauza batzuren artean Pierre Oteizak euskal txerriekin egindako txorizoak. Untxiak, ostrak, ostruka eta kanguro haragizko hanburgesak, kolore, zapore eta usan guztietako gazta eta mermeladak. Mmmmm, bazkaltzeko orduan hara bazoaz ezin irten ezer jan gabe...

Thames ibaiaren hegoaldean dago Borough, metro geltoki propioa ere badu, Borough, bertara agertu nahi baduzu.

Camdem Town Market

Covent Gardeneko sagarren merkatua

Iparralderago dago Camdem Town. Honek ere metro geltoki propioa du eta badirudi jendetza hurbitzen dela bertara, arratsaldean zehar ez baitu onartzen bidaiariak trenetara igotzea, trenetik jeisteko bakarrik balio du.

Atsedena hartzeko ordua, garagardo bat eta metroaren mapari begirada

Borough turistifikatuta aurkitu banuen, Camdemgo merkatua hamar aldiz gehiago. Hortik zehar irakurrita, ez dakit merkatu arraro bat espero nuen, eta zentzu batean arraroa bazen, oso leku estuak, kaiola edo kaseta batzutan sartutako postuak eta antzekoak ikusi ditut, baina guztia turistentzat guztiz prestatuta. Bazter guztietan "I (bihotza) London" erako kamisetak (badakizue, aurtengo udan toki guztietan saldu denaren modukoa) zeuden, turistentzako kamiseta, disko, mapa, erropa eta horrelako gauzak toki guztietan. Antiguetate eta modaz pasatako hainbat gauza ere bai eta jateko txinatarrak, indiarrak, japoniarrak, mexikarrak, argentinar bat, jatetxe kubatar bat ere ikusi dut!! Baina benetan "merkatu" esango geniokeen toki bat ez. Eta hori Borough bada, baina Camdem niretzat ez.

Covent Garden

Rosetta Harria British Musseumen

Hona bidean, aurreko metro geltokian jeitsi naiz eta, munduko mapa eta bidai-liburuen denda handienarekin egin dut topo: Stanfords. Tagzanoek asko disfrutatuko lukete bertan: mapa handiak, txikiak, zaharrak, bulegoko horma guztiak betetzeko bestekoak, Lonely Planet gida guztiak, ... Hiru pisuko denda, guztia mapa eta bidaietarako dedikatuta.

British Musseumeko xake-taula eta marmolezko piezak

Eta Covent Garden bera, ez dakit merkatua den ala ez, baina itxura badu. Plaza baten erdian dauden eraikin batzuen artean, tabernak, dendak, ikuskizunak, eta nola ez Starbucks bat. Ah, eta Apple Store izugarri bat ere bai. Atzo ez nuen kontatu, baina jendeari Mac-ak nola erabili erakusten zebiltzan eta Garage Band tutorial bat ematen ari ziren eta jendea apunteak hartzen!! Oso ondo montatuta dute. Mikel sartuko balitz pare bat ipad erosita lituzke onez gero :)

Camdemgoa turistentzat prest bazegoen, zer esan honi buruz. Hau guztiz komertzializatuta dago eta ez du merkatu itxurarik. Baina postu bat edo bestek eta eraikinak salbatzen dute, horregatik sartu dut zerrendan.

Picadilly Circus, atzean TDKren iragarkia duela

Eta elkarrizketena zergatik? Hiru tokietan era guztietako elkarrizketak ikusi ditudalako. Erosleak dendariekin, hauek euren artean, ... Hirikop biz

Egunaren gainontzekoaz zer esan? London ikaragarria dela. British Musseumera sartu naiz eta ikusi dudan lehenengo gauza, nahi gabe, Rosetta harria izan da. Hori izan omen zen egiptoarren hieroglifikoek ziotena ulertzeko erabili zuten harria, bertan hiru hizkuntzatan idatzitako testu bat baitago.

Buckingham Palace

Greziarren ondarearen zati handi bat, Partenoiko hainbat harri ere museo horretan dago. Hainbat tirabira izan omen dira Greziako gobernuarekin eta sartzeaz bat, panel baten, azalpenak ematen dituen testu bat aurkitu dut. Zein dotoreak diren ingeles hauek arrazoiak ematerakoan. Eurek gizateriaren ondarea jende arruntari (urtean sei milioi bisitari baino gehiago) 1817 urtetik doan erakusten ari direla diote, eta nahiz eta Partenoiko ondarea gutxi gora behera erdi eta erdi Atenas eta London artean banatuta egon, Europako beste hainbat museotan ere (Louvre, Vatikanoan, Copenhaguen edo Viennan esaterako) badaudela diote. Beste ohartxo bat ere badu panfletoak, Greziako Gobernuak ere Partenoitik harriak kendu eta Atenasko museo baten erakutsi omen ditu.

Kaleko argiak piztu eta zerukoak itzaltzen zeudela, Buckingham jauregira iritsi naiz. Hori bai errege-erreginak bizitzeko jauregia. Ez dago hitzik.

Hona hemen nire ibilaldien mapa eguneratua:

 

mikel map

Zein handia den London!

Mikel Larreategi 2010/10/30 23:44
Plone Konferentziaren ostean 2 egun eta erdi eman behar ditut Londonen. Ahaztuta nuen zein handia den
London Eye

Ez dakit noiz izan zen, 1997an edo izango zen. Izeba-osaba eta lehengusu-lehengusinekin (horiek bai blogaren jarraitzale finak), Londonen izan nintzen. Orduan kamara digitalik ez eta paperean egindako argazkiekin album bat egin nuen. Album bat !! En fin. Orduandik beti izan dut gogoa Londonera itzultzeko. Asko gustatu zitzaidan hiria. Handia, jende asko, jende mota ezberdin asko, erraz galtzeko modukoa. Horregatik idatziko nuen ziur aski Loreak malko artean.

Waterloo geltokia lehenengo planoan eta London atzean

Gauza da aurtengo Plone Konferentzia Bristolen izan dela, eta bidaia eta astelehena jai dela aprobetxatuz, asteburua Londonen emango dut! Eskerrik asko CodeSyntax bidaia patrozinatzeagatik. Eramango dizkizuet bonboi goxo batzuk!!

St. Paul's Cathedral Millenium bridge-tik

Noan harira. Ahaztuta nuen Londonen handitasuna. London Eye gailurretik begiratuta, bukatzen ez den gauza bat dela dirudi. Begiratzen duzun tokira begiratzen duzula etxeak eta parkeak ikusten dira. Eraikinak ere handiak dira, garaiak, itzalak. Jende kopurua ikaragarria. Arratsaldez Docklands Light Railway eta metroan ibili naiz eta bertan zebilen jende kopurua izugarria. Picadilly Circuseko Lillywhites denda gainezka zegoen, zer esanik ez Picadilly plaza bertako monumentua edo Regent Street. 

Bertako Apple Storeari egin diot bisita. Aste honetan Applez inguratuta egon naiz. Ploneren komunitateko gehienek/ok Applek egindako ordenagailuak darabiltzagu. Ez dakit zergatik den, baina konferentzian egon diren ordenagailuen %90tik gora MacBookak ziren (bere kolore guztietan, arruntak, zuriak, Pro, Pro berriak, iPadak...). Iphone eta Android telefonoak ere bai, azken hauek inoiz baino gehiago gainera.

Borough Marketen zegoen kartel bat. Londoni berari ere oso osorik aplika dakioke

Oxford Street ere gainezka, jendea dendetatik sartu eta irten. Ehunka, milaka lagun ikusi dut. Kolore guztietakoak, fraka motzetan eta begiak bakarrik bistan zituzten emakumeak ere bai. Txakurrik ez. Ondoan txakurrik zeraman inor ere ez dut ikusi. Pare bat eskale izan ezik.

Eta metroan zer esan. Gogoan nuena, hori ez da aldatu. Jende pila, bakoitza bere rollora eta gizartearen ispillua. Hori bai, jende asko eta asko ikusi dut iPhonea atera eta metroan bertan lineen egoera kontsultatzen. Adi egon, asteburuetan Londonera baldin bazatoz metroan lanean dabiltza eta geltoki, ibilbide edo linea oso batzuk itxita aurkitu ditzakezu. Etorri aurretik bisitatu Transport for London webgunea eta informatu, edo deskargatu zure telefonorako aplikazioa.

Gaur ikusi eta egindakoa, ibilbideka banatu eta Tagzanian kargatu dut. Gomendiorik baduzu edo Londondik zerbait ekartzea nahi baduzu, utzi erantzun bat, astelehen arratsaldera arte egongo naiz hemen.

 

 

mikel map

Hamabost egun Italian: hondartza, xakea eta historia

Mikel Larreategi 2010/09/02 22:55
Erroma, historia, Koliseoa, Vatikanoa, hondartza, Fermo, xakea, ... ederra oporraldia

Palatinoa

Apirilean Donostiako Nazioarteko Xake Txapelketa bukatu zenean komentatu zuen Jonek: zergatik ez dugu abuzturako txapelketa bat topatu eta bidai bat antolatzen? Baten eta bestean bila ibili ondoren Italiako herritxo baten txapelketa interesgarria topatu genuen. Porto San Giorgio zuen izena herriak izena eta txapelketaren 21 edizio antolatuta aurtengoa 22.a litzateke. Euren atzetik hainbat denboran ibili ostean eman ziguten albistea: aurtengoan txapelketa Fermon jokatuko zen (aldameneko herrian) I Festival Internazionale de Scacchi del Fermano izenarekin.

Esan eta egin, datak begiratu ostean, oporraldi majoa iruditu zitzaigun: txapelketa abuztuaren 21etik 29ra zen, eta aurretik egun batzuk Erroman pasatzea erabaki genuen. Behin joango Italiaraino eta nola ez genuen bada hiriburu historikoa bisitatuko?

Klubean komentatu eta beste 4 lagunek berehala eman zuten baiezkoa, asko pentsatu gabe. Beraz, Italiarako taldetxoa prest zegoen: Haritz, Asier, Edu, Julen, Jon eta neu.

Hegaldiak hartu, Erromako hotela gorde, Fermorako apartamentua alokatu aldameneko Porto Sant'Elpidio herrian eta azkenik kotxea alokatu. Abuztuaren 16a noiz iritsiko zain geratu ginen.

Abuztuaren 16tik 20ra: Erroma

Neu KoliseoanBooking.com webgunearen bidez Giorgina Hotela erreserbatu genuen. Prezioz ez zitzaigun garestia iruditu eta kokalekua bikaina, Termini tren geltokiaren ondoan. Berehala aurkitu genuen hotela eta gauez Koliseoa ikustera joan ginen pizza bat afaldu aurretik.

Hilaren 17an egunean monumentu zaharrenak ikusi genituen: Palatinoa eta Koliseoa barrutik eta zirkoa, eta baita inguruko beste hainbat harribitxi ere.

Hurrengoan Vatikanoraino joan, Kapera Sixtinoa, San Petri plaza eta basilika ikusi eta Erromako kaleetan barna, Navona plazatik Fontana di Treviraino joan ginen.

Gure Erromako azken egunean beste ibilaldi luze bat egin genuen, Espainiako plazara, Piazza del Popolora eta haren gaineko parke handi eta eder baten sekulako ibilaldia eguna amaitzeko.

Gure ibilaldiak errepikatu nahi badituzu, hona hemen egin genuenaren mapa:


Ver Roma - Abuztua 2010 en un mapa más grande

Abuztuaren 20tik 30era: Porto Sant'Elpidio eta Fermo

Bista Fermoko Katedraletik

Termini geltokian kotxea hartu eta autopistan zehar 2 ordu t'erdiko bidaia genuen aurretik Porto Sant'Elpidioraino. Bertan hartu baikenuen ostatu Fermon jokatuko zen txapelketara joateko (bi herrien artean 20 minutu daude kotxean). Gure nahia garbia zen: ostatu hartzeko herrian hondartza egon behar zen. Beraz Nazionale Residencen hartu genuen ostatu aurreko Porto San Giorgioko txapelketaren antolatzailearen ostatuan.

Egunean bertan egin genuen bisita Fermora txapelketaren jokalekua ikustera: Astoria Hotela. Hotela Fermoko hiri-erdian kokatuta dago plazatik gertu. Historia handiko herri gotortua da Fermo. Muino baten kokatuta, inguruko herri guztiak ederki ikusten dira bertatik eta itsasoa ere bertan, guztia ondo kontrolatuz. Gorengo puntuan, katedral zuri-zuria, eta kale eta etxeak harrizkoak, estuak eta politak.

Hilaren 21ean hasi zen txapelketa. Egun bakoitzean partida bat (ez da arrunta hori aurkitzea, gero eta normalagoa baita egunean partida bat baino gehiago jokatzen den txapelketak aurkitzea), berau 6 bat ordu ingurukoa gehien jota (ordu eta erdi 40 jokaldi egiteko eta ondoren beste ordu erdi betiere egindako jokaldi bakoitzeko minutu erdi gehituz). Lehenengo egunean berdindu egin nuen.

Eguneroko martxa berehala hartu genuen, goizean erosketak eta hondartza. Bazkaria goiz, partidak 15:00tan jokatzen baitziren, eta partiden ostean ilunabarreko bainutxoa eta partiden analisia, afaria, mus partida, afalondokoa eta gainontzekoak.

Xake taula

Bigarren egunean ere berdinketa lortu nuen eta ez negoen gustura nire jokoarekin. Gainera hirugarrenean galdu egin nuen. Baina horixe izan zen galdutako partida bakarra, jarraian beste bat irabazi, hurrengoa berdindu eta hiru jarraian irabazita azkenengo txandara 5.5 punturekin heldu nintzen. Kalkuluak egin eta sailkapeneko lehenengo 12en artean geratzeko aukerak nituela ikusi genuen. Azkenengo txandan partida berdindu egin nuen eta azkenean, sailkapeneko 12. postua lortu nuen. Ez dut uste sekula holako emaitza onik lortu dudanik txapelketa ireki baten. Bale, "B Txapelketa" zen (Nazioarteko Federakuntzaren zerrendan 1900 puntutik berakoentzakoa), baina emaitza ezinhobea izan zen.

Gainontzeko espediziokideen emaitzak denetarikoak izan ziren (beste guztiek A txapelketa jokatu zuten), Haritzek 5.5 puntu lortu zituen hasiera irregular baten ostean; Asierrek 4.5 puntu lortu zituen partida asko berdindu ostean. Eduk ederto hasi zuen txapelketa eta 5. txandan 3,5 puntu zituen. Hortxe hasi zen bere gainbehera gainontzeko partida guztiak galdu baitzituen. Jonek aurkako bidea egin zuen, gaizki hasi zen eta azkenean 4.5 puntu lortu zituen. Julenek Benasqueko Txapelketa eta Espainiakoaren ondorengo nekea nabaritu zuen (agian Eduk bezala) eta 3 punturekin amaitu zuen txapelketa.

Abuztuaren 30a: bueltako bidaia

Goizean goiz kotxea hartu eta 10:30tan Erromako aireportuan geunden. Hegazkina hartu eta Madrilen hainbat ordu eman behar genituen. Azkenean, behar zirenak baino gehiago Iberiari esker, behar baino 2 ordu gehiagoan egon baikinen Bilborako hegazkinaren zain.

Eta datorren urtean...

Esperientzia ezinhobea beraz etxetik kanpora oporretan xake txapelketa bat jokatzea. Eta ezinhobea ere hondartza ondoan genuelako. Datorren urterako hainbat proposamen ere bota ditugu, Kreta, Tromso edo Kopenage esaterako. Beste hainbat xakelari-bidaiarirekin komentatu beharko dugu. Animatzen zara? Gu prest gaude!

Argazkiak ikusi nahi badituzue, Flickr-era kargatu ditut batzuk, bai Erromakoak eta baita Fermokoak ere. Eibarko Klub Deportiboaren webgunean txapelketan zehar ateratako argazki guztiak argitaratu ditugu.

Open Street Mapeko mapak nire Garmin GPSan

Mikel Larreategi 2010/08/03 22:22
Orain dela pare bat hilabete GPSa aldatu nuen. Jatorrizko Supratech-a alde batera utzi eta Garmin etxeko aparatu bat erosi nuen.

Iazko abuztuko bidaia prestatzen ibili nintzenean, aurretik hackeatuta nuen nire GPSan TomTom-en mapa berriak sartzen saiatu nintzen. Ezinezkoa egin zitzaidan, orain jada mapak softwarearen bertsio berrirako egiten dituztela, software berria nire modeloan ez zebilela, aparatu berria erosi behar nuela... eta antzekoak irakurri nituen foroz foro ibili ostean.

Azkenean bidaia jatorrizko mapekin (nahiz eta errepideren bat markatuta ez egon) ondo joan zen eta hantxe gelditu zen GPSa kajoian, eguneroko bidaietan ez dut GPSaren beharrik izaten, askotan kotxea bakarrik ere joango litzateke-eta.

Hala ere, aurten ere GPSaren kontuari bueltak ematen hasi nintzen eta laneko adituei galdetu nien. Mikelek berehala eman zidan erantzuna: "erosi Garmin bat. OSMko mapak sar dakizkiokeenetako bat. Nüvi serieko hauek merkeak dira". Esan eta egin, Pixmariara sartu, aukeratu eta hiru edo lau egunetan etxean nuen. 

Lehenengo probak Garminen beraren mapekin izan ziren, eta dena ondo zebilela zirudien. Bigarren pausua, Mikelek aipatutakoa Open Street Mapeko mapak erabiltzea. OSMren wikian sartu eta pare bat artikulu interesgarri irakurrita berehala abiatu nintzen lanera.

Garminen mapen formatua ez da irekia, baina atzerako ingeniaritza erabiliz formatuaren inguruko datuak atera dituzte eta OSMren datuetatik abiatuz Garmin formatuko mapak sortzeko programa bat ere sortu dute, mkgmap

Beraz, edo mkgmap erabiliz mapak sortu edo jendeak sortzen dituenak erabili besterik ez da egin behar. Hona hemen mapa horiek deskargatzek helbide mordoxka bat, herrialdeka banatuta. Espainiakoak deskargatu nahi badituzu, Alternativas Libres webgunetik egin dezakezu, egunero eguneratzen dituzte eta Frantzia hegoaldeko datuak ere badaude bertan (beste webgune honetan Europako herrialde bakoitzeko mapak dituzue).

Baina gauza txar bat ere badu kontu guzti honek. Ezagutzen ez den arrazoiren bategatik ezin da kaleen bilaketa erabili OSMn oinarritutako mapak Garmin baten badarabiltzazu. Egia esan bilaketa egin daiteke, baina ezin da bilaketa hori gure bidaiaren helburu gisa erabili. Ederto, GPSa horretarako erabiltzen da eta bere oinarrizko erabilera ezin aprobetxatu.

Azkenean, leku baten eta bestean gauza asko irakurri ostean, Garminen MapSource programa erabiltzeko gomendioa irakurri nuen nonbait. Hori ez zen batere erraza izan, Garminen webgunetik MapSource-ren eguneraketa bakarrik deskargatu baitaiteke. Baina lasai, hori erraz konpondu daiteke-eta. Garminen webgunetik deskargatzen den fitxategia zuzenean exekutatu beharrean, deskonprimatu WinZIP edo antzeko beste programaren bat erabiliz. Behin hori eginda, deskonprimatutako karpetan dagoen Setup.exe fitxategia exekutatu eta instalazioa egin.

Horrekin lehenengo pausua prest. Orain MapSourcen mapak erabiltzea ahalbidetu behar dugu, horretarako gutxienez mapa legal bat izan behar dugu. Nahiz eta OSMkoak guztiz legalak izan, MapSourcen bere mapa bat instalatu behar dugu. Horretarako, Garminen beraren TrainingCenter programa instalatu dezakegu. Honekin oinarrizko mapa bat instalatuko dugu gure sisteman eta MapSourcek ondo funtzionatuko du.

Hori ere baldin badugu, mapak OSMtik MapSourcera pasatu behar ditugu. Horretarako erregistratu egin behar ditugu. Horretarako MapSetToolkit erabil dezakegu. Honek ondo funtzionatzeko, aurretik cGPSmapper instalatu behar dugu (dohaineko bertsioarekin nahikoa dugu) eta nahi badugu GMapTool ere bai. Behin programa horiek instalatuta ditugula, ireki MapSetToolkit, eta ezkerrean behean dauden aukerak erabiliz konfiguratu non dauden cGPSmapper eta GMapTool.

MapSetToolkit prest dugunean, deskargatu Garminerako OSMren mapa bat, Espainiako hauxe esaterako (aukera sinpleago bat ere badago, batzuk MapSourcerako prest dauden mapak ematen dituzte eta MapSetToolkit honetan inportatu bakarrik egin behar dira, adibidez Alternativas Libresek ematen du aukera hori), eta aukeratu Select IMG botoia. Hor aukeratu deskargatutako mapa dagoen karpeta. Ondoren aukeratu mapa eta sakatu Add, eskumako leihora pasa dadin. Behean Create MAPSET dioen tokian, aukeratu karpeta huts bat, horra idatziko ditu behar dituen fitxategiak, jarri izen bat (Mapset name), eta jarri zenbaki batzuk Family ID bat (edozein, adibidez 1234). Hori guzti hori egindakoan sakatu START botoia, eta mapak sortzen hasiko da. Sorketa bukatzen duenean, eskumako zerrendan elementu bat gehiago agertuko da, hor badago jada MapSourcen instalatuta edukiko dugu. 

Ireki MapSource eta goian ezkerraldean agertzen den laukian mapa aukeratzen utziko digu. Aukeratu kargatu berri dugun mapa eta pantailan agertuko da. Erabili "Mapa" tresna (Herramientas -> Mapa), egin zoom atzerantz, eta aukeratu mapa guztiak (MapSourcerako mapa osatzean, lehen deskargatutako mapa handia fitxategi txikiagoetan banatzen du MapSetToolkit programak, erabilgarriagoa izan dadin). Denak aukeratuta daudela aukeratu Transferir -> Enviar a dispositivo, eta aukeratu hor GPSko memoria txartela. Datuak GPSra pasatuko ditu fitxategi bakar bat sortuz. 

Eta zer lortu dugu pausu guzti hauekin? GPSaren "Puntos de interés" aukera erabiliz kaleak bilatu ahal izatea. Aukera hori erabiliz erraz-erraz bilatu ditzakegu OSMko mapetako kaleak GPSan.

Zorionak Maialen!

Mikel Larreategi 2009/12/13 22:47
Ez dut finala osorik jarraitzeko aukerarik izan. Goizean agurreko pare bat bertso eta kartzelako gaia. Arratsaldean oso-osorik.

Zorionak Maialeni txapela lortzeagatik. Gozada bat izan da zure bertsoak entzutea. Amets ere heldu da azken buruz-burukora. Orain lau urte atean geratu zen (4. Maialen 3.arekin berdinduta), eta gaurkoan lortu du goraino heltzea. 

Goizeko azken lanean, kartzelakoan, azken artikulua idazten dagoen kazetariaren paperean jarri dituzte bertsolariak. Hona hemen Ametsek bota dituen hiru perlak:

Hamasei urte ta Egunkarian
hasi nintzen bekario
Martxelok hantxe jarri ninduen
beste baten gregario
Gero Berrian saiatu nintzen
lan onaren ondorio
gero Argian serio
besten hitzaren jario
Berrogei urte pasatu ditut
berrogei kalendario
Orain lumari tintaren partez
malko pila bat dario

Reala igotzen ikusi nuen
ta ahaztu nituen penak
kontatu nitun lehen pausoak
herri palestinarrenak
Nola hogei urte iraun zituen
Evo gizon indigenak
Eta gure preso denak
zirela senideenak
Notizi on asko idatzi ditu
nere kazetari senak
baina oraindik gehiago dira
idatzi gabe daudenak

Hauxe dut nere azken eguna
askatu dut alkandora
Luma malkoen atzetik joan da
paper fin zurian gora
Eta gero prest maketarekin
hor daukat ordenadora
gaur egin behar dut froga
nere bizioa droga
idatz dezadan: "muga urtu da
Euskal Herria libro da"
Ez da egia baina egia
bihurtuko da gerora!

Eta Maialen. Zer esan honi buruz? Zorionik beroenak. Ez dago hitzik-eta. Hona hemen Txapeldunaren azken agurreko bertsoa:

Gogoratzen naiz lehengo amonen
zazpi gaineko gobaraz
Gogoratzen naiz lehengo amonaz
gaurko amaz ta alabaz
Joxei ta zuei mila zorion
miresmenaren zirraraz
ta amaituko dut txapel zati bat
zuek guztiontzat lagaz
Gure bidea ez da errexa
bete legez, juizioz, trabaz!
Euskal Herriko lau ertzetara
itzuliko gara gabaz
Eta hemen bildu dan indarraz
grinaz eta poz-taupadaz
herri hau sortzen segi dezagun
euskaratik ta euskaraz

 

Aupa Maialen!

Mikel Larreategi 2009/12/09 15:44
Gogoratzen dudan lehenengo bertsolari txapelketa nagusia 1989koa da. 8 urte besterik ez nituen baina etxeko irrati zaharra erabiliz grabatu zuen amak arratsaldeko saioa.

Jon Lopategik irabazi zuen txapelketa hartako hainbat bertso behin eta berriz entzun ditugu etxean, Andoni Egañak eta Xabier Euzkitzek zortziko txikian egindako batzuk adibidez, bata etxekoandrea eta bestea etxeko azulejoak jartzera etorritako langilea zirelako gaia emanda kantatutakoak.

Aurtengo Txapelketa Nagusiko saio batzuk jarraitzeko aukera izan dut, ez presentzialki, Internet bidez baizik, Info 7 Irratia eta Bertsoa.com atarietatik. Finalera gustura joango nintzateke, baina igande goizean zehar beste konpromiso bat dut eta tarteren baten irratiaren bidez jarraitu beharko dut.

Entzun ditudan saio apurretan Maialen Lujanbioren bi bertso aipatu nahiko nituzke, biak Bergaran jokatutako finalerdian kantatutakoak.

Lehenengoa kartzelako gaiari erantzunez bota zuen lehenengoa. Hauxe zen Bergarako kartzelako gaia: "argazkilaria zara, oraintxe iritsi zara gertakariaren lekura eta lanean hasteko prest zaude". Hona Maialenek bota zuen lehenengo bertsoa:

Irratiak zion kaleetan
zela jendetza demasa:
pankarta baten ostean oihuz
bete kale eta plaza.
Egoera da tentsoa eta
bazun iskanbila traza;
hemen norbere hitzari eusten
ere ez dago erraza.
Oraindik entzuten da oihartzuna
hori pelotazo jasa,
lurrean odol arrasto batzuk
ta tentsiozko arnasa
Kordoietik hara hona nabil
foto bila nere kasa,
baina kaskodun batek esan dit:
"hemen ez da ezer pasa"

Mikel Laboaren "Eguzkiak urtzen du goian" abestiaren doinua eta neurria erabiliz hiru bertso bordatu zituen Maialenek Bergaran.

Binakako lanean, Beñat Gaztelumendirekin ere lan ederra egin zuen, honako gai honekin: "Zuen semeak neska bat bortxatu eta hil zuen. Haren aurkako epaiketa gaur hasiko da eta oraintxe sartu zarete epaitegian". Hona Maialenek bota zuen azken bertsoa:

Ikasiko zun ordun kanpoan
zegon denbora apurrean;
Kontuak kontu neskaren ama
distantzia laburrean.
Eska dezaket errukia edo
belaunikatu lurrean;
baina 'barkatu' zein hitz hutsa den
heriotzaren aurrean.

Ea nork irabazten duen igandean BECen. Orain lau urte norbaitek kantatu zuen moduan BECtekada espero da bertan. Maialenek irabaztea ederra litzateke!

Audio-playerrak EuskalTubekoak dira eta jatorrizko audioa Koska Irratiarena da. Eskerrik asko!

Bost egun Normandian

Mikel Larreategi 2009/08/25 22:46
Uztailaren hasieran erabaki genuen norabait joan behar genuela. Normandia bisitatzeko gogoa genuen lagun bik. Beste hirugarren bat ere berehala apuntatu zen. Abuztuaren 19an joan eta 23an itzuli, 5 egun Normandian zehar.
Mont Saint Michel
Mont Saint Michel

Abuztuko lehenengo astean Sevillako Burguillos herrian izan nintzen Espainiako Bigarren Mailako Taldekako Xake Txapelketako II. Multzoko epaile nagusi gisa, horren astean, astebetez Eibarren, hara eta hona. Oporretako hirugarren eta azken astean etorri zen Normandiarako bidaia.

Ia antolaketa gabe, maleta eta argazki kamara kotxean sartu, bisitatu beharreko lekuen zirriborroa egin, GPSa Leireren ahotsarekin prestatu, iPodean mp3 batzuk sartu eta aurrera! Jokin eta Iñakirekin egindako zirriborroaren arabera, Mont Saint Michel izan zen lehenengo helburua.

Arratsaldean heldu ginen bertara eta jendetza izugarria zegoen. Mendia eta kontinentea lotzen dituen errepidea kotxez gainezka zegoen, inguruko zelaiak kotxe eta karabanaz josita eta itsasoa gorantz ari zen. Toki ikusgarri da, agian ez genion xarma berezirik igarri ez ginelako goizean goiz edo gauean berandu iritsi, edo ez genuelako eguzkia itsasoan sartzen ikusi, baina leku ederra zen. 

Beste pare bat orduko gidaldiaren ostean iritsi ginen Caenera, bertan hartu genuen-eta ostatu, hiri kanpoaldeko hotel baten.

Longues-Sur-Mer-eko bateriak
Longues-Sur-Mer-eko bateriak

Hotelean bertan, 4 €ko garagardo baten aurrean, prestatu genuen hurrengo eguneko txangoa.

Abuztuaren 20a: E-Eguneko hondartzak

Bayeuxko museoa eta E-Eguneko hondartzak, Arromanchestik hasi eta Utah-beach-eraino. Arromanches-era iristean itsasoa oraindik goian zegoen eta ezin izan genuen hondartza bere osotasunean ikusi, hau da, Londonen eraikitako portu artifizialaren hondakinak ez genituen osorik ikusi. Handik Longues-Sur-Merren dauden bateriak ikustera joan ginen. Han daude oraindik alemaniarrek aliatuen erasoaren aurka egiteko erabili zituzten bunker, begiraleku eta kainoi izugarriak. 

Handik Omaha Beach-era joan ginen. Amerikarrek horrela bataiatu zuten 8 kilometro inguruko hondartza eta hantxe egin zuten lehorreratze handiena. Han dago oraindik alemaniarren begiralekua, hondartza guztia puntatik puntara ederto ikusteko moduan. Baina hondartzaren gainean dago inguruko toki beldurgarriena: amerikarren Collevilleko hilerria. Bizkarrezurrean hotzikara bat sentitu nuen hango gurutze eta judutarren izarrak ikustean. Ia bukatu ezineko ikuspegia dago bertan, loreak nonahi, eta isiltasuna. Han dabilen oro hunkituta balego bezala barruraino iristen den isiltasuna. Izugarria.

Collevilleko amerikarren hilerria
Collevilleko amerikarren hilerria

Point-du-Hocetik pasatu ostean, Saint-Mere-Eglisera ere joan ginen, bertako kanpandorrean egon baitzen bi orduz paratxutista amerikar bat bere burua hilda zegoenarena egiten aurkariek eraso ez zezaten. Bertatik Utah beach-era joan ginen. Ordurako berandu zen eta errepide eta hondartza hutsik zeuden, lurrak jendea irentsi izan balu lez.

Abuztuaren 21a: Caen

Hondartzetan zehar ibili ostean, hurrengo egunean Caen bera bisitatzea izan genuen helburu. Lehenengo Gerraren Memorialeko Museoa, goiz guztia eman genuen bertan, gerraren aurrekari, gerra bera eta ondorengoak ikusi eta aztertzen: argazkiak, oroigarriak, mundua nola geratu zen, ...

Arratsaldean Caenen zehar ibili ginen: gaztelua, abadiak, portua eta kaleetan zehar ibilaldi luzea eginez.

Abuztuaren 22a: Cherbourg eta Redoutable itsaspekoa

Alemaniarren hilarriak
Alemaniarren hilarriak

Cherbourgera bidean Le Cambeko Alemaniarren hilerrian gelditu ginen. Amerikarrena izugarria bazen, alemaniarrena gehiago gustatu zitzaidan. Badirudi alemaniarren oroigarri txarrak besterik ez daudela Normandiako bazterretan, eta bertan dauden gurutzeak barruraino iritsi zitzaizkidan. Haritzen artean daude gurutze beltzak bertan. Jenderik ez zebilen eta isiltasuna aldameneko autobideko autoen zaratak bakarrik eteten zuen. Zirraragarria.

Cherbourgen zer ikusi ez genekien baina agian zorteak lagunduta, Cite de la Mer edo Itsasoaren Hirira jo genuen. Zer ikusiko eta Frantziako Armadak erabailitako Redoutable izeneko itsaspekoa ikusi genuen. Asko pentsatu gabe sarrera ordaindu eta barruan izan ginen. Itsaspeko nuklear baten tripetan izan ginen (aspalditik kenduta dauka indarra emateko nukleo nuklearra), misilak jaurtitzeko tokia ikusi, kontroleko gela, kapitainaren gela...

Le Redoutable itsaspekoa
Le Redoutable itsaspekoa

Arratsaldean kalean zehar genbiltzala, lorategi baten barruko etxetxo baten, museo natural-etnografiko bat ikusi genuen. Disekatutako animaliak, mineral pila bat, Amerika, Asia, Ozeania eta Afrikako hainbat tresna eta momia bat ere bazituen museoa. Sorpresa ederra hartu genuen.

Bueltako bidaian, hondartzaz hondartza etorri ginen eta frantsesak muskuiluak hartzen ikusi genituen. Hori da frantsesek duten afizioa. Badakigu orain arratsaldeko 17:00etan kaleetatik desagertzen direnean nora joaten diren: muskuiluak batzera!

Abuztuaren 23a: Saumurreko tankeen museoa

Bigarren egunean komentatu zuen Iñakik Saumurren tankeen museo bat zegoela eta itzulerako bidean orduerdiko geldialdia edo egin beharko genuela berau ikusteko. Esan eta egin. Eta ederra museoa aurkitu genuena! Bigarren mundu gerrako tankeak, frantsesak, alemanak, Tiger-ak, Sherman-ak (izenak ikasi ere egin egin ditut ;)), modernoagoak, amerikarrenak, israeldarrak, Golkoko Gerran erabilitakoak, NBEk erabiltzen dituenak, beste hainbat herrialderenak, berriak, zaharrak, izorratuak, ondo dabiltzanak... Deskubrimentu zoragarria izan zen.

Saumurreko museoko tankeetako bat
Saumurreko museoko tankeetako bat

Eta hortxe bukatu zen gure bidaia, hainbat orduan zehar Bordele eta Baiona arteko zuhaitzen artean gidatu ostean (badirudi basoa ez dela inoiz bukatzen), abiapuntuan ginen berriro.

Balorazioa ezin hobea izan da, mezu honetan jarri ditut argazki batzuk baina askoz gehiago ditut (panoramikaren bat ere egin behar dut), ea Flickr edo nora kargatzen ditudan, 5 egunetan 300 argazki baino gehiago egin ditut-eta.

Hurrengoa nora? Nork daki, baina hau bezalakoa izan behar bada, izan dadila berehala :)

Nik ere GPSa euskaraz!

Mikel Larreategi 2008/05/22 21:20
Bai, nik ere badaukat GPS bat. Ez da azken modelo bat izango eta ez zuen asko kostako. Egia esan, egunkariaren kupoiekin hartutako horietako bat omen da.

 

GPS Supratech Dedalo
Imagen del GPS Supratech Dedalo

Irudikoa duzue nire GPSa, Supratech etxearen Dedalo modeloa. Ez da beste munduko bat, bat gehiago. Hala ere ez da TomTom etxearen softwarea duen horietakoa eta beraz ezin zuzenean Eibar.ORG elkarteak prestatutako ahotsak erabili.

Berehala hasi nintzen GPS horretan TomToma instalatzea posible zen ala ez aztertzen eta aurkitu nuen bai informazioa. www.puntosdeinteres.es webguneko foroetan zehar bilatu ostean hauxe aurkitu nuen: Supratech Actea GPSan TomToma instalatzeko tutoriala.

Tutoriala ez nuen zehazki jarratu, nire TomTom bertsioan zeuden mapak beste karpeta baten zeudelako, baina bestela nahiko erraza izan da GPSa lagunen ahotsekin jartzea. Nire kasuan, tutorial horretan aipatzen den CurrentMap.dat fitxategiaren edukia ondokoa da:

0   \SDMMC\ES_and_PT_plus_major_roads_of_WE\

Nire GPSaren SD memoria txartela SDMMC bezala montatzen delako eta bere barnean dagoen karpeta horretan daudelako mapak.

Izan dudan arazo handiena GPSaren seinalea hartzen ez zuela izan da, baina tutorialaren aurreragoko orrialde baten dioen bezala, GPSa aukeratzerakoan "Otro GPS NMEA" aukeratu behar da, 4800 baudeko abiadurarekin eta COM7 portuan. Hori eginda, berehala hartu du nire posizioa.

Ondoren Leire, Iban, Amatiño eta Iturriren ahotsak kopiatu, collected.ini fitxategia ezabatu eta GPSa abiaraztean han agertu zait Iturri ferrya hartzeko esanez. Biba !!!

Oharra: tutorialean dioen lehenengo fitxategia lortu nahi baduzu, hementxe daukazu. Ez da TomTom nabigatzailea, ez da GPSak berez dakarren programa, Windows Esploratzaile bat besterik ez da, baina Dedalo GPSak duen hasiera menu horrek automatikoki Mobilenavigator barruko Mobilenavigator.exe fitxategia exekutatzen du, eta TomToma instalatu ahal izateko Windows Esploratzailea behar duzu.

Larunbatean, nahiz eta bidea jakin, ea Leirek gidatzen nauen Donostiara !

Azitaingo poligonoko loreak

Mikel Larreategi 2008/05/07 22:10
Azitaingo poligonora joaten hasi nintzenetik, egunero ikusten ditut lore batzuk hasiera hasiera errebueltan.

La Salle ikastetxetik poligonora erreka gainetik pasatzen den zubiaren ondoan, erreka justu zubi azpitik pasatzen den inguruan, lore batzuk ikusi izan ditut CodeSyntaxen lanean hasi nintzenetik. Lanera oinez joan ohi naiz eta egunero lau aldiz pasatzen naiz bertatik, eta nahiz eta lehenengoan atentzioa deitu zidan, orain ia ohartu ere ez naiz egiten. Egia esan, ahaztua dut noiz aldatu zituzten loreok azken aldiz. Batzuk, gainera, plastikozkoak dirudite eta besteak lehortuta daude.

Bulegoan komentatu izan dugu horko lore horien kontua behin baino gehiagotan. Zer ote diren, nork jartzen ote dituen...

Batek baino gehiagok, behin baino gehiagotan, sektaren baten kontua direla esan du. Sineskeriaren batengatik hor utzitako loreak.

Beste norbaitek, orain dela urte batzuk hor gertatu zen auto istripu bategatik familiakoren batek utzitako loreak zirela esan zuen beste behin.

Azitaingo poligonoko lorak

Garrantzia gehiegirik ez nion ematen, orain dela aste batzuk kontua etxean komentatu nuen arte. Egun haietan euri asko egiten ari zen eta amamak, betiko moduan, segituan esan zeban "Ené, errekia be bete-bete einda etorriko da poligonitik be(he)rá, eztá Mikél?". "Bai" nere erantzuna. Holakotxe egualdixa ein zeban baten eruan zittuan ufalak bihargin batzuk oin dala urte batzuk. Ondiok be hantxe egoten dira lorak ipinitta.

Badirudi, Poligonoa egin aurretik, eta Orbe baserrikoak autoen desguazea hor jarri aurretik, errekaren kanalizazioan tunel bat egiten zeudela han langile batzuk. Bat-batean euria hasi eta tunelpean babestu ziren, han seguru egongo zirelakoan. Baina euria gelditu ez, eta erreka handitzen hasi zen eta halako baten ufalak jo eta eraman egin zituen. Batzuk Maltzagan agertu omen ziran.

Inork gehiago ez dit istorio hau konfirmatu, baina etxean guztiek zuten horren berri. Ez dauka sekta baten xarmarik, baina Azpeitikoak ikusita, agian hobe sektarik ez bada, ala?

Norbaitek istorioa konfirmatzerik badu askoz hobeto, igual Serafin edo Amatiño edo "los viejos del lugar" akordatuko dira, edo Asier eta Aintzanek entzungo zeben euren grabazioetakoren baten.

Periferiatik

Mikel Larreategi 2008/02/05 23:44
Asteburuan Erreala eta Eibarren arteko futbol partidua jokatu da Anoetan. Bukaerako banako berdinketak badirudi ez dituela gustora utzi donostiarrak. Hala dirudi egunkariak irakurrita.

Noticias de Gipuzkoa egunkaria irten zenetik etxean horixe hartzen dugu. Ez gure gipuzkoartasuna beti gogoan izateko, baizik eta Gasteiz edo Balmasedako albisteak irakurri ordez, Elgoibar edo Bergarakoak jakiteko. Ez, gurean ez da Delirio Vasco erosten, eta horretarako, eta arrazoia ez da Realan eta Badiolan kontra idatzi dabelako edo Badiolan aldekoak garelako. Benetan kuriosua da Euskal Herrixan gertatzen dana. Badiolak berak atzo esan zeban moduan (berak Gipuzkoagaittik esan zeban, baina Euskal Herrira zabaldu leike), kuriosoa da hauteskundeetan erakusten den gehiengo politikoaren aurkako egunkariek dutela salmenten gehiengo absolutua.

Igandean, larunbateko derbyaren kronikan, zera zioen Noticias de Gipuzkoa egunkariak 53. orrialdean:

CÁNTICOS> "El año que viene volvemos otra vez", entonó la afición eibarresa.

Un centenar de seguidores eibarreses esperó al equipo junto al autocar del conjunto armero tras el encuentro. Este grupo de aficionados azulgranas entonó diversos cánticos de ánimo a los suyos, entre los que destacó un sorprendente "el año que viene volvemos otra vez". O estos seguidores sueñan con un doble ascenso por parte de los dos conjuntos guipuzcoanos, o prefieren que su club convenido no suba a Primera, con todos los inconvenientes que, para su equipo, esto conlleva.>N.G.

Ederto. Eurek nahi dutena egin behar dugu. Zein mundutan bizi dira?

Baina gauza ez da hor amaitzen, gaur bertan, egunkari guztietan, Noticias de Gipuzkoan barne, albiste nagusia atzo Iñaki Badiola Errealeko presidenteak eman zuen prentsaurrekoa hizpide denean, zera irakur daiteke Noticias de Gipuzkoan bertan. Badiolaren prentsaurrekoari bi orrialdeko errepasoa eman ostean, Badiolak erantzundako kazetarien galderak agertzen dira. Egindako galdera batek zera dio:

¿Qué beneficios saca la Real de su convenio con el Eibar, cuando el club armero pugna por los puntos con el equipo txuri-urdin?

Ederto. Hitzarmenak bi aldeen onerako egiten diren akordioak zirela uste nuen. Kazetariak ahaztu egin dira, dirudienez, Garitano edo Cifuentesen fitxajeengatik ordaindu zuten diru kopuruaz, edo Amorrortu liga bukatu baino hiru aste leheneago fitxatu zigutenean, edo edozein jokalari saldu aurretik Realari dei egiteko kontuaz. Hitzarmena euren aldeko puntuetan bakarrik hartzen dute hizpide.

EAJren Ahaldun Nagusigaiak, Markel Olanok, azken Foru Hauteskundeetan, Eibarrek Gipuzkoako periferia izateari utzi behar ziola esan zuen (hemen Josuren analisia). Baina ez. Eibar periferiaren periferian dago (Enriquek, "el sector crítico del sector crítico esango lukeen bezala). Ba bai. Eta gustora asko gainera. Bide batez blogaren izenburua aldatzeko aukera eman dit ditxosozko periferiak.

Aurkezpena

Mikel Larreategi

Mikel Larreategi Arana

(Eibar, 1981). Informatikaria ikasketa eta ofizioz, CodeSyntaxen egiten dut lan Eibar.ORG bezalako webguneak egiten. Ikastolan nengoela xakean jokatzen hasi nintzen eta horretan jarraitzen dut.

Flicker-en
www.flickr.com
Elementos de erral Ir a la galería de erral
Twitterren