Zesarren emaztearen hori
"EAJk Arrasaten duen zinegotzi batek, alderdikide duen alkateari, hirigintzan irregulartasunak egin izana leporatzen dio. Egozten dio enpresari bati etxegintzako operazio handi bateko gainbalioa bereganatzen utzi izana, gainbalio hori Udalaren mesedetan erabili ordez". El Diario Vasco, 2006ko ekainaren 17an, lehen orria.
Nola itzultzen da irregularidad euskarara? Ohiz kanpoko ekintza? Arauz kanpoko ekintza? Zatarkeria? Zelan izendatu Arrasateko Udalean gertatu dela esaten duten hori? Kontua duela aste bi atera zen, eta gaur egun oraindik herritarrak ez dauka informazio garbirik. Batek zioen besteak zerbait egin zuela. Zerbait egin zuela esaten zuten horrek ezetz dio, baina kontuak behar den gardentasunez erakusteke.
Telebistan, pertsona baten atxiloketaren albistea ematen dutenean, beti pantailaratzen zaigu haren auzokoa, harri eta zur adieraziz atxilotutakoa bizilaguna on eta normaltzat zeukala.Telebistako auzokoa bezalakotxea naiz ni:ez daukat arrazoirik pentsatzeko ondoan bizi direnak, hurbileko agintariak tartean, adostasunak edo ideologiak gora behera, morroi zintzoak ez direnik.
Itzal beltza zabaldu da baina Arrasateko gobernuaren buruaren gainean, eta honek oraingoz ez du hodeia hurrun bidaltzeko ahalegin nahikoa erakutsi. Lainoa aldentzeaz urruti, belztuz eta handituz doa, oraingoan alderdikidearen adierazpenarekin.
Esaera zaharrak dio badaudela lagunak, etsaiak eta alderdikideak. Zein da alderdikideak Gipuzkoako egunkari ofizialeko lehen orrialdera jo izanaren arrazoia? Herritarrak, lehenbait lehen, ganorazko azalpen bat behar du. Ugari dira zabaltzen ari diren susmoak, eta ostera urri eskaintzen ari diren esplikazioak. Administrazioan ez bezala, giza harremanetan isiltasunak baiezko efetua al du? Beharrezkoa ote gogora ekartzea agintariek ezkerreko paparrean daramaten pinean grabatu beharko luketeen topikoa? Zesarren emaztearen hori, alegia?