Josu Leokanne

Larunbat goizean iritsi zen nire azken nobia etxera, eta gaur probak egiten aritu gara. Lehenengo mahaian, eta orain ohean gaude. Norbaitek ez baldin bada enteratu jakin dezala nire MacBook portatilaz ari naizela.

Kamaratxo integratua dauka eta Photo Booth programarekin efektu desberdinak erabili daitezke argazki eta bideoetan. Programa hori erabiliz egin dut di-da batean gabonak zoriontzeko bideoa, fondo moduan Steffe-ri esker, CC 2.0 lizentziapean lortutako irudi bat jarrita.
 

 

Eguberri on!!

Gaur Pasalo, Gente eta horrelako programetan Eibar ezagutzera emongo dabe, suposatzen dot. Antza, ijitu bat armaz erahilda, Polonia Etxeberria kalean. Eguerdian zihar hainbat sirena entzun ditut eta eitb24.com-en ikusi dot albistea.

Behin baino gehiagotan esan dut zer izan nahi dudan nagusian: jubilatua. Baina horretarako lehenago lan egin behar, eta horretan gabiltza, ahal dugun heinean. Tira, enbidia apurtxo bat badiet jubilatuei, baina ez diet ukatzen dituzten zerbitzuak merezituak ez direnik. Horrek ez du esan nahi zerbitzu publiko duina jasotzeko jubilatuak izan behar dugunik. Ala bai?

Tristura handiz ikusten dut nolako desberdinkeriaz tratatzen diren gazteak eta nagusiak instituzio publikoen aldetik. Arduradun politiko bati entzun nion gazteokin ez dagoela ezer egiterik, ez garelako mugitzen. Kasu askotan egia bada ere, mugitzen garen kasu askotan jasotzen dugun babes eskasa ere aipatzea falta izan zitzaion, noski. Babes eskasa, oztopoak ez direnean, noski.

Urte gutxi batzuk atzera egingo ditut gaur, oraindik piska bat kakaumeagoa nintzenera itzuli nahi dut une batez. Kakaumea, baina gerra ematen hasitako adinean. 14 urte ingururekin, larunbat arratsaldetan Punto y Aparte diskotekara joaten ginen. Udalaren dirulaguntza du diskoteka honek, 12-16 urte bitarteko gazteek alkoholik gabeko diskoteka izan dezaten. Noski, sarreran joaten zaie gazte hauei pagaren zati handiena. Nik sarrera eta txokolatina bat erosteko haina izaten nuen larunbatetan, gurasoen pagarekin. Hori bai, sarrerarekin batera edari bat (alkoholik gabea) ematen dute!

Ondo deritzot horrelako zerbitzu bat egoteari, baina larritasun apur batez ikusten dut gazte hauek, 14 urte ingurukoek, bere paga osoa ekimen honetan xahutu beharra. Larritasunez ikusten dut, batez ere, beste batzuei dantzaldia doan eskeintzen hasi behar zaienean Astelena frontoian. Noski, beste horiek jubilatuak dira. Antzina bezela berbena izango dute doan, eta benetan poztu nintzen jakitean. Oraindik ulertu ezin dudana da zertan dabilen Eibarko Udala, bertaratzen diren jubilatuei edariak doan ematen.

14 urteko gaztetxo batek bere paga hipotekatuta dauka: larunbatean diskotekako sarreran eta txokolatina batean gastatu behar du. Jubilatuek, pentsio baxua izan arren, badute edari bat ordaintzeko haina, baina etxean utzi dezakete kartera: badakite Udalaren ekimen batean parte hartzeak doako edaria dakarrela.

Egunkari batean irakurri dut ikustear dagoela zelako erantzuna izango duen, gaur arratsaldean, horrelako lehen dantzaldiak. Ikustear? Edaria doan emanda nola ez dira hurbilduko ba, jubilatuak? Biharko edo etziko prentsan "éxito rotundo" irakurriko dudala ez daukat zalantzarik. Ba, zorionak. Eta bide batez proposamen bat Eibarko Udalari: gazteentzat dantzaldia larunbat gauetan Astelena frotoian. Lehen edaria Gizarte Zerbitzuen Departamentuaren kontura, noski. Izan ere, Udal enrollatua daukagula ez daukat zalantzarik!

Eguneraketa. 2007/XII/15
Aurreikusi moduan, gaurko DVk "Valoración positiva" dio.

Gauerdian esnatzen da benetan Josu, eta bere burua hegaka hasten da. Logureak hegan ihes eta inspirazioak aterrizatu egiten du Josuren logelan, eta bere ordenagailuko teklak laztantzen ditu hitz goxoen bila.<br /><br />Bi hitz mota omen daude. Egunekoak, arrazoiaren hitzak... eta gauekoak, sentimenduen hitzak. Eta Josuk gauez aritzea atsegin du. Josuk hildako poeten klubeko kide izan nahi luke, eta txoko ezkutuetan poesiak kanta. Eta badaki ez dela horretan onena, baina batzutan poeta sentitzea gustatzen zaio. Basoa isilegia litzateke hoberen abesten duten txorien kanta hutsaz. Norbaitek jarri behar dio musika gauerdiari.<br /><br />Gabon, poesiaren lagun. Egun on, arrazoiaren maitale.

San Andres egunean KTB Eibarko Vocentoren Telebistakoek harrapatu ninduten jaien inguruan galderaren bat egiteko. Momentu kritikoena seguraski elkarrizketatzeko: umeak zain, Udaletxeko atean utzita nere kotxea, Udalak ekarri beharrekoak ez ziren agertzen... baina hala ere galdera batzuei erantzun nien. Pena moztu dutena moztu izana. Udalari botatzen dizkiodan purrustadak gustatzen zaizkie Eibarko kazetariei. Eta pena interneten KTBk ezer ez egitea, Goienan egiten duten bezala. Baina tira, halanola grabatu eta Youtubera igo dut.



Eskerrik asko KTBri gure informazioak herriko telebistan hedatzeagaitik.

Bloga izatea dagoeneko gauza arrunta da. Nere anaiak askotan entzun izan dit bloga gora eta bloga behera, baina ez diot sekula ganoraz erakutsi zer demontre ote den bloga. Gaur euskararen eguna dela eta, ospatzeko zeozer berezia egin behar genuen. Boteprontoan esan diot: egin zure bloga. Eta espero ez nuen baietza eman dit!

Ez dakit zer demontre kontatuko duen hamaika urteko nere anaiak bere blogean. Agian Eibar KEaren kontutxoak, Jaimitoren txisteak edo eskolarako idazten dituen ipuinak, ez dakit. Agian, pixkanaka interneteko erramintak erakusten joateko bidea ireki ahal izango dizkit blog honek. Ez litzateke gutxi izango.

Amak dio agian gazteegia da. Baliteke, baina bai berak zein bere lagunek msn messengerrean jarduten dute, eta inork ez du esaten horretarako gazteegiak direnik. 13 urterekin msn Spaces eta Fotologak egiten hasi dira, eta inork ez du esan gazteegiak direnik. Txorakeria horiek egiteko kapaz badira, zergaitik ez bloga bezalako erramintak erakutsi? Animo, Julen!