Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Lagun batek esan dit lagun batek esan diola / Euskal Herriko 7 mirariak

Lagun batek esan dit lagun batek esan diola

Euskal Herriko 7 mirariak

gabiria 2005/02/03 08:14

Duela gutxi entzun nuen ekimen berri bat sortu dela interneten: munduko zazpi mirari berriak aukeratzea. Jendea bozkatzen hasi, eta zerrenda luzea irten da, baina, jakina: zazpirentzat baino ez dago lekurik, eta batzuek kontu pertsonal bezala hartu dute hau. Esate baterako, Espainiako telebistetako informatiboetan jo eta ke ari dira azkenaldion, Alhambraren alde bozkatzeko eta bozkatzeko esaten. Izan ere, Alhambra 13. postuan dago, eta zail dauka zazpi aukeratuen artean sartzen.

Zerrenda osoa hemen dago, baina aipatu dezagun zeintzuk diren lehenengo zazpiak une honetan:

1- Txinako harresia (Txina)
2- Potala Jauregia (Tibet)
3- Taj Mahal (India)
4- Koliseoa (Italia)
5- Chichen Itzako piramideak (Mexiko)
6- Bazko Uharteko estatuak (Txile)
7- Pisako dorrea (Italia)

Eta zerrenda berritu nahi dute, beti-betiko zazpi mirarietatik bat baino ez delako geratzen, Egiptoko piramideak. Zeintzuk ziren beste seiak? Gogora ditzagun, labur-labur: Halikarnasoren Mausoleoa, Rodako Erraldoia, Babiloniako Lorategi Zintzilikatuak, Alexandriako Faroa, Zeusen estatua, Artemisaren tenploa eta aipatutako piramideak.

Bada, kontu hauek entzunda, eta ikusita Euskal Herriko mirari bakarra, Guggenheim Museoa, 46. postuan dagoela, pentsatzen ibili naiz zeintzuk izango liratekeen Euskal Herriko zazpi mirariak, holakorik balego. Mila leku eta bazter bururatu zaizkit, baina kontuan hartu behar da gizakiak egina izan behar duela: ondare naturalek ez dute balio, eta herri osoak miraritzat hartzea ere (esate baterako, Hondarribi, Biasteri...) erraz samarra iruditzen zait.

Beraz, elementu isolatuak izan beharko lukete: eraikin jakin bat, nola edo halako osotasuna duen konjuntoa (asko jota, kale edo auzoren bat) eta abar.

Hasi naiz pentsatzen eta... aizue! edo laburregi geratu eta ez naiz zazpira heltzen, edo zazpitik gora noa eta ezin zerrenda mugatu. Baina tira: azkenean ausartu naiz zerrendatxo bat egiten, eta, badaezpadan, beste batzuk ere utzi ditut kanpoan.

Hauek dira nire aukeratuak, ordena alfabetikoan.

Euskal Herriko 7 mirariak

1) Añana-Gesaltzako gatz-plataformak
2) Arantzazuko santutegia
3) Gaztelugatxe
4) Loiolako basilika
5) Oliteko gaztelua
6) Orbaitzetako ola
7) Zumarragako Antiguako ermita

Denak ez ziren kabitzen, eta hauek kanpoan geratu zaizkit...

Abadia gaztelua
Igartubeiti baserria
Gorbeiako gurutzea
Lekeitioko Andra Mari eliza
Portugaleteko zubia
Urkuluko dorrea
eta beste mordotxoa...

Zazpitik, beraz, elizarekin erlazionatutako lau daude (Gaztelugatxekoa ere ermita da). Eta kontuan hartzeko moduko datu bat: Añana-Gesaltzako gatz-plataformaren kasuan eta, batez ere, Orbaitzetako olarenean, Gobernuetako Kultura Sailek ez dute oso jarrera eredugarria erakutsi. Erabateko utzikeria dago Euskal Herriko hainbat monumenturen inguruan, esate baterako Orbaitzetako ola eder horretan.

Askotan pentsatu izan dut honetan, eta gaur berriro: adibidez, monumentu hauek Frantzian egongo balira, zer? Zenbat folletotan ikusiko genuke eurei buruzko propaganda? Ez ote lituzkete bertara heltzeko errepideak asfaltatuko? Ez ote lukete euren ondarea guk baino mila bider hobeto salduko? Noiz espabilatuko gara?

Ondare artistiko interesgarria dugu Euskal Herrian, baina ez dugu saltzen. Ez dakigu edo ez dugu nahi. Baina ez naiz ari kanpokoei saltzea, turista madrildarrez betetzeko Olite edo Igartubeiti, ez: ari naiz esaten ez dakigula saltzen geure artean ere, eta ez dakigula hortxe bertan ditugula Mirandaola, Agorregi eta gizakiaren eskutik sortutako beste ehun monumentu eder. Zer esanik ez naturak sortutako monumentuei buruz. Ez dakigu ezertxo ere. Ez dakigu saltzen edo ez dugu nahi. Utzikeria galanta dago gure kulturaren inguruan.

etiketak: Hara-honakoak
ere
ere dio:
2007/05/13 00:22

mirari bat el peine de los bientos a otra kosa busko nobio de 12- pa arriba

ere
ere dio:
2007/05/13 00:21

mirari bat el peine de los bientos a otra kosa busko nobio de 12- pa arriba

Luistxo
Luistxo dio:
2005/02/03 11:38

Arantzazuko santutegia bezalako gauza moderno bat kalifikatzen bada (eta nere ustez eskubide osoarekin), elementu industrialen batek behar du egon zerrenda horretan: ez dakit zubiren bat, lantegi zaharren bat, Igeldoko funikularra edo Zugaztietako meategiak...

Lehen aukera dudabakoa pentsatzen zait: Gesaltza.

satortzulo
satortzulo dio:
2005/02/03 11:58

nik mirari txikiagoak ditut gostoko, mendira joan, herri galduren batetara... eta aurrean aurkitzen ditudanak (eta inongo turista gidetan, aurkitzen ez ditudanak): orain bapatean gogoan ditudanak: enirioko galtzada eta uiduiko saroia, azpeitiako labaderoa, markinako hilerri neoklasikoa, bastidako juduen hilerria, bazter galduetan dauden hainbat baserri... gizakiak handinahirik gabe, ingurunearen eskalan eta elkarbizitzan eginak, handikeriarik gabe

oteitzaren kutxa metafisikoak, chillida leku ere kontuan hartzekoak dira; pena da baina arkitektura arrazionalistaren barnean baditugu gauza politak, baina ez dugu mirari izenik merezi duenik nire iritziz (beharbada kikukinbera edo laborde hermanos)

eta ezinbesteko bat (ez dakit zerrenda ofizialetan agertzerik izango lukeen): laboaren komunikazio-inkomunikazio

Aritza
Aritza dio:
2005/02/03 12:07

Ez dakit utzikeria dan edo marketing falta baina arrazoia dozu, ez dakigu saltzen edo ez dogu saldu gura. Orain dala uda bi Bretainian izan nintzen, leku ederra benetan, hainbatetan zoragarria... itsas labar ikaragarriak, herri kutunak, milaka menhir bide bazterretan,... Kontuak kontu geurean bere, berbarako, sekulako itsas labarrak daukaguz, eurenak bezain ikarragarriak edo ikarragarriagoak. Halan da be, turismo gidek ez dabe holan ekarten. Iazko abuztuan bere Italia aldera egin genduan, Siciliatik hasi, Napolira egin ondoren, Florentzian geratu Erromara ailegau artean. Gidek sekulakoak esaten ebezan Italiako hondartzez, hara heldu eta... Burura etorri jatan Muskiz, burua etorri jatan Zarautz, eta Larrabasterra, eta Gorliz, eta Donostia,... Daukagunari prezioa jarriko bageuntso, igual ikasiko geunke baloretan. Horren harira, Bilboko Arte Eder Museoa burura etorri jat, edota txosnetan egiten diran hamaika kontzertu...

leire
leire dio:
2005/02/03 15:23

Nik uste bat, behintzat falta dala zure zerrendan: Ekaineko kobazulua. Ez dago danok ikusteko, baiña. Errezoia dozu. Mugia pasau eta gauzarik txikixena triptikuetan eta ondo seiñalizauta dago.

Patxi
Patxi dio:
2005/02/04 03:47

Duela gutxi esaten nizun bezela, Julen, horixe da: produktua ez degula ondo saltzen.

Dena den, (poetaren ikuspuntutik ari naiz orain), kasu batzuetan hobe: 7. tokian ipini dezun antioko ermita hori ondo publizitatuta balego, ez lirateke argiak itzalduko gauero goizeko ordubata inguruan, eta ni bezelako argazkilari poeta honek, ez zuen halako gozamenik sentituko honi argazkiak ateratzean, ilargi beteko gau batez, izarren laguntasunean.

Norbaitek Antioko ermita ezagutuko ez balu, nere argazki batzuk hor daude, "Begietatik" blogean.

Ez dakigu daukaguna miresten, halaxe da. Kanpokoa beti hobea. Beharbada oso txikiak geralako, besteekin alderatuta.

Traperoak, gutxi barru, mezu bat idatziko du honi buruz, estresari iskin egiteko emaitzaz, eta zure mezu baten eskutik helduta.

Deskuidoan, irakurri nahi bazenu ere.

Nik mirarien artean gustora ipiniko nuke, Donostiako Haizearen Orrazia.

ere
ere dio:
2007/05/13 00:20

mirari bat el peine de los bientos a otra kosa busko nobio de 12- pa arriba

ere
ere dio:
2007/05/13 00:20

mirari bat el peine de los bientos a otra kosa busko nobio de 12- pa arriba

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Julen Gabiria

Ostiralez jaio nintzen, neguan eta arratsaldean, Estokolmo Sindromea lehenengoz agertu zen urtean. Geroztik, neguko ostiral arratsaldeen beharra izaten dut, batez ere udaberriko astelehen goizetan.