Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Lagun batek esan dit lagun batek esan diola / Harategizar (II)

Harategizar (II)

Julen Gabiria 2005/04/13 08:45

Gau gosez begiratu diot erlojuari, baina seiak ere ez ziren. Hanka bat sartu dut Kebabean, baina zalantzan geratu naiz, ez ote dudan denbora gehiegi pasatu beharko han, eta ez ote den tipo okrea moskeatuko, pentsatuz zer egiten dudan hainbeste denbora (batek daki noiz ixten duen Kebaba) poleo menta batekin. Hori pentsatu dut, baina okre jauna begira nuen, eta, beraz, hanka atera dut. Bururatu zait hobe zela katedralaren aurreko banku batean jartzea, eta handik bijilatzea. Baina pentsatu dut hiru ordu plazan jarrita, poleo mentarik gabe, luze egingo zitzaidala. Eta hanka Kebabean sartu dut, eta bestea ere atzetik joan zaio.

Gizon okreak ez du ezer esan, baina pentsatu du: "aupa". Eta nik ere ez dut ezer esan, baina antzeko zerbait pentsatu dut. Begira geratu zait, eta nik, pentsamenduarekin, esan diot "poleo menta", eta, begira-begira eta ahoa zabaldu barik, erantzun dit ez daukala, eta zerbeza bat atera dit, justu gutxien nahi nuena.

"Zertara etorri zara, gafas?", galdetu dit, pentsamenduarekin. Lotsatuta, konturatu naiz ezin niola esan –pentsamenduarekin-, "zu jarraitzera, Kebaba ixten duzunean"; eta esan diot, esan barik jakina, "perutar bat jarraitzera". Txarto begiratu nau, oso txarto. Bere pentsamendurik ilunenarekin, esan dit: "hemen ez dago perutarrik". Eta gehitu du: "perutarrak kalean daude, hemen ez. Perutarrek ez dute kebabik jaten".

Eta kalera irten naiz edan nahi ez nuen zerbeza edan barik, eta ez zait asko kostatu perutar bat aurkitzea. Jarraitu egin dut, eskaparateen aurretik eta kale izkinetatik. Jarraitu dut ibai ertzetik eta auzo beltzetatik. Jarraitu dut, eta, hamaika bueltaren ostean, Harategizarrera bueltatu da, lokutoriora. Eta, lokutoriotik, Peruraino joan da. Eta jarraitu dut, baina fronteran, polizia batek, paperak eskatu dizkit. Eta nik ez neukan.

"Peruk polita dirudi fronteratik", aitortu diot, pentsamenduarekin, Kebabeko okreari.

etiketak:
Patxi
Patxi dio:
2005/04/13 14:15

beste zirrara bat, 12,15 etan.

Peruraino baino, harategizarrera jun naiz ni, eta horixe sentitu det.

Julen
Julen dio:
2005/04/14 15:19

Aupa Txiber,

ba kantoien kontua dela eta, ez dut horrekin pentsatu, baina sinadura bilketa egiten baduzue eta kopuru minimoa betetzen baduzue, egingo dut. Kopuru minimoa zehazteko dago, baina momentuz 3 sinadurarekin konformatzen naiz.

Nire asmoa, Eneko Astigarragaren gogoei kasu eginda, zen Zazpi Kaleen ostean Bilbo Zaharrera pasatzea, baina kantoiak ere etorriko dira.

Zuek eskatu... eta emongo zaizue! Beste iradokizunik bai norbaitek? Joder, Patxitrapero ematen dut!

txiber
txiber dio:
2005/04/14 15:07

Baina kebab eta perutarrez aparte Harategizar kaleak baditu bestelako bitxitasunak ere. Bilboko Alde Zaharrean oso arrunta da betiko txikiteo taskak eta horien ondoan supermegamoderno diren pub-ak aurkitzea. Harategizarrean horrelakorik ez duzu topako (4 taberna baino ez daude), baina bai ultramegaesnob den ile-apaindegia eta horren ondoan betiko denda txiki familiarrak. Gainera, Bilboko alde zaharrean dagoen souvenir denda bakarra ere kale honetan dago (non eta Harategizarrean?). Horretaz gain, kalearen hasieran (Bilbon kalean itsasadarrean hasten dira) parez pare bi eskaparate daude: alde batean angulak saltzen dituen denda bat (jatekoak eh!!) eta beste aldean kasino txiki bat. Kasualitatea ote? Baina gauza guztien artean deigarriena hauxe da. Eguraldi ona egiten duenean, dendari asko ikusten dituzu euren denden atarian (arrastiko 4 eta erdietan pasatu eta baietz 10 dendari ikusi denden aurrena). Horrek sekulako bizitasuna ematen dio kaleari, beste kale batzuetan ez dagoena. Bezeroak eta auzokideak agurtu, dendarien artean zirika ibili, Herri txiki bateko kalea ematen du gehiago, Bilboko megapolikoa baino. Bukatzeko, Julen eskaera bat: kaleak bukatuta, kantoiei egingo diezu kasu, ezta?

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Julen Gabiria

Ostiralez jaio nintzen, neguan eta arratsaldean, Estokolmo Sindromea lehenengoz agertu zen urtean. Geroztik, neguko ostiral arratsaldeen beharra izaten dut, batez ere udaberriko astelehen goizetan.