Ez dute Errebal Center egingo
Udaleko Gobernu-Batzarrak gaur prentsaurrekoan jakitera eman zuenez Errebal Center ez da egingo. Miguel De los Toyos alkateak, Mertxe Garate (Alkarbide) eta Eva Juezek (EAJ) “krisi ekonomikoaren ondorioa” dela azpimarratu dute, eta Udalaren nahia Errebaleko lur-eremua berreskuratzea eta SPV Boulevardek dituen zorrak kobratzea da, eta negoziaketak hasiko dira alde bien artean.
De los Toyos alkateak adierazi zuenez, SPV Boulevardek uztailaren 14an
proiektua Pegoran erregistratu zuen lanak hasteko lizentzia lortzeko.
Baina ordutik hilaren amaierara arte gauzak aldatu ziren. “Euren
inbertsio fondoko, CVI Globaleko (bazkide kapitalista), ordezkari bat
etorri zen Londrestik nirekin berba egitera eta krisi eszenatoki bat
deskribatu zidan, eta SPV Boulevardek ezin ziola aurre egin proiektuari
ekonomikoki”.
Udalaren nahia Errebaleko lur-eremua berreskuratzea da, baina salmenta
kontratuan ez da hori aurreikusten. “Negoziaketak hasiko gara CVI
Globalekin, eurak baitira orain gurekin berba egiteko boterea dutenak,
eta lur-eremua berreskuratzen eta gurekin dituzten zorrak kobratzen
saiatuko gara. Negozazioak aurrera joan ezean bide judiziala hartu
beharko dugu”. Lur-eremua berreskuratuz gero, Errebalen aparkalekuak
egitea pentsatzen du Udalak hasiera batean, “eta etorkizunera begira
Errebalekin zerikusia duten guztien sentsibilitateak jasoko ditugu
proiekturen bat aurrera eramateko”. Bost puntu azpimarratu ditu
hirukoteak etorkizunera begira: “bizilagunentzat aparkalekua,
aparkaleku publikoa, erakargarritasun komertziala, merkatu-plaza eta
astiunea”. Momentuz, alkateak aipatu du egin duela berba Errebalen
inguruan dauden protagonista guztiekin.