Arriolak alkatetza utziko ei du

Josu Cristobal eibartarraren blogean irakurri dugu Eibarko PSOEk hartuta duela erabakia. Iñaki Arriola Gipuzkoako PSEren burua izango da maiatzaren 17tik aurrera (albistea El Pais-en). Kargu berrian zentratuko da Arriola, Gipuzkoako Batzar Nagusietan bozeramaile izango delarik. Eta, hala bada, Alkatetza utziko ei du.

Eibarko Alkate berria Miguel de los Toyos izango da. Iñaki Arriola ere aurreko alkatearen kargu-uztearen ondorioz hasi zen Alkate, 1993an, Aurora Baskaranek dimititu zuenean. Ordutik hamabost urte eman ditu Alkatetzan, 2003 eta 2007ko Udal Hauteskundeetan gehiengo osoa lortuz.

Miguel de los Toyos Hirigintza zinegotzia izan da azken urteotan, Arriolaren konfidantzazko gizona. Azken urteotan bere presentzia handituz eta handituz joan da prentsan, lehelengo Arriolarekin batera, eta geroago gauza arrunta izan da normalean Alkatetzari egokitzen zaizkion protokoloak betetzea. De los Toyosen arbasoak sozialistak dira, bere osaba batek altxatu zuen 1931an bandera errepublikarra Udaletxeko balkoian.

Hirigintza zinegotzi berria Eneko Andueza gaztea izango da. Zezenketak antolatuz egin da ezagun herrian. Peña Pedrucho Eibarresa elkarteko presidente izan da hainbat urtez, azken hauteskundeetan PSOEren 12. postuan joan eta Alkatearen idazkari egin zen arte. Ordutik, kargua utzi bazuen ere, zezenketen komisio antolatzailea izan da. Alkatearen idazkari izan aurretik Udal inmobiliariaren (IMESA) ardura izan zuen.

De los Toyosen idazkaria Arcadio Benitez izango da, Eibarko PSEren zinegotzia. Udalerriko agrupazio sozialistaren presidentea da (edo izan da) eta azken urtean hiri-eremuen zinegotzi izan da.

Oraindik PSOEk ez du informazio hau ezagutzera eman bere webgunean. Kalean entzundako zurrumurruak Josu Cristobalen blogean irakurri ditugu*. Josu Cristobal Eusko Alkartasunaren zerrendan aurkeztu zen, 14. postuan, 2007ko Udal hauteskundeetan.

Irudia El Correori esker gureganatua.