Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Teknosexua

Hobe da argi baten phiztea, eziz ülhünpeaz kurrinkatzea

Nortasun agiriaren fotokopiarik ez, mesedez

Gari Araolaza 2012/09/29 21:14
Geroz eta zabalduago dago, edozein tramite egiterakoan nortasun agiriaren fotokopia eskatzea edo egitea. Kontua da ez duela ezertarako balio, ez duela ezer frogatzen fotokopiatutako dokumentu batek.

Sakeleko telefonoa berrizteko, kreditu txartel bat eskatzeko, hainbat eskaera egiteko... azkenaldian beti eskatzen dena da nortasun agiriaren fotokopia. Zertarako? Ba, ezertarako, nere ustez.

Izan ere, zer ziurtatzen du fotokopia batek? Faltsutzea oso-oso erraza da eta gainera berez ez omen da delitua, ez bait duzu dokumenturik faltsutzen (fotokopia bat ez da dokumentu ofizial bat). Adingabekoek ere diskoteketan sartzeko faltsutzen dituzte eta!

Adibidez, telefono linea berri bat kontratatu nahi badut, ziurtatu behar dut ni naizela eskabidean jartzen dudan pertsona eta nire datuak zuzenak direla. Horretarako, nahikoa da eskabidea bete eta telefono konpainiaren ordezkariak nire nortasun agiriarekin datuak alderatu eta gero nire aurpegia eta sinadura konfirmatzea.

Aldiz, nire nortasun agiriaren fotokopiak hemendik hara ibiltzean eta "dokumentazio" horrekin "dena frogatutzat" ematen baldin badugu, oso erraza da nire identitatea ordezkatzea. Honen adibide bat:

Hornidura elektriko bat aldatzeko, komertzial autonomo bati nire nortasun agiria eskaneatuta bidali nion epostaz. Komertzial horretaz fidatuko naiz, baina handik-hona ari dira lanean, gaur hemen eta bihar han, eta pertsona horrek nire nortasun agiri eskaneatu hori erabili dezake auskalo zertarako. Auto bat nire izenean erosi eta kreditua kontratatzeko adibidez. Horixe da Javier de la Cueva abokatuak behin ezagutu zuen kasua, ongi azaltzen du bere Ni se le ocurra solicitarme copia digital de mi DNI o pasaporte.

Aste honetan berriz eskatu didate fotokopia. Eman egingo diet, badakidalako zer gertatuko den bestela. Asteak emango ditut 10 pertsonarekin eztabaidan, beraien prozedura hori dela eta ez dela, eta abar. Ez ote dute halako batean prozedura hau aldatuko? Ea norbait hasten den.

Klip.me, Kindle-ari zukua ateratzeko tresnak

Gari Araolaza 2012/09/22 08:14
Kindle-ak gauza gehiagorako balio du, ez liburuak bakarrik irakurtzeko. Amazon erabiliz, irakurri behar duzun 80 orrialdeko Word dokumentu hori kargatu dezakezu Kindle-an, baina Klip.me erabilita, baita webguneak eta RSSak ere!

Hemen ere Mikeli eskerrak eman behar, berak eman bait zidan Klip.me-ren berri, eta Kindlea erosteko arrazoi garrantzitsua izan zen.

Mikelek Send to Kindle aukera azaldu zuen. Horri esker, gure nabigatzailean botoitxo bat ezarri, eta webgune bat bisitatzerakoan lasai irakurtzekoa iruditzen bazaizu, klik egin eta minutu batzuen buruan zure Kindle-an izango duzu. Chrome-rako gehigarri bezala eta Firefox-erako bookmarklet moduan dago botoi hori. Mikel berak ongi azaldu zuen bere Send to Kindle artikuluan.

Mikelek aipatutako zerbitzu hau hacker txinatar batzuek sortutako Klip.me webguneak eskaintzen du.

Niretzat Klip.me-ren zerbitzu gustokoena RSS zerbitzua da. Honi esker zure aukerako webguneetako nobedadeak automatikoki etorriko zaizkizu egunean behin, eta lasai zauden une batean erraz irakurtzeko aukera izango duzu ( RSS zer den ).

Laburtuta, RSS-ak Kindle-ra bidaltzeko:

  • Sartu Google Reader-en eta harpidetu hainbat RSS iturritara.
  • Joan Klip.me webguneko RSS zerbitzura eta baimendu ezazu zure Google Readerrera sar daitezen.
  • Konfiguratu zure Kindle-aren eposta, zein ordutan eta nola jaso nahi dituzun zure RSS-etako nobedadeak.
  • Listo!

RSS eta Send to Kindle zerbitzuaz gain, Klip.me-ko lagunek beste bi aukera dituzte, norbaitentzat interesgarri izan daitezkeenak:

  • Google Calendar-eko zitak Kindle-ra bidaltzeko aukera
  • Evernote-rekin lotzeko sistema

Eibarren garraio publikoa hobetzeko ideiak

Gari Araolaza 2012/09/20 10:20
Mugikortasunaren Europako astea omen da honako hau. Eibarko Udalak ez du eskumen handirik garraio publiko kontuetan, baina badaude hainbat pauso eman ditzakeenak garraio publikoa bultzatzeko, laguntzeko, errazteko.

Aspaldi buruan neukan ideia hauek bildu eta publikatzea, eta Liza lagunak bere blogean idatzi duenarekin ( Eibarren mugikortasuna hobetzeko neurri erraz eta merkeak ) berotu eta hor doaz. Ea norbaiti baliagarri zaion ideia hauetakoren bat.

1. Trafiko araudia betearaztea

Tontakeria dirudi, baina Eibarren hau esan beharra dago. Tamalez, gure trafiko arduradunen erantzuna honakoa izaten da "Eibarrek hain geografia zaila duenez, eskuzabal jokatzen dugu".

Hau absurdua da. Normalean, baliabide bat (aparkatzeko tokia, bideak, pasalekuak eta abar) zenbat eta urriago izan, arauak zorrotzagoak eta betetzeko exijentziak handiagoak izan beharko lukete. Pentsatzen dut AEBn ez dagoela gaizki aparkatzen duten autoekin arazo handirik, terrenoa sobran dute. Baina Eibarren? Eibarren ez bada trafiko zainketan zorrotz jokatzen, non?

Bestalde, arauak ez badira betearazten, arauak betetzen dituzten hiritarrak dira kaltetuenak. Toki batean udalak aparkatzea debekatzen badu eta araua hautsi eta aparkatzen dutenak ez baditu zigortzen, praktikan aparkaleku pribatu bat jarri die. Aldiz, arauak errespetatzen dituztenentzat aparkatzeko toki bat gutxiago izango da.

Argi dago Eibarren ez dugula aparkatzeko toki gehiegi. Hori horrela, ez du zentzurik autoek trabarik egiten ez duten hainbat tokitan aparkalekua debekatzea, batez ere gero ez bada betearazten. Zertarako debekatu, gero ez bada betetzen?

2. Autobus geltokiak eta zamalanen guneak zaintzea

Aurreko proposamenaren zehaztapen bat da hau, kasu partikularra. Autobus geltokietan autoak aparkatzeko ohitura hori kendu behar dugu, noizean behinkako kanpaina batetaz aparte. Noizko errespetatuko dira autobus geltokiak?

Berdin zamalan guneekin. Ehundaka gune daude eta aldiz ez dira errespetatzen, eta benetan zamalanetara datorrenak kale erdian gelditu beharra du. Zertarako jartzen dira orduan?

3. Geltokien izenak zehaztu eta estandarizatzea.

Norbaitek esaten didan bakoitzean "Untzagara" iritsiko dela autobusean, inoiz ez dakit Egogainen izango den, Untzaga dorrearen alboan, jubiletxearen aurrean ala San Juan kalean. Untzaga dena da eta ez dago jakiterik non jarri behar garen autobusa ez galtzeko.

Bilbobusen autobusetan arazo hau "konpondu" dute. Autobus barruan datorren markagailuan hau jartzen du (gutxi gora behera, buruz nabil) "Eibar centro-Untzaga-Egogain-Hotel Arrate". Ondo! horrela ez dute hutsik egingo!

Udalari dagokio geltokiak "estandarizatu", egoki izendatu eta dabiltzan garraio konpainiei informazioa pasatzea.

4. Autobus geltokiak zaintzea

Denek dute aterpea, lanbro-herri honetarako egokia? Seinaletxo batekin zehaztuta dago geltokiaren izena? Ordutegiak eta pasatzen diren lineen informazioa jartzeko tokirik badute?

5. Oinezkoen guneetan autobusak baimentzea

Asteburuetan erdialdea itxita gelditzen da. Kaltetuenak garraio publikoa erabiltzen dutenak dira. Geltokiak tokiz aldatu, geltoki batzuek anulatu, bidaiak luzatzen dira eta abar.

Nere proposamena da gertuko lineentzat oinezkoen gunea zabaltzea, Calbeton kalean garajea duenarentzat bezala. Europan oso normala da hirien zentru historikoetan autobusak pasatzen ikustea, ba hemen ere. Poliki-poliki, kontutan izanda oinezko gunean daudela, baina pasatu daitezela barrutik.

Garraio publikoa hobesten da horrela, abantaila bat ematen zaie erabiltzen dutenei, autobusak hiri erdian utziko dituelako. Gainera, lurzorua pribatizatzen duten tabernetako terrazen zabalkundea mugatuko litzateke, noizean behin autobusa pasatu behar delako.

6. Planifikazioa

Gaur egun ez dago dirurik, baina gauzak aurrez planifikatzen badira etorkizuneko hainbat obraren norabidea zehaztu daiteke. Sarritan pentsatzen dut epe luzerako planifikazio hori falta dela edo behintzat ez dela kanpotik ezagutzen. Gaur egun eginezinak diruditen gauzak agian pausoka-pausoka...

Honetan oso adierazgarria da San Juan kaleko geltokiaren kasua. Udaletxe atzetik derrepentean eraman zuten San Juan kalera, ez dakit nolako planifikazioarekin, baina porlanez eginako geltoki probisional horrek han jarraitzen du. Zein zen plana? Ez genekien Ardantzako geltokiaren obrak ez zuela tokirik utziko?

 

Pixka bat pentsatuta seguru beste 20 ideia bururatzen zaizkigula. Udalean norbaiti axola dio honek denak? Baietz pentsatu nahi nuke.

Liburu elektroniko askeak

Gari Araolaza 2012/07/09 09:30
Lehengoan norbaiti irakurri nion moduan, liburu elektronikoaren munduan sartu nahi duenak oraindik pixka bat ikasi beharra du. Horren erantzule industria editoriala da, baina ez da hain zaila, benetan!

Ezagutu beharreko oinarrizkoak

Zer dira epub, mobi eta abarrak?

Liburu elektronikoen formatuak. Liburu elektroniko bat erosten dugunean, formatu horietako batean etorriko da, fabrikatzailearen arabera. Garai bateko VHS eta BETA bideoen formatoetaz akordatuko zara 40 urtetik gora baldin badituzu. Ba horixe bera gertatzen da gaur egun liburu elektronikoekin. Baina oraindik merkatuak ez du erabaki zein izango den estandarra. Baliteke gainera inoiz ez erabakitzea, horixe da egoera. Marka bakoitzak berea hartu du eta ea nork irabazten duen, hor ari dira tiraka. Hala ere, arruntena edo estandarrena epub da. Mobi da Amazonek erabiltzen duen formatua.

Ziurrenez ez da formatu bateratzerik izango etorkizunean. Arrazoia da gaur egun dirua ez dagoela tresnak saltzean, baizik eta liburuak tantaka-tantaka saltzen. Horregatik komeni zaie jendea beraien formatuetara lotzea, banatzaile bakoitzak bezeroak gatibu bihurtu ahal izateko.

Aldiz, gu, kontsumitzaile arduratsuok, banatzaile edo editorearengan independentzia lortzea dugu helburu. Zuk ez? Nik bai! :-)

Zer da DRM-a?

DRM: Digital Rights Management edo Eskubideen Kudeaketa Digitala

Termino zabal bat da DRM, teknologia mota desberdin asko biltzen dituena bere azpian. Industria editorialak erabiltzen ditu teknologia horiek, kultura kontsumitzaileen eskubideak mozteko, adibidez kopiarik egin ez dezagun, lagun bati ez diezaiogun liburu bat utzi edo AEBn erositako Hollywood-eko DVD bat ez dezagun Europan ikusi ahal izan.

Hain zuzen ere, sortu zen lehenengo DRM sistema DVD-arena izan zen. Industria konturatu zen globalizazioa hor zegoela eta jendeak musika CD-ak eta VHS filmak erraz kopiatzen zituela, sarritan kontinente batetik beste batera eramanez. Horregatik DVD fabrikatzaile guztiek akordio bat sinatu zuten eta horren ondorioz DVD irakurgailu guztiek hainbat arau bete behar zituzten, funtzionamendua mugatuz ez arrazoi teknikoengatik baizik eta negozioa kontutan izanda.

Industriaren aitzakia egile eskubideak dira, baina azkenean erosleon askatasuna mugatzeko erabiltzen ari dira. Hau dela eta, DRMdun liburu elektroniko bat ezin zaio lagun bati utzi, ezin dugu kopiarik atera. Kasu askotan gainera tresna edo irakurgailuaren fabrikantez aldatu nahi badugu, baliteke ordura arte erositako liburutegi osoa galtzea, ez badugu aurretik hori dena kontutan izan.

Zer da Calibre?

Calibre liburutegi digital pertsonala kudeatzeko programa bat da. Windows, Apple eta Linuxean dabil eta erabiltzeko oso erraza da. Zure irakurgailu elektronikoa edozein markakoa dela ere, komeni zaizu programa hau izatea ordenagailuan. Irakurgailu elektronikoa lapurtzen badizute adibidez, Calibren izango dituzu zure liburu guztiak, ongi antolatuta autoreka, gaika eta abar.

Calibreren berezitasun garrantzitsu bat da formatuen arteko bihurgailu ere badela. Lagun batek epub bat bidaltzen badizu eta zuk mobi formatuan behar baduzu, Calibrek minutu batean bihurtuko dizu liburuaren formatua batetik bestera.

Hau da eduki kontsumitzaile moduan zure askatasun oinarrizkoa ziurtatzeko tresna: erosi dituzun liburuak zureak dira, berdin da zein den zure irakurgailua. Kontutan izan!

Calibre eta DRM-a

Calibreren beste berezitasun garrantzitsu bat DRM-arekin lotuta dago.

Nik liburu elektroniko bat erosi badut Amazonen, liburu hori modu berezi batean dago kodifikatuta, bakarrik nire Kindlean irakurri ahal izateko. Alferrik pasatuko diot liburua nire lagun bati bere Kindlean irakurri dezan. Ezingo du, Amazonek erabilera hori mugatu bait du. Hau da, liburu hori DRM-arekin giltzapetuta dago.

Calibre erabilita, DRM hori kendu ahal izango diogu liburuari. Calibre berak ez du lan hau egiten, baina jendeak hainbat gehigarri ditu lan horretarako. Urtebete liburu elektronikoarekin artikuluan aipatu dut gai hau eta lan horretarako pare bat erreferentzia ematen ditut.

Ez da guztiz erraza, baina pixka bat saiatuta egin daiteke, eta pauso garrantzitsua da gaur erositako liburu elektronikoen kontrola etorkizunean zure eskuan izan nahi baduzu. Ez utzi alferkeriaz edo akordatuko zara hemendik 5 urtera!

Ez ahaztu:

Urtebete liburu elektronikoarekin

Gari Araolaza 2012/07/03 13:45
2011ko maiatzean erosi nuen Amazon Kindle liburu irakurgailua. Urtebeteko esperientzia oso positiboa izan da. Urte honetan normalean baino askoz gehiago irakurri dudala garbi dago. Urrun dago liburuaren desagertzea, baina paperezko edizio askorena geroz eta gertuago.

Amazon Kindle bat euskarazko testua irakurtzeko prest

Paperzaleak gustora

Ni teknobedade zalea naiz eta garbi zegoen ongi moldatu behar nintzela. Kontua da inguruan ditudan liburuzale sutsuak direla formato berrira hobekien moldatu direnak. Hasieran "bai baina niri paperaren ukitua gustatzen zait..." esaten zutenak, aldi berean 3 liburu irakurtzen dabiltzanak, horiek daude benetan gustora liburu elektronikoarekin.

Amazonen erosketa esperientzia

Erosketa prozesua oso ongi landuta dauka Amazonek, bai lehenengo erosketa eta bai liburuak beraien sistema bidez erostearena. Batere trabarik gabe, badirudi ordaindu ere ez dugula ordaintzen!

Duela zenbait hilabete Kindlearen pantaila izorratu zitzaidan. Beraiei txat batean idatzi, eta hiru egunen buruan berria neukan etxea. Zaharra itzuli eta listo, ez nuen ezer ordaindu behar izan.

Asko gustatzen zait nola Amazonen liburuaren zati bat eskuratu daitekeen ezer ordaindu gabe, frogarako. Liburua pixka bat irakurri eta gustatzen bazait gero erosteko aukera dago. Gainera dena instantean gertatzen da wifiari esker. Liburua aukeratu eta 10 segundutan irakurtzen hasi zaitezke.

Baina kontuz Amazonekin

Aldi berean, kontuz ibili behar da Amazonekin. Beti ere ziurtatu kontrola zuk duzula. Hau da, liburuak saldu baino, esango nuke "utzi" egiten dizkigutela, izan ere egunen batean beste irakurgailu bat erosten baduzu ez dute harako balioko Amazonen erositako liburuek.

Hori ekiditeko garrantzitsua da liburu elektronikoak kudeatzeko Calibre aplikazioa zure ordenagailuan instalatu eta beraren bidez Amazoneko liburuak beraien DRMtik "askatzea". Bilatu Interneten eta ziurtatu kontrola zure eskuan duzula. Adibidez hemen azalpenak eta hemen deskargak

Kontutan izan Kindlea 100 Euro inguruan saltzen duela Amazonek. Prezio horretan argi dago beraien helburua ahalik eta tresna gehien banatzea dela, gero irabaziak liburuen salmentarekin izango bait dituzte.

Kindle irakurgailua

Amazonen arrakastaren arrazoi handienetakoa da aparatua bera. Arina, bateria luzea, tinta elektronikodun pantaila, kapazitate altua, wifi bidez liburuak deskargatzea eta abar luze bat. Ohean irakurtzeko adibidez, beti izan ditut postura egokia aurkitzeko zailtasunak paperezko liburuekin. Kindlearekin bat ere ez.

Liburuak euskaraz

Iturri onena: Susaren liburu elektronikoak

Liburuen prezioen absurdua Espainian

Izugarri ernegatzen nau honek. Inozoak garela uste dute eta oso sarritan liburu elektronikoa paperezkoa baino euro pare bat gutxiagotan saltzen da edo bertsio ingelesen aldean askoz garestiago. Azken adibidea: Austerren Sunset Park. Euskaraz aurkitzea ez dut espero (paperezkoa bai baina ez digitala) eta Amazonen erostera joan nintzen. Ingelesez 2,29 Eurotan zegoen eta gazteleraz, 7,50 Eurotan. 7 Euro ez da gehiegi, baina horrelako aldearekin haserretu nintzen eta deskarga libreen webguneetan hasi nintzen bila. Ez nuen aurkitu eta horrek libratuko du oraingoz. Horren ordez deskargatu dut ingelesezko muestra, eta gustora irakurtzeko gai banaiz, ingelesez erosiko dut.

 

Hurrengoan idatziko dut nola beste erabilera batzuk aurkitu dizkiodan Kindleari, txuleta moduan eramateko edo RSSak irakurtzeko adibidez.

EGUNERAKETA: DRMa apurtzeko beste erreferentzia bat jarri dut, lehengoan zenbait informazio falta zen eta. Bide batez, Javier Vizcaino kazetariak sufritu du DRMen gaia eta artikulu argigarria jarri zuen bere blogean: Fnac, Kindle, Ebook... Crash!

Nola mugitu fitxategiak bi ordenagailuren artean

Gari Araolaza 2012/06/30 22:25
(Ubunturekin, noski) Sarritan bi ordenagailuren artean hainbat fitxategi mugitu behar ditugu. Bide azkar eta sinpleena hauxe da:

Zabaldu terminal bat eta mugitu fitxategiak dauden karpetara cd erabiliz. Gero, zerbitzatu direktori hori web zerbitzari moduan, ondoko komandoaz:

python -m SimpleHTTPServer

Beste makinan, zabaldu nabigatzailea eta joan helbide honetara:  http://zerbitzariaren-ip-a:8000/

Voila! Python rulez!

Hemendik ikusi eta itzulia: How can I transfer files between two Ubuntu computers on a LAN without installing additional software?

Arditurrira bizikletan

Gari Araolaza 2012/05/07 11:18
Larunbatean bizikleta ibilaldi polita egin genuen, Oiartzungo Arditurrirainoko bidegorrian.

Eibar aldetik inbidia handiaz ikusten ditugu inguruan egiten ari diren bidegorri guztiak. Azkenaldian probatu ditut Markinakoa, Soraluze-Bergara, Urkulu, Azkoitia-Zumarraga, Plazaolakoa eta larunbat honetan Arditurrikoa. Etxetik bizikletan ateratzeko aukera ematen diguten arte, bizikletak autoan sartu eta hor ibiltzen gara batera eta bestera.

Arditurriko bidegorria

Arditurrikoa bereziki gustatzen zait, batez ere azken loturekin posible delako Donostiako Boulebarretik Arditurriraino bizikletan umeekin joatea. Alderantziz planteatu daiteke agian: bidegorria erabiltzea Donostiako erdigunera egunpasa iristeko. Pagotxa: arriskurik gabeko 18 kilometro inguruko bidea.

Larunbatean Kisale bizikleta dendak irteera antolatutako irteeran parte hartu nuen (CodeSyntax gure enpresa Kisale dendaren parte da). Nere umeen adinagatik ibilbidearen tarte bat egin genuen bakarrik, baina oso gustora! Gero, Oarsoaldeko turismo erakundeak gonbidatuta, hamaiketakoa egin genuen Olaizola jatetxean, eguzkia ere irten zen, umeak errekan jolasean... Ederra plana!

Olaizola jatetxean hamaiketakoa

Hurrengorako gelditzen zaizkigu Arditurri mehazuloetarako bisita eta Artikutza ezagutzea, baina horietarako prebisio handiagoa behar izaten da, eguna eta ordua lehenago hartu behar izaten direlako.

Laburbilduz Oiartzun inguruan gustatzen zaizkidan tokiak:

 

Argazkiak: Mikel Lizarralde (CC-BY-SA)

Nafarroako gazteluak ezagutzeko aukera

Gari Araolaza 2012/04/10 23:54
Apirila osoan, maiatzak 6 arte, Nafarroako hainbat gaztelu eta jauregi doan ezagutzeko aukera duzue.

Nafarroako gobernuan antolatutako "Agur gaztelukoari!!" ekimenaren barruan, hainbat jauregi eta gaztelura bisita egin daiteke.

Aste santuan egin diegu bisita Amaiurkoari eta Iruritakoari. Biak ere oso-oso interesgarriak. Gida biak historian oso jantziak, detaile eta gusto guztiz azaldutakoa gainera. Aprobetxatu asteburua eta egin buelta, merezi du eta.

Gaztelu horietako asko bisitatu datezke beste garaietan, baina normalean 5 euro inguruko sarrera kobratzen da kasu bakoitzean.

Nafarroako gobernuak beraien webgunean jarri du zein gaztelu diren eta nola egin behar den erreserba. Berriro diot: aprobetxatu!

Agur gaztelukoari! Azalpen eta egutegi osoa

Autismoa: jabetzea ongi dago, baina gehiago behar da

Gari Araolaza 2012/04/03 10:43
Egun hauetan izan da autismoaren egun internazionala. Hainbat artikulu ikusi dut mediotan, Boing-boing-ekoa iruditu zait interesgarria.

Autism: awareness isn't enough artikuluan aipatzen da Steve Silberman ikerlaria, eta bi puntu azpimarragarri irakurri ditut:

Lehen baino autismo gehiago dago?

Autismoa goraka joan da azken urteotan. Urtero kasu gehiago diagnostikatzen ari dira; une honetan AEBtan 88-tik batek omen du autismoa. Batzuentzat hori albiste txarra da, eta hortik atera dira oinarri gabeko hainbat teoria, txertoek eragiten dutela eta abarrekoak.

Baina zientzilarien ustetan, diagnosia da aldatu dena, eta horrek dakar goizago eta hobeto diagnostikatzea autismoa. Eta hori albiste ona dela uste dut. Izan ere, zenbat diagnostikatu gabeko autismo egongo da hor bazterretan?

Nola tratatzen ditu gizarteak?

Autismoaren arazo nagusia Silbermanen ustetan, gizarteak autismoarekin duen erlazioa da. Umeen kasuan bideratzen ari dira gauzak, baina haur horiek nagusitzen direnean adaptazio arazoak izaten dituzte. Gizartearen jokaera arrunta desberdintasunak azaleratzea da, desberdintasun horiek onartu eta integratu beharrean. Gainera, diru gehienak bideratzen omen dira autismoa ikertu eta prebentziora. Aldiz, gizarteratzean sortzen dira arazo handienak eta horretarako ez dago dirurik.

Izan ere, errespetua, laguntza eta inklusioa dira askoz garrantzitsuagoak, berez okerrik ez duten umeak sendatzen saiatzen ibili beharrean.

Herri bakoitzean errausgailu bat

Gari Araolaza 2012/02/26 10:21
Zaborrez beteta gaude eta hala ere inguruan ez dut sentsibilitate handirik nabari. Badirudi oraingoan ere "arazoa konpon diezadatela" dela jendearen erantzuna.

Eibarren berriki ezarri dute kale batzuetan kontenedore marroia. Oraingoz aukerakoa da, norberak erabakitzen du birziklatu nahi duen ala ez. Niri ez zait tokatu, baina tokatu zaion norbaiti entzun diot bere pegoran gutxik hartu dutela aukera hori.

Ez gaude mentalizatuta. Zaborrak gureak dira, ez dira inorenak. Guk botatzen ditugu janari, patata azal, plastiko eta yogur poteak. 

Bi aukera ditugu: arazoa guk konpondu edo norbaiti (asko, izugarri!) ordaindu lan hori egin dezan. Nik uste dut ohitura kontua dela, eta horrela denez, hobe ohiturak aldatzea, ala?

Proposamen bat: Foru Aldundiak planifikatu ditzala errausgailu txikiak, ia herri bakoitzean. Kontzientzia batzuk esnatuko ditu, ala?

Argazkian, gure enpresako bulego parean dauden Azitaingo errausgailu zaharrak. Errausgailuak ez dira atzo gaueko asmakizuna.

Eibar - Incineradora

Aurkezpena

naiz. Teknogauza guzti hauetaz idazteko sortu nuen bloga, baina orain gai eta maiztasun librean nabil.