Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Eibartik

Haurdunaldiarekin eta ume jaioberriekin zerikusia duen hiztegia

Asier Sarasua 2005/04/11 12:45

Haurdunaldiko berbetia Haurdunaldixakin eta ume txikixekin zerikusixa dauken dozenaka berba erabiltzen dira Eibarren. Atzo, buruari bueltaka, eta dozena erditxo bat etorri jatazen burura; batzuk etxian entzundakuak, beste batzuk Toribion Lexikoian edo Hiztegi Etnografikuan agertzen diranak.

Berba berezi xamarrak. Berba estandarrak baino, lagunarteko hizkerakuak. Horixe da gaur egungo euskeriak daukan zulo haundixenetako bat, lagunarteko hizkeria, berbeta berua, adierazkorra.

Hamentxe batzuk; beste mordua be badagoz:

>> Hankagorrixa: ume jaixobarrixa, egun gitxi daukazena. Inoiz konturatu zarie ume jaixobarrixak zelako hanka gorritxuak eukitzen dittuen? Hola da, bai.

>> Mantetako umia Ume txikixa, mantetakua, egun-aste batzuk besterik ez dittuana.

>> Bete haurdun geratu. Beteta: haurdun egon

>> Hartubarri: ointsuan haurdun geratu dan andria. "Hartubarri dago".

>> Zilletik egin zesarea bittartez jaixotzia, zilletik, izan be.

>> Erroibia mastitisa (edo mamitisa). Gaur egun oindiokan basarrixetan asko erabiltzen da berba hau, baina ganauakin.

 

2005. urteko "Juan San Martin beka"

Asier Sarasua 2005/04/11 07:51

Eibarko Udalak, Udako Euskal Unibertsitatearen laguntzarekin, euskarazko ikerketa sustatzeko eta Juan San Martin eibartar euskalari eta ikertzailea omentzeko, bere izena daraman ikerketa-beka atera zuen duela 4 urte.

Beka hori urtero kaleratzen da, baina ikerketa esparrua aldatuz. Aurtengoan Zuzenbidea eta Filosofia izango dira aztergai.

Aurtengo beka-deialdiaren inguruko informazio guztia gaurko Gipuzkoako aldizkarian

Dena dela, eskaerak eta gainontzeko agiriak aurkezteko epea irailan zabalduko da. Aurkeztu nahi duenak hilabete batzuk itxaron behar. Tokiko Gobernu Batzarrak 2005-03-18an 2005eko Juan San Martin Beka lehiaketaren oinarriak onartu zituen.

Helburua:

Eibarko Udalak, Udako Euskal Unibertsitatearen laguntzarekin, euskarazko ikerketa sustatzeko eta Juan San Martin eibartar euskalari eta ikertzailea omentzeko, bere izena daraman ikerketa-bekarako deialdia egiten du.

Bekaren ezaugarriak:

Ikerketa esparrua: Zuzenbidea eta Filosofia.

Proiektua, azterlana eta memoria euskaraz burutuko dira.

Bekaren iraupena gehienez 12 hilabetekoa izango da, beka esleitzen den egunetik hasita.

Ikerketa-lanak jatorrizkoa eta argitaratu gabea izan behar du.

Eskatzaileak:

Beka norbanakoek nahiz horretarako osatutako lantaldeek jaso ahal izango dute. Bigarren kasu horretan, ikerlanaren zuzendari arduradun bat izendatu beharko da.

Beka jaso ahal izateko ezinbestekoa da diplomatua, maila horretako tituloduna edo goi mailako tituluduna izatea. Taldeen kasuan, gutxienez erdiak bete beharko du baldintza hori.

Eskatzaileak bere euskarako gaitasuna frogatu beharko du EGA edo baliokide den titulu edo diploma bidez. Lantaldeen kasuan berdin, partaide guztiek frogatu beharko dute aipatutako gaitasuna.

Eskaera aurkezpena:

Eskaerak eta gainontzeko agiriak aurkezteko epea 2005-09-05etik 2005-10-14ra arte egongo da zabalik, biak barne.

Argibideak eta agiriak eskuratzeko modua:

Erakundea: Eibarko Udala.

Saila: Herritarren Zerbitzurako Bulegoa (PEGORA).

Helbidea: Untzaga Plaza 1.

Herria eta posta-kodea: Eibar 20600.

Telefonoa: 943.708.400.

Telekopia: 943.708.416.

Jendea hartzeko orduak:

—Irailaren 8rarte: 9:00-13:30.

—Irailaren 9tik 30era:

Astelehenetik ostigunera: 09:00-13:30, arratsaldeetan: 17:00-20.00.

Ostiral edo barikuetan: 09:00-13:30.

—Urria:

Astelehenetik ostegunera: Goizez 09:00-14:00. arratsaldez: 17:00-20:00.

Ostiral edo barikuetan: 09:00-14:00.

Eibar, 2005eko martxoaren 16a.—Iñaki Arriola López, Alkatea.

Argiñeta, Elorrio

Asier Sarasua 2005/04/08 20:30

Argiñeta, ElorrioAulestiko kontuak kontatzen hasi nitzan lehengo egunian, eta Argiñeta etorri jatan burura.

Argiñeta Elorrixon dago. Orain dala pare bat asteburu izan giñan bertan. Domeka arratsaldia, iluntabarra, egualdi politta, bakar-bakarrik... eta Argiñetak Erdi Arora eruan ginttuan.

Argiñeta, ElorrioSan Adrian ermitta politta erdi-erdixan, beran inguruan 20 bat haritz eder, eta tartian, ermitta pare-parian, harrizko 20 hilobi eta bost hilarri. Hilobixak X. mende ingurukuak ei dira, bisigodo kristiñauenak. Batzuetan inskripziño batzuk be irakorri leikez.

Ingurukua baldin bazara, eta arratsalde baten jakinezta zer egin baldin bazare, juan Argiñetara. Politta da.

Argiñetara heltzeko, Elorrixora juan, eta Elgetarako igoera hasieran, ezkerretara sartu. Bidegurutze horretatik kilometro batera dago Argiñeta.

Argiñeta, Elorrio

Hauteskundeak indartsu Eibarren

Asier Sarasua 2005/04/07 15:12

Ibarretxe Eibarren


Aurtengo hauteskunde kanpainia nahiko makala dala esango neuke. ETB ikustia besterik ez da bihar: lehenengo albistia Wojtyla, bigarrena Rainiero, eta hirugarrena hauteskundiak. Madrilgo komunikabidiak be ez dabiz aurrekuetan bezin sutsu eta zalapartalari.

Baina Eibarren asko animatu da kanpaiñia azkenengo egunetan.

Atzo arratsaldian Ibarretxe Eibarren. Kontrarixuan etxian, esan leike. Euskal Herriko Casa del Pueblo haundixenaren parian ipini zeben furgonetia, Untzaga plazan, eta globoz bete zittuen inguru guztiak.

Ibarretxe EibarrenHitzaldixa Untzaga zineman izan zan. Kanpuan ez zan jende larregirik ikusten, baina telebisiñuan ikusten zan zinia jendez gaiñezka egon zala.

Sartu aurretik, Ibarretxek pasiotxo bat emon zeban, eta laztanak a-tuti-ple. Ridikulo samarra iruditzen jata politikuak umieri laztanak emoten ikustia. Baina hauteskundiak hauteskude!

Erregaloz beteta etxera

Ibarretxe EibarrenPolitikuen erregaluak jasotzia nahi badozu, onena umia eukitzia da. Bezperan, harañegun, sozialistak larrosa bat emon zetsen Maddiri; atzo arratsaldian PNVkuak karameluak; eta goixian, PPkuak, Euskaltelen globo bat.

Gaur beste osteratxo bat egingo dot, ia bateron batek afaittara gonbidatzen gaittuan.

Ez, Katixa, oindiño Ferrero Rocherik ez, baina datorren hauteskundietan, larri ibili.


Gaur Patxi Lopez

Eta gaur arratsaldian (eguena), Patxi Lehendakari egongo da gure artian. Miguel Buen eta Alberto Perez Rubalcaba lagun dittuala, hitzaldixa egingo dau Portalean. Arratsaldeko 19.30etan.

Eta Maria San Gil? Ba ez dakit. Etorriko ete da? Gustauko jatan. Laztan pare bat emoteko.

Andaparaburu, Aulesti

Asier Sarasua 2005/04/06 23:51

Andaparaburu, Aulestia Domekan Lea-Artibai inguruan ibili giñan, pasiuan. Leku politta da inguru guzti hori, eta sarri juaten gara.

Lagun batzuk esan zeskuen Aulestin badagola leku polit bat, eta bertara juateko. Erreka onduan, ondo zainduta, eta umiekin egoteko aproposa.

Juan giñan, bai, eta merezi zeban. Parketxo bat besterik ez da, erreka albuan, baina ederto ipinitta. Domekan gaiñera, egualdi zoragarrixa egin zeban, eta jende gitxi; oso gustora ibili giñan.

Andaparaburu jako izena. Kunbua dago bertan, presia, eta andaparia (eta anteparia). Hortitxik izena.

Udan errekan bainatzeko aukeria be ba ei dago. Ura garbixa dagola esan zeskuen. Ikusiko dogu animatzen garan.

Ficedula hypoleucaHan gendela eulitxori baltz bat be ikusi neban (Ficedula hypoleuca). Pase denboran nahiko ugarixa da, baina azken urtiotan ez dot ikusi izan.

Sasoi honetan, eta hain lasai, gitxiago. Andaparaburun gendela, hantxe ibili zan gure aldamenian, errekako egur baten gaiñetik ehizan. Euli bila. Zelan ez.


Malax

Arratsaldian, etxeruzkuan, Munittibartik etorri biharrian, Santa Eufemia ingurutik etorri giñan, mendiz. Aulestia eta Markina bittartian Malax auzua dago, eta inguru hori be ederra da.

Ikusi bidetik bertatik etara genduan erretratua. Malaxeko ermittia, eta atzian, Santa Eufemia ingurua.

Malax



Ibarguengo garaixa

Ibarguengo garaiaEta etxeruzkuan, Eibarrera heldu aurretik, Ibarguengo garaixan albotik pasau giñan. Ez, ez da Galizia, Markina da. Naparruan normalaguak dira garaixak, Pirinio inguruan gehixenbat, baina gure aldian be egon izan dira.

Nik dakidala, Eibar inguruan bi bakarrik geratzen dira tente: Bergarako Agarre, eta Markinako Ibarguen. Bixak ondo zainduta eta ederrak. Iurretan be badago beste bat, ETBrako sarrera onduan.

Ibarguengua ez badozue ezagutzen, merezi dau. Eibartik juanda, Agiñatik Markiñarako bidian dago. Bide baztarrian, Barinagatik bertan.

Goierriko euskara batzeko hainbat asmo

Asier Sarasua 2005/03/26 22:55

Goierriko euskaraAzken urteotan izugarri ugaritu dira herri hizkerak, euskalkiak eta ahozko ondarea batzeko lanak. Orain dela 20 urte zorakeria eta antinaturala zena, modan jarri da, eta orain urtero kaleratzen diran hemengo edo hango euskara jasotzen duten lanak. Poztekoa ere bada.

Bizkaian asko, Nafarroan ere ugari, Iparraldean eta Gipuzkoan gutxixeago. Gipuzkoako sartalde honetan bai, jakina (Eibar-Bergara-Leintz inguruan), baina alderdi giputzean askoz gutxiago.

Goierri, baina, Gipuzkoako gainontzeko eskualdeen aurretik dago kontu horietan. Aspaldi jaso zuten Ataungo euskara, Zegama aldekoa ere bai, eta azken urteotan lan dexente egin eta kaleratu dira. Onena, nire ustez, Zaldibiako euskara jasotzen duena (Karmele Etxabek eta Larraitz Garmendiak egindako lana). Xabier Lasak Zumarraga-Urretxukoa batu du azken urteotan, eta aurten bertan kaleratu du liburua (liburu sakon eta ona, gainera). Ordiziko euskara biltzen duen liburua ere duela hilabete gutxi kaleratu zen. Eta Beasaingo udalak bertako euskara eta ahozko ondarea jasotzeko beka bat kaleratu du. Ormaiztegikoa batzea falta.

Guzti horiekin, esango nuke Goierriko hizkera oso ondo jasota geratu dela. Herri txikietako euskara jasotzea gehiago kostako da (Gaintza, Gabiria, Arama...), baina ez dut uste inguruko herrietako hizkeratik asko aldenduko denik.

Zorionak, bada, Goierritarrei, euren hizkera eta tradizioa biltzen eta euskaldun guztioi zabaltzen egindako ahaleginagatik.

Euskera/Euskera kartel elebidun ridikuloei ez!

Asier Sarasua 2005/03/21 14:55

Ridikuloak iruditu zaizkit beti erakunde publiko askotan egoten diren kartel elebidun zentzunbako batzuk. Hainbat udaletxetara sartu, eta peoran bertan: letra handi-handitan:

  • Kultura/Cultura
  • Biblioteka/Biblioteca
  • Euskera/Euskera

Ridikuloa.

Orain dela egun gutxi Eibarko anbulatoriora joan behar izan dut. Orkatila makal darabilt azkenaldian eta traumatologoarengana.

Denbora dexente egin behar izan nuen zain, eta kartel guztiak irakurtzeko astia izan nuen. Gehienak euskara hutsez zeuden; gaztelaniazko itzulpenik ez: Traumatologia, Kardiologia, Elektrokardiograma, Audiometria, Urologia...

Gustora irten nintzen. Euskararen aldeko diskriminazio minimo horrekin gustora.

Zelako gutxirekin pozten garen batzuetan. Ai ene.

Eta orkatila? Orkatila txarto. "No voy a decir que seas viejo, pero es normal ya que tengas achaques". Rehabilitazioa zenbait hiletan, eta udarako bizitza normala egiteko moduan egongo naizela. Hori bai: kirola betirako ahaztu behar.

Haizeak (eta II)

Asier Sarasua 2005/03/18 09:10

Faustino artista hutsa da. 1904an Agiñaga auzoko Arando Aurtena basarrixan jaixua, 100 urte bete zittuan aboztuan. Orain dala pare bat urte elkarrizketia egin gentsan. Gauza mordua kontau zeskuzen, berak dakan grazia horrekin.

Hamentxe zatitxo bat.

---------------------------------

HAIXIAK ETA TRUMOIAK

Faustino Larrañaga
Arando Aurtena, Agiñaga, Eibar
1904
2002an egindako elkarrizketa

Horrek, ba, ifarra... ifarra egoten da udan, ezta? Ta gauza ederra da, ifarra! Bero haundixan ondoren ifarra etorten da. Goixeko hamarrak inguruen urteten dau ifarrak! Ifarra ederra! Baiña nordie txarra! Nordetik.... Nordie, hemen, Gernika aldetik etorten da. Zelakua dan? Haixerik ez da ikusten, zelakue dan! Haixie ezkutuen ibiltten da! Baiña, nordiek tenporaldi txarra! Iparra da sikue; iparra da hamen Kalamua aldetik joten dabena. Baiña iparra jeneralien egoten da, tenporal ona, udan, ipar-haixie dala, ta denpora ona. Baiña "nordian ikutua, ta nordia etorriko da laster" ta bai etorri be laster! Nordiek txarra dakar beti. Eurixe, edo edurre, edo sasoien klase danetarakuek.

Eta mendebala, ba, mendebala dagonien denpora biguna egoten da jeneralien: etxiek be bustitte iguel egoten die, ta... Mendebala bigune da. Baiña mendebalak ekarten dau denporian mudanzie. Mendebala etxe barruen, ta zeoze etorri be bai; mendebalak zeozer beti ekarten dau.

Ta itxos-haxie be egoten da lantzien behin, itxos-haxie. Ondarrua aldetik etorten da ha be; itxoshaxie esaten jako hari. Itxos-haxie ez da ona! Itxos-haxie berdie da, berdie! Itxosotik datorren haixie berdie da. Hotza! Hotza, bai. Itxos-haxie? Itxos-haxie berdie!

Haixie, epela da hegoie. Trumo-denporie beti da epela, trumokue. Haretxek joten dau trumoi berotik. Neguen hotzetik be joten dau iñoz, ta udan berotik jeneralien. Urten dau laiño-moltzuek –iñoz ikusiko zenduan laiño-moltzue udan– eta harek trumoijoten egoten dira beti, harek laiñomoltzuek. Trumon-adarrak joten nunonun, guk sentidu ez arren! Ta noberan parera etorrittakuan, hankak altzau bai? ta.... Badezpada be!

Faustino Larrañaga

---------------------------

  • Oharra: Faustino Agiñagakua da, eta inguru horretan ez da Eibarko kaleko berbeta berbera eitten. Markiñako euskerian ikututxua dauka.

Haizeak: hegoi / ifar / mendabal / norde

Asier Sarasua 2005/03/17 23:45

Aurreko astietako hotz eta edurren ostian, epela etorri da. Hegoia ibili da azken egunotan. Hegoia, nordia, ifarra, mendabala... haiziak nundik jo, egualdixa holakua.

-----------------------------

hegoi viento sur. • Erab. Artikulua hartzerakuan hegoia egitten dau (ez hegoixa). Izan be, hegoe da jatorriz. Sin. hego-haixe, andra-haixe, zoro-haixe.
Hegoia eta hego-haixia, dana da bat: hori beruori, pikatzen dabena. Gaur goixian be edarto pikatzen izan dau, hegoia egon da-eta.

hegoi-erre viento sur muy cálido. • Ik. goierre.

euri-haixe viento que precede a la lluvia. • Trunboiak eta frontiak heldu aurretik agertzen dan haixe gogorra, gehixenetan hego-mendebaldekua. Egualdixa aldatu egin bihar dala esaten deskuan haixia.

ifar viento seco y frío de componente norte o este. • Lekuko bakotxandako (eta basarri bakotxian), ifarrak ez dau leku beretik joten. Iparretik edo ipar-ekialdetik jo leike. Dana dala, haixe hotz eta lehorra da, udan sargorixa freskatzen dabena (N edo NE), eta neguan izotza dakarrena (NE gehixenbat, baiña baitta E be). TE-k be antzera dakar: "Se dice de las brisas que proceden del Cantábrico y en verano refrescan los lugares en que se deja sentir". Ald. ipar, ifer.
Esak. Pobrian harroaldixa, ifarran argialdixa.
Ifarrak hortik joten dau, mendebalak hortik, eta ifar-mendebala da... hor egon da ba lehen lainua eta eurixa eta hori ganorabakuori?, haxe da, sekula ganorabakuaua, pelelia. Garbi-garbi esanda, pelelia... Ifarra bai, ifarra ona da, egualdi edarra eta freskua, baina mendebal lelua... aiii... Eta oin mezklia dabil, e?

mendabal viento de componente oeste, muy húmedo. • Haixe umela, hormak bustitzen dittuana eta eurixa dakarrena. TEk be antzera dakar: "Se dice en Eibar de un viento templado que precipita el vapor de agua del aire y determina un ambiente aguanoso". Ald. mendebal, bendabal.

norde viento norte o noroeste; frío y lluvioso. • Eibarrera ipar-mendebaletik edo iparraldetik sartu leikian haixia, baiña gehixenetan itsasotik datorrena; hotza eta euritsua, egualdi berdia dakar. Ald. norte, nordaixe.

Ume berbetia

Asier Sarasua 2005/03/14 15:50

Lehenago ere ekarri dut gai hau blog honetara, Azpeitiko haur hizkera aipatu nuenean, edo patxito eta bihotzito entzuteak sortzen zidan bihotzerrea kontatu nuenean.

Gaur Eibarko ume berbeta ekarriko dut. Umeekin erabiltzen diren berbak eta soinuak. Gehienak Eibarren entzun eta jasotakoak dira; inguruko herrietan (Bergaran eta Debagoienan) erabiltzen diren batzuk ere sartu ditut. Esango nuke nahiko orokorrak direla gure azpieuskalki osoan.

Hementxe, ba:


ahatea: bili-bili
alua (sexua): potxoliña, poxpoliña
amaitu: bapo egin, papo egin
ardia: bekeke
arrautza: koko
automobila: popota, popo, tutu
behia: aida, mumu, nonua (Arrasate)
besoetan hartzeko: aupa
bizkar gainean: arretxiko
bizkarrean hartuta saltoka: trakatan-trakatan
erori: punba egin, punbala
eseri: apatx egin
esnea: nene, ninia
ezkutatu: kuku egin, kiki
gauza zikina: kaka
hagin: txatxur
haragia, arraina: txitxi
haur txikia: ninia
indizioa: txista-txista
jan: ñañan, nanan
jo: tas-tas egin
kalera joan: apapa joan
kanpaia: tilin-talan
karamelua: mamelu
katua: mix, mixi
kili-kolo: kilin-kalan
kolpea (buruarekin): kaxk
laztana, musua: pa, ma, patxo
lo egin: lolo
mamua: koko, momo
mina: pu-pu
motorra, traktorea, automobila…: burrun-burrun
musika, dantza: txunda-txunda
negar egin: mañak egin
ogia: papa
oilarra: kukurruku
oiloa: koko, purrak
oinez ibiltzea: tipi-tapa, ttaka-ttaka, taka-taka
pixa egin: pix, txix
puzkerra: purrutt
sartu: txasta egin
sua: fu, fufu
txakurra: uau-uau, toto
txalo jotzea: txalo-txalo
txerria: kurrin-kurrin
txintxauna, ziburua: tilin-talan
txokolatea: koko, kokole
txoria: txio-txio, pipi
txupetea: tete
ura edo beste edozein edari: mama
uretan ibiltzea: plixti-plaxta, txipli-txapla
zakila: pipilina, pitilina, txilibitua
zeozer eskaini eta eman ez: tati egin
zilborra: ttirrin, tirrin, txirrin
zintz egin: txintx

Aurkezpena

Eibar, Euskalkiak, Natura, Etnografia

Asier Sarasua Aranberri

Eibar, 1969. Naturzalea txikitatik; txorizalea joan zen mendetik; euskaltzalea betidanik. Sasibiologoa eta sasifilologoa. Txoriak ez ezik, txori-izenak ere behatzen ditut han-hemen. Blogroll ibiltari bat ere banaiz.

..........................

Blog honetako testu original guztien lizentzia: Creative Commons by-sa.

Somerights20

..........................

Blog honetako gai nagusiak

Sarean

Asier Sarasua Aranberri Twitter

Asier Sarasua Aranberri Flickr

Asier Sarasua Aranberri Facebook

Liburu eta proiektuak
Lehen Hitza Euskaraz