Ingelesen hilerria

CodeSyntax enpresa zabalduz doa. Aldameneko aretoa ere hartu dugu, Tagzania Services luzapenaren egoitza izango da. Lanean hasiak zeuden oporren aurretik, baina irailean zuloa egitea tokatzen zen.

Ez dakit zergatik, pentsatzen nuen irekiera izango zela RUN DMC-ren Walk This Way bideo mitikoan bezala (ikus beherago).

Argazkiak.org | CodeSyntax-en bulegoko paretean zuloa © cc-by-sa: codesyntax

Baina ez da hala izan. Konpasarekin bezala marraztu, eta zulatu dute biribila. Geratu denak Stargate dakarkio gogora nire lankideri bati.

Niri, ez dakit zergatik, Julian Iantzik aurkezten duen programa japoniar baten kopia hori gogoratzen dit: pareta hurbiltzen hasiko zaigula zulotik salto egin dezagun...

Dena dela, Maite Rementeria diseinatzaileak uste zuen hormak margotzeko garaia ere iritsia zela, gure identitatea markatu izan duen berdea gorriarekin ordezkatzeko. Fotomuntaketa egin zuen, eta inork mu esan aurretik, pintoreak lanean izan dira, eta egin dute.

Argazkiak.org | CodeSyntax gorrituta © cc-by-sa: codesyntax

Mezu hau amaitzeko, hemen agertuko zaizu Steve Tyler pareteko zulotik:

Arte modernoa ikuskizun tonto baina dibertigarri bat besterik ez da. Edozerk balio du. Baina ikusgarria eta dibertigarria suertatzen da, eta aire girotua badago udan eskertzen da bisita fresko bat supermodernitatearen tenplu berri horietara: hiri bakoitzak berea merezi du, eta Bilbon Guggenheim bazuten, orain Donostian Tabakalera daukagu eta Nafarroan Uharteakoa topatu genuen duela egun batzuk, galdu egin ginelako Iruñearen zeharbidea egiten Orreagarako bidean (albotik pasatzean, zer ote hau? gelditu, eta ikusi genuen).

Modernokeria hauek bisitatzen oso ondo pasatzen dut. Nire umeek ere disfrutatzen dutela uste dut. Batez ere, bi baldintza betetzen badira.

• Doan bada
• Argazkiak egiten uzten badizute.

Alderdi honetatik, Guggenheim oso txarra da, Tabakalera erdipurdikoa ze ez dute uzten argazkirik normalean eta estraperloan ibili behar duzu, eta Artium ez dakit ze ez naiz sekula Gasteizkoan ibili. Baina onena, Uhartekoa, Iruñea inguruan. Doan, eta nahi beste argazki.

Tabakaleran arte latinamerikarreko boutade zenbait ikus daitezke orain. Horien artean, legoz egindako hilkutxa polit hau. Koloreak Kolonbiako banderarenak dira, eta goiko marra zuria kokaina esan nahi du. Artistak eskatu du bere gorpua hemen enterratu dezatela hiltzen denean. Eta enterratu ondoren 10 urte igarotakoan, atera dezatela, hondakinak bota, eta lego piezak Kolonbiako umeei banatzeko. O, ze sakona.

Argazkiak.org | Fernando Arias, Lego hilobia © cc-by-sa: Luistxo.F

Beste hau txanpon mordo bat ziren lurrean... Goitik zintzilik ganadu hezur batzuk ere bazeuden.

Argazkiak.org | Cildo Meireles © cc-by-sa: Luistxo.F

Kontuan izan goiko argazki hauetarako Tabakalerako zaintzaileei aurre egin behar izan niela. Eskerrak Maider Undaren bloga irakurrita, borrokan egiten badakidan orain. Kanpoan Joxan Muñoz zuzendaria ere aurkitu nuen. Harrigarria bada ere, ez zidan esan sarrera debekatuko didatenik.

Uharteko dena-delakoa berriagoa da (eraikina batik bat), eta modernoagoa. Zenbait erakusketa zeuden. Kader Attia aljeriarrak mezu globalizatzaileak igortzen ditu (edo holako zerbait). Horra bere bidoiak otoitzean, uralitazko teilatuak eta superreko poltsa hutsak.

Argazkiak.org | Kader Attia, bidoiak © cc-by-sa: Luistxo.F

Argazkiak.org | Kader Attia © cc-by-sa: Luistxo.F

Argazkiak.org | Kader Attia, poltsak © cc-by-sa: Luistxo.F

Erakusketa kolektibo bat ere bazegoen. The New Normal. Taldelana edo. Mezu ustez politikoa. Enfin, butaka bat, ohe bat, edozer...

Argazkiak.org | The New Normal © cc-by-sa: Luistxo.F

Argazkiak.org | The New Normal, Huarte Zentroa © cc-by-sa: Luistxo.F

Txorakeriak txorakeria, niri are tontoagoa iruditzen zait mezu politikoa dagoenean tartean. Horregatik, Attia edo The New Normal baino, gehiago gustatu zitzaidan Ana Solerren Eskatu Desio Bat erakusketa, zeinaren mezua ludikoa iruditu zitzaidan (igual oker nago baina!), eta Japoniara astesantuan egindako bidaiaren kontuak ekarri zizkigun gogora, hango kultura zahar eta berriaren keinuen irakurketak baitziren CC artistaren lanak.

Argazkiak.org | Desio bat eskatu © cc-by-sa: Luistxo.F

Erakusketaren izena zetorren desio idatzien kontutik. Japonian txanpon batzuk ordainduta, tenpluetan idazten dituzu zure desioak paperetan, lokarritxo bat eginda zuhaitz edo alanbreren batean uzteko tenpluan. Uhartekoa ez zen tenplua, baina gonbidapena euskaraz egitea ere eskertu genuen, eta desioak eskatu ere bai.

Argazkiak.org | Ana Soler, metro-mapa gizatiarra © cc-by-sa: Luistxo.F

Argazkiak.org | Ana Soler, metro-gorputza © cc-by-sa: Luistxo.F

Giza-gorputz bat ere bazegoen, metro mapa baten gisa paretean. Japonierazko eta gaztelaniazko berbak agertzen ziren estazioen tokietan, baina Tokyoko bertako benetako geltoki izenak ere bai, lagun eusko-japoniarren etxetik gertuen zegoen Shinagawa lotune handia bezala, Tokyo hegoaldean.

Argazkiak.org | Origami, Ana Soler © cc-by-sa: Luistxo.F

Argazkiak.org | Origami © cc-by-sa: Luistxo.F

Ehundaka origami txorik osatzen zuten multzo delikatu hau ere polita zen oso.

Txoroagoa iruditu zitzaidan lurreko anime-manga figuren jolasa baina, tira, hori ere oso japoniarra.

Uhartetik hegoalderago, Zaragoza Expora ere iritsi ginen abuztuan. Hiru egun egin genituen erakusketa-aretoan. Ez zuen merezi. Kola izugarria, eskulangintzen eta kuriositateen feria bat ikusteko. Eta zelako ilarak. Puff. Nire ustez, ustezko eko-mezu trazendentaletatik harantzago, arte kontzeptualetik gertuen zeuden instalazioak ziren gehien ikustea merezi zutenak. Adibidez:

Argazkiak.org | Lili Koreako pabilioian, Expo Zaragoza © cc-by-sa: Luistxo.F

Koreako pitxar mordo bat. Hona inork ez zuen sartu nahi. Aldamenean 3d proiekzio txoro baterako, sekulako ilarak zeuden.

Argazkiak.org | Galiziako pabilioia, Expo Zaragoza © cc-by-sa: Luistxo.F

Argazkiak.org | Galiziako pabilioia, Expo Zaragoza © cc-by-sa: Luistxo.F

Pixelazioarekin jokatzen zuen instalazio galiziarra. Gertutik, kristal koloreztatu mordoa besterik ez zen ikusten. Baina kamera digitalaren begian ikusten zen ondo, txikitutakoan... Pixelekin jarraituz, pixelazio isometrikoaren nazioarteko artista baten lana (eBoy) ere aurkitu nuen pabilioi batean.

Argazkiak.org | eBoy Expo Zaragoza © cc-by-sa: Luistxo.F

Baina hau, tamalez, Expo ez zen doan. Eta kasu askotan, argazkiak galerazita ere bazeuden. Beraz, Expo Zaragozari suspenso, baita alderdi artistikotik ere.

Uztailean EHUko ikastaro interesgarri batean izan nintzen, mahainguruan Juan Kruz Lakasta eta Fermin Etxegoienekin. Garagardo bat hartzen ondoren, Etxegoienek Deabruaren abokatua atalerako elkarrizketa proposatu zidan (Sustrai Colinarekin tartekatuz argitaratzen ditu Argian). Egin genuen beraz, eta abuztuan kaleratu zen hori Argian. Zuzentzaile batek nire hitzak manipulatu ditu testu horretan, ze nik ez nuen idatzi Kike Amunarriz baino ez da falta, baizik eta Kike Amunarriz bakarrik falta da. Baina tira.

Aste honetan beste mahainguru batean izan naiz EHUko ikastaroetan, gaztelaniaz kasu honetan, mass-media eta blogez berriketan. Hona neure azalpen labur bat.

Neure enpresaren produktu berri bat, Argazkiak.org. Fotologa euskaraz, doakoa, librea, mugarik gabea (nahi beste argazki).

Erraza da Argazkiak.org-ekoak blogetan itsastea. Eibar.org-eko komunitatearen kasuan, HTML aukera klikatu behar da, eta hor itsatsi, Argazkiak.org-eko irudi guztien ondoan agertzen den partekatzeko kodea.

Horra, blogaren edizioa HTML blokean klikatu aurretik.

Klikatutakoan, kodea agertzen zaigu.

Itsatsi dezagun hor orain Argazkiak.org-etik ekarri dugun kodea...

Eta berriz HTML klikatu.

Emaitza polito geratuko da: txalo bero bat!

Argazkiak.org | Iñaki © cc-by-sa: Eraunzeta

Bihar, seguruenik, Espainiarekin egongo naiz. Ez dakit buruak, arimak, bihotzak ala guntzurrunak agintzen duten, baina hala izango delakoan nago. Does the body rule the mind or does the mind rule the body, I don't know, dio nire betiko faboritoak Morrisseyk, The Smithsen kantu batean.

Gogoratzen naiz orain Espainiarekin "bat eginda" sentitu izan naizen beste bi futbol partidurekin.

Estatu Batuetako mundialean (1994), Italia-Espainia kanporaketa, eta Luis Enriqueri Tassottik ukalondokada basatia arean minutua falra zela. Penalti ez zuen ikusi arbitroak. Eta enpatatzeko aukera akabo. Handik egun gutxira, pintada gogoangarria ikusi nuen Donostian, Atotxako tren azpiko tunelean:

TASSOTTI GUDARI
LUIS ENRIQUE JODETE

Lehenago denboran, Arconadak selekzioarekin jokatu zuen azken partidua. Eurokopako finala Parisen (1984), Frantzia-Espainia. Hankartetik sartu zioten Arconadari bere bizitzako golik tontoena. Orduan pena eman zidan, orain Realeko inork ez dit penarik ematen.

Amaitzera doaz ekaineko egunak, paparazzi egunak. Ikastolako edo dantza-taldearen funtzioa, musika eskolen audizioa, kirol eskolako finalak edo azken ekitaldiak... Guraso paparazzo gogaikarrion egunak dira. Haurrak zoragarri portatzen dira, baina gu? ez dago agoantatzerik nola ibiltzen garen, geure bideo eta argazki kamera digitalekin elkar molestatzen.

Baina, ai, nolako argazkiak ateratzen zaizkigun batzuetan! Eta urtzen gara irribarre tonto batekin irudiak errepasatzen ditugunean. Peru semearen ondoan, ikastolako dantza ekitaldian bikote izan zuen Zuolin txinatarra. Ez dakit, egia esan, nola idazten den Zuolin; esan, horrela esaten zaio neska polit horri.

Atzo Microsoften euskarazko produktu berrien aurkezpenean, demo efektua gertatu zen, zuzeneko teknologia aurkezpenetan ezin saihestuzkoa izaten den errore hori. Outlook euskaratua erakutsi ziguten, eta datak eta karpeta izenak gazteleraz agertzen ziren. Baina beste gauza bat egin zitzaidan deigarria, aurkezlearen Outlook pertsonala ari ginela ikusten.

Juan Pedro Isasa zen aurkezlea, Microsoft Espainiako administrazio publikoetarako jerentea (hala aurkeztu zuen Joxe Felipe Auzmendik). Karguaren asoziazioa argi ikusten dut nik: euskal administrazioan lizentziak oparoki saltzea da Microsoften helburua honetan.

Eta, hara, bilera dei batek atentzioa deitu zidan Isasaren Outlookeko egutegian. Atzo, LIPs vasco aurkezpena (LIPs horiek dira language pack hauek, interfazeak hizkuntza batean jartzeko sortzen den paketea) eta gaurko, ostegunerako, 9.00etatik 14.00etara Reunión Navarra en Madrid. Igual barne-proiektu baten izen klabea da Navarra. Edo igual da, bilerara nor deituta dagoen ikusita, Nafarroako herri-administrazioetan Microsoft produktuen inplantazio eta lizentziez tratatzeko bilera bat. Bilera mardula, edozein modutan, 5 ordu kontu horren inguruan.

Nire zalantza da, eta akaso gai-ordenean izango dute nafar administrazioa bada kontua, ea ze estrategia komeni zaien Nafarroan... Jaurlaritzari lizentziak saltzeko produktu berri hauek oso ondo datozkio Microsofti, baina nola ikusiko ote du Nafarroako Gobernuak Ukan birusaren infekzioa? Dell eta HPk, eta El Corte Inglesen dendek (Inves etxearen bidez) jatorriz euskarazko konfigurazioa ahalbidetuta izango duten ordenagailuak salduko dituzte, baina ez dakit Espainia osoan ala eremu jakin batean izango ote den. Administrazio nafarrean instalatu beharreko Vista horiek horren eskuzabalak izango ote dira konfigurazio aukeretan?

Firefox 3 bultzatzea ideia ona iruditzen zait, baina uste dut inportantea dela azpimarratzea ez bakarrik Firefox 3 euskaraz komeni dela, baita euskara hizkuntza gisa lehenestea inportantea dela (ez baita gauza bera, eta ez baitago berez konfiguratua Firefoxen, kasu bakan batzuetan baizik.

Hona adibidea:

Menuak euskaraz, baina nabigatzailearen nabigazio-hizkuntza gaztelania da. Sustatu bisitatzen baduzu eta portada horrela agertzen bazaizu, zure nabigatzailearen hizkuntza gaztelania dela agerian jarriko dizu mezu horrek (euskarazko konfigurazioarekin, ez da mezu deseroso hori azaltzen). Gauza bat da menuko hizkuntza, eta beste bat nabigazioaren hizkuntza, eta, Interneten, bereziki garrantzitsua da bigarrena, ze horrela ateratzen dituzte estatistikak web aplikazio eta guneek, zer nolako bisitariek dituzten. Eta, horra sorpresa, euskaldun gehienek gaztelaniazko konfigurazioa dute. Sustatu.com bisitatzen duen gehiengoak gaztelaniaz du konfiguratuta nabigatzailea, nahiz eta euskaldunak diren. Eta euskaldun horiek, gero Googlera doazenean, mezu bera pasatzen diote haren estatistika zerbitzuei: gaztelaniaz ari direla nabigatzen. Eta Googleri bezala, munduko zerbitzari guztien estatistika zerbitzuei. Beraz, adi, nabigazio hizkuntzaren konfigurazioa oso kontu inportantea da. Mesedez, konprobatu ezazu zeurea, eta euskaldundu ezazu.

Firefox 3ri dagokionez, aurretik Firefox 1.x edo Firefox 2.x instalatua duen makina batean ezartzen baduzu bertsio berria, aurretik zenituen hizkuntza hobespenak inportatuko ditu. Hortaz, instalatu ondoren, hartu urrats hauek ea hobespen hura egokia zen ala orain ondo geratu zaizun.

1. Behin Firtefox3 instalaturik, goiko Tresnak menuan Aukerak aukeratu.
2. Irekitzen den leihoan, Edukia aukeratu goiko ikonoen artean.
3. Hizkuntzak dioen alorrean, Hautatu klikatu.
4. Hizkuntza bat edo batzuk agertuko dira, ordena jakin batean. Euskara badago haietan lehena, ondo dago. Bestela, euskara Goruntz eraman lehena gera dadin. Agerian dauden hizkuntzen artean ez badago euskara, beheko menuan (Aukeratu nahi duzun hizkuntza) aurkitu eta gehitu, eta gero Goruntz eraman lehena geratu arte.
5. Egina. Akaso pantaila irudi honek lagunduko dizu, hor agertzen direlako hemen goian azaldutako urratsak.

Aurretik Firefoxik ez dagoen ordenagailuan Firefox instalatuz gero, zer gertatzen da? Ez dakit zein den egoera Mac-arekin, baina Windowsekin probatu dut. Kasu honetan, instalazio prozesuan sistemak galdetuko dizu ea nahi dituzun Internet Explorerreko hobespenak inportatu. Baietz erantzunez gero, hobespen horietan hizkuntzarena ere igaroko da, eta normalean Hego Euskal Herrian gaztelaniazko hobespena instalatuko zaizula esan nahi du horrek. Hortaz, konprobatzeko edo/eta zuzentzeko, jarraitu goiko 1-5 urratsak. Explorerreko hobespenik inportatu ezean, Firefox 3 euskaldun birjina ezartzen da, eta orduan, bai, berez euskara dago lehenetsita.

Baketik-ek espameatu nau berriro. Ze arraroa. Beren lehengusu Lokarrikoen ildotik jarraitzen dute. Baina grazia egin dit izenburuak: Afrikako errealitatera hurbiltze ikastaroa / Curso.

Ooo! E-postaren erabilpenari buruzko mintegi nigeriar bat Euskal Herrian!

Asteburua lagunartean igaro genuen Elosuko bazter batean, Egixa-Barren deritzon baserrian. Duela ia 20 urte erosi zuten hondarretan zegoen etxea bi azpeitiarrek, Felixek eta Joxeanek, eta bien artean banatu. Etxearen erdia berriz jasota du batek. Besteak, garai hobeen zain edo, aldamenean du egokitua borda.

Bazter ederrak dira. Inguruaren toponimiaz buruan galderak nituela itzuli nintzen etxera. Eta gauza batzuk aurkitu:

• Elosu zabalduago ikusten dugun arren, Elosua da auzune honen izena Euskaltzaindiaren arabera, eta -a Bizkaian baina Bizkaiko, Elosuan baina Elosuko.
• Egixa-barren bera eta haren ingurukoak jatorri bereko erro batetik datoz, baina horren idazkeraz makina bat forma ikusiko dituzu. Hegiaga Azpikoa, Egiara Azpikoa... Egizabal eta Egidazu etxeak ere inguruan dira. Bertako ahoskeran, Egixa hori garbia da.
• Bergarako kaletegian Egiarazpikoa da gu egon ginen etxe hori. Baina etxekoek esan zidaten Egixa-Barren horren aztarna zaharragoa ere aurkitu dut bezero bati ireki diogun webgune berri batean, Bergarako Udal Artxiboan: Egiara-Barrena. Egieder, Egiara de Abajo eta Egiara de Suso izenak ere eman izan zaizkio.
  

Egixa-Barren etxea 17. mendean nola saldu zen ageri da artxibo horretan, hemen. Hauxe izan zen prezioa: siete cuartas de trigo y siete de borona, y once reales en dinero. Kuarta bat zen egrrezko kaxa bat, garia neurtzeko erabiltzen zena. Hori izango ziren, gutxi gora-behera 28 litro gari eta beste horrenbeste arto, eta dirutan 11 erreal, edo 374 marabedi, edo 2,75 pezeta, hau da, 2 zentimo eurotan, inflazioa kontuan hartu barik. Zerealen neurriez, kuarta eta beste batzuez, mintzo da Ahotsak.com-en Bergarako baserritar bat (tira, Angiozar aldekoa).

Egixa-barren benta izan zen garai batean. Osintxu eta Elosu arteko bidean, autobide ondoko area horien funtzioa betetzen zuen orduan bideko bentak.

Elosua ezagutzeko ez dago Egixa-barrengo azpeitiarren laguna izan beharrik. Elizaren ondoan, abadetxea zena gaur aterpetxe da gela kolektibo batzuekin (sukaldea ere bai). Pertsona eta gauko, sei euro. Tratua egiteko, ez dakit nori deitu behar zaion zehazki, baina ondoko Ixaun jatetxean (Iriaun baserrian) galdetzen baduzu, jakingo dute.