Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Ingelesen hilerria

Gustatzen zait Reddit

Luistxo Fernandez 2011/02/27 18:11

Duela gutxi deskubritu dut Reddit. Izenez bai, duela urte batzuetatik, baina ez nintzen interes handiarekin sekula gerturatu Ateismo sekzioa deskubritu nuen arte.

Geroztik, bisitan itzultzeko gogoa etortzen zait, atal hori edo beste batzuetan istorio, irudi eta komentarioak irakurtzeko. Bitxiak dira, adibidez,


Wikipedian arakatu dudanagatik, ematen du Redditeko meme eta idiosinkrasiaren parte handi bat are toki basatiago batetik datorrela: 4chan. Hori ez dut ulertzen, benetan; oraindik asko ikasi beharr daukat Interneten :-O

Meme horietako bat da Rage Comics irudiena. Aurpegi errepikakor batzuekin, MS Paint-ekin egindako komikiak omen jatorrian... Honezkero sarean rage-ak sortzeko tresnak ere badaude. Eboluzio etengabean dabiltzan intra-memeak gainera, meme handiago horren barruan, hala nola AEBetako ateo elkartearen buruak, David Silvermanek, programa batean jarri zuen harridura aurpegiak: horrek bere horretan beste hainbat bertsio eragin ditu, eta Silvermanek berak Facebook-eko bere profilean jarri ditu batzuk!

Nik ez daukat nahikoa irudimenik Rage comic bat neuk asmatu eta idazteko... Baina lehengoan, alabaren eskuan ikusi nuen bat marraztua. Lilik badu gusto berezi bat marrazketarako. Aita tonto bat besterik ez naiz hau esaten, baina uste dut sormen pittin bat baduela barruan. Loratuko ahal da ;-)


Argazkiak.org | Liliren eskuarekin, aurpegiak © cc-by-sa: Luistxo.F

Python programazio lengoaiarekin egina dago Reddit eta soft librea da. Hortaz, suposatzen dut klon bat egitea ez dela horren zaila. Gakoa, ordea, komunitatea da. Funtzionatuko luke, garen txikiarekin? Hori da dudan zalantzetako, eta bestea  antolakuntzaren aldetik anonimotasunean oinarritzen dela eta, pertsonalki, uste dut une honetan euskarazko ziber-eztabaidak identitate argiagoak behar dituela. Hala ere, tentatzen nau ideiak... foro benetan basati eta anonimoa bagenu euskaraz, hala nola Reddit Gonewild (NSFW, eta errejistroarekin bakarrik).

Garaitza bat orrialde bakoitzean

Luistxo Fernandez 2011/02/12 13:41
Pesimista naiz momentu politikoarekin. Ez dut uste Espainiako antidemokraziak aurkezten utziko dionik Sortu alderdiari maiatzeko hauteskundeetan. Eta batzuek idazten dutenean egoera politikoa "ereindako baldintzen" ondoriozko "eremu irabazlea" dela, nik flipatzen dut.

Ez naiz oso optimista momentu politikoarekin. Uste dut albiste ona izan zela ETAren suetena. Haren ondotik etorri daitekeen Bruselako taldearen mugimenduak edo nazioarteko berifikazio hori ere ona izango da (ea gauzatzen den, esaten diguten bezala). Ezker abertzalearen adierazpen argiak ere onerako dira. 
 
Baina pesimista naiz. Ez dut ETA bere burua disolbatzen ikusten (are gehiago: oraindik hildakoak ikusiko ditugun beldur naiz), eta ez dut uste Espainiako antidemokraziak aurkezten utziko dionik Sortu alderdiari maiatzeko hauteskundeetan. Adierazpenetan topatuko dute indiziorik, ez dutela ETAren disoluzioa eskatzen, edo ez dutela iraganeko ekintzarik arbuiatzen, edo ez dakit ze prentsaurrekotan zera galdetu dietela, eta hura erantzun dutela... Txostenak idazten ibiliko dira poliziak dagoeneko. Eta bestela, alderdia legala bada ere, ba ANVrekin 2007an egin zutena, orduan legezkoa baitzen alderdi hura: zerrenden kutsaduraren aitzakia fantastikoarekin zerrendak baliogabetu (honetarako, sikiera Foru hauteskundeetan, akaso izan dezakete defentsarik zerrenda zuri-zuriak aurkezten badituzte, pertsona ez konprometitu edo ezezagunekin; baina honetan ere ez dut esperantza handirik). Jarraipeneko alderdia dela ondorioztatuz, debekua luzatu daiteke; eta, ontologikoki, hara, ez dirudi hain zaila.
 
Horrez gain, batzuek zantzu kezkagarriak ikusi dituzte ezker abertzalean nonbait batzuk uzkur edo traizionatuak sentitu direlako. Eztabaida hari honi erreferentzia egin dio Twitterren jarraitzen dudan lagun batek baino gehiagok.
 
Niri, egia esan, ez dit arreta berezirik deitzen traizioaren mamua aipatu duten horien mezuak. Ezker abertzalean borroka armatuaren eta ETAren aldeko jendea dago, eta Sorturen estatutuetan daudenak irenstea gogorra izan behar du horientzat. Baina uste dut diziplinak eta batasun-beharrak marjinal bihurtuko dituela ahots horiek.
 
Neuri, harrigarriagoa eta politikoki kezkagarriagoa egin zait eztabaida horretan Sorturen aldeko batzuek idatzitako mezu batzuetan ageri dena. 

(9)  Nola ailegatu gara egun dauden baldintzak izatera?Urteetako borrokaren bidez eta aukeratutako estrategia eta taktika ezberdinen bitartez sortu diren ondoriengatik.Argi geratu behar da guk ez diogula inoz uko egingo egin dugun bide eta lan horri
 
(12) Hemen egin daiteken traiziorik haundiena, hain zuzen ere, hainbat gudarik urteetako borrokaz ereindako baldintzak usteltzen uztea da.
 
(14) Ezker Abertzaleak espainiar eta frantziar estatuak erosoen zeuden gatazka eszenalekutik ateratzeko mugimendua egin du, eta aldi berean Ezker Abertzalea proiektu irabazlea izan daitekeen eremura igarotzeko mugimendua izan da. Eta bikain egin du.

 
Beraz, Sortu sortu da baldintza zoragarri batzuetan... Hori da flipantea. 50 urteko garaitza etengabeen ondoren, baldintza ezin hobeak dira orain, eta proiektu irabazlea gauzatzeko eremuan bizi omen dira. Errealismo faltatik nola eraikiko duen etorkizuna ezker abertzaleak, hori ez dut ikusten. Baina tira, euren arazoa. Nik gehiago sinesten dut ETAk bidalitako ordezkariak BBCko kazetariari aitortu ziona, 50 urte alferrik egin zituela borrokan ETAk. Suposatzen dut historia berridazteko premia bizia dutela, egiak aitortu barik, hobeto dela garaitza bat (gutxienez) konstatatzea orrialde bakoitzean. Hau ez da berria, ezker abertzaleak idatziz utzia du Zutik Euskal Herria egitasmo autonomistan, artikulu honetan azpimarratu nuen bezala:

Orain dela 50 urte Euskal Herria hilzorian zegoen eta denbora tarte honetan, borrokari esker, Euskal Estatua eratzeko aukera irekitzeraino ibilbidea egin dugu.


Nik ez dut halakorik ikusten atzera bueltaturik begirada. Nik ez ditut ikusten Xabier Leteren poema hori *sortuz ta sortuz gure aukera...* baizik eta Xabier Letek ETAren 50 urteko historiaz esan zituen beste hauek.

Eta 50 urte asko badira, nahikoa zaizkit 10. Iazko abuztuan, Jose Mari Korta enpresariaren hilketaren hamargarren urteurrena betetzean pentsatu nuen, ze krimen estupido, eta zelako hamarkada galdua harrezkero: ez bakarrik ETAk hil dituenak, baizik eta alderdien legea eta hauteskundeetan iruzurra, operazio polizial politikoak (18/98, Egunkaria...), tortura beti bezala, Parot dotrina... Nork nola desegingo du hamarkada honetako espantu anti-demokratiko hau?

Horra, ereindako baldintzak.

Eibarko San Andres elizan, orain eta gizaldi batzuk barru

Luistxo Fernandez 2011/02/09 08:33

Mezetan izan nintzen atzo, hileta katoliko batean, Eibarko San Andres elizan. Hiru abade gezurrak esaten, horrelakoetan ohi denez. Horietako batek, Beitiak, bataiatu ninduen ni! Eta beste batek, Don Balbinok, lehen jaunartzea eman! Hirugarrena ere ez zen ba gaztea. Ba ote dute ordezkapenik euskal parrokietako abade zahar hauek? Betiereko bizitzan sinesten dute, eta Beitia edo Don Balbinoren kasuan, halako dohaina ote duten ere pentsatu nuen bart... baina, ia segurutzat jo daiteke, horiek ere hilko dira, eta ordezko pieza askorik ez dago inguruotan. Disketera apurtu zaizula? puf, ba... zertarako konpondu? Kristautasuna eta katolizismoa amatatzen ari dira Euskal Herrian, eta hori ona dela uste dut.

Dena den, San Andres eliza ederra da. Eta Andres Araoz nafarrak eraiki zuen erretaula, miresgarria. Bost solairu garai, egurretan zizelkatuak, irudi eta eszenak. Elizako beste detaile batzuk ere bai, aldareko urrezko bola eta arranoa, Times Roman tipo desberdinen konbinazioekin goi-goian latinez idatzitako mezuak, eraikina bera... Baina erretaula da ederrena, neure ustez.<(p>

Eibar. Juan de Araozen Adanen kreazioaren irudia, Genesiatik hartua
GureGipuzkoa.net | Eibar. Juan de Araozen Adanen kreazioaren irudia, Genesiatik hartua © CC BY-SA: San Martin, Juan

Pentsatzen egon nintzen, erlijioak bere funtzio estupidoa betetzeari uzten dionean, Araozen lana hurbilagotik ikusteko aukera izango dutela etorkizuneko eibartarrek, ezen ez gaurkoek. Buruari bueltaka, irudikatu nuen halako aldamio eta eskilara batzuekin, gora igo eta gertutik eszena horiek miresteko aukera izango dela San Andres elizan, neure bizi-tartean ez bada, bai gizaldi batzuen buruan. Teknologia apur bat beharko da, aldamio ikustezinak, edo plegatzen direnak; izan ere, ikusmira osoa ere ez luke eragotzi behar estruktura horrek.

Teotihuacaneko piramideak edo Abu Sinbel bezala. Euskal elizak ere artelan izango dira. 

Katutxinoak

Luistxo Fernandez 2011/02/02 17:39
Eibarrek ez dauka, nik dakidala, animalia heraldiko edo sinbolikorik. Heraldikoa litzateke, adibidez, balea Getariako armarrian, edo sinboliko edo totemikoak berriz, hainbat kasu: Debakoak tarinak direla, edo Ataungoak otsoak... Herrietako gatxizenen saltsa horretan, ezer izatea tokatu bazaigu, farolak (planetziatarrentzat) edo portugesak (mutrikuarrentzat), ez gehiago. Kirol eta hedabideetako topikoetan, berriz, armaginak akaso: ETB1en armeroak esateari utzi zioten aspaldi, zorionez. Eta zerbait naturalagoa beharko genuke, faunistikoagoa.

 

Egoera honek konponbidea merezi du eta hau da nire proposamena: gauza jakina denez, iaz deskubritu genuenetik, txino-dendetako katu guztiek sanblasa daukatela altzoan, izan dadila katu hori Eibarko herri-totema, eta izan gaitezen eibartarrok katutxinoak.


Argazkiak.org | katutxinoa © cc-by-sa: Luistxo.F

Disfrutatu opilak San Blas egunean!

Top 2010

Luistxo Fernandez 2010/12/30 09:45
Hiru kantu, hiru pelikula, hiru liburu, hiru tuit, eta top3 berezi bat ere bai

Horra 2010eko Luistxoren balantze kulturala. Top 3ak 3. onenetik onenera ordenatuak.

Hiru film:

 

Hiru liburu:

Aipatu nezakeen halaber Tony Judt, aurten hil baita...

Hiru kantu (eta hiru klip bikain):

 

Hiru tuit:

 

Eta, ez aurtengoa, baizik eta neuk ezagutu ditudan garai guztietakoa, Top 3 Morena, Praka Horiek Estuegi Dauzkazu Ene Osasunerako!

 

Urte berri on,

Txorizoak.net

Luistxo Fernandez 2010/12/23 13:06

Duela 12 urte, Elena Laka abokatuak bere lehen mezua idatzi zuen Eibartarrak zerrendan.

Zerrendakide berria Santo Tomas egunean (noizko
txorizoa eta ogia net?). Urte askotarako.
Gaur Angel Aldarondo ikus-entzunezkoen sortzaileak, haserre, zera idatzi du Noticias talderako: "Txistorra Download. ESTOY seguro de que si pudiéramos descargarnos de Internet txistorra y sidra lo haríamos sin dudar."

 

 

Jakina. Txistorra saretik jaistea doan balitz, jaitsiko genuke. Sekulakoa litzateke. Gosea ere konponduko zen munduan, bide batez.

 

Kontua dator Espainian dauden lege mugimendu horiekin... deskargen kontrako pertsekuzio zaila arautu nahi dutela sektore kultural eta politikoek, eta jendeak ez duela nahi.

 

Kultura ordaindu egin behar dela... Jendeak doan nahi du guztia. Edo merke. Nik liburuak doan "jaisten" ditut. Donostian dauden liburutegi publiko bikainetara joaten naiz, eta doan lortzen dut papela. Bueno, guztiz doan ez, ze autobusa edo parkina pagatzeko prest egoten naiz bi astean behin-edo zentroa aldera joan eta bizpahiru liburu hartu-itzultzeko. Liburuko 50 zentimo inguru ordaintzen ote dudan susmoa dut, hortaz. Hau merketu egingo zait orain, ze sekulako liburutegia zabaldu da etxetik gertu, Aieteko parkean Donostian, eta oinez gertu daukat hor, garraio gastuak aurreratzeko moduan beraz.

 

Nik suposatzen dut Angel Aldarondok kultura doan kontsumitzen duela, ahal duen guztietan, besteok bezala.

 

Seguru aski, ikus-entzunezkoen produkzio eta promozioaren munduan egonda, ba materialak jasotzeko bere bide propioak dituela, DVDetan materialak iristen zaizkiola eskuetara, ebentoren batean dagoela aukera izan dezakeela pase berezia lortzeko (besteok baino errazago), lagunen batek pelikula bat pasatzen badio disko batean, ez diola muzin egingo...

 

Horrez gain, txistorra erosi daiteke Internetez. Eta gaztaina erreak. deskontu.com weba ondo dago. Nik gaztainak erosi nituen joan den astean, eta aste honetan talo-txistorra eskaintza zegoen. Egunean eskaintza bat. Gaur sagardoa. Merke samar, gero fisikoki Donostian jaso behar duzun arren. Nik uste Topaguneko medio batzuk aliatu beharko liratekeela hori Donostian egiten duen mutilarekin, Txomin Jauregirekin

.

Twitter ikastaroa doan

Luistxo Fernandez 2010/12/08 10:08

Gaur hau oparitu didate (eta beste gauzatxoren batzuk ere bai). Patxitraperok iradokitzen du, maltzur, Twitter ikastaroak ematen ditudala elite aukeratuentzat edo... Gezurra. Horra, doan, nire Twitter ikastaroa.

1. Sortu kontua Twitterren.

2. Jarri ezarpenetan zure aurpegia duen irudi bat, eta zure izen-deiturak, benetakoak.

3. Jarraitu 50 pertsona. Izan dadila mix bat: ezagunak eta ezezagunak, euskaldunak eta kanpotarrak.

4. Firefox badaukazu, instalatu Echofon. Ez badaukazu Firefox, instalatu Firefox, zin egin ez duzula beste nabigatzailerik erabiliko sekula, eta instalatu Echofon.

Kito.

Duela 20 urte, Euskaldunon Egunkaria

Luistxo Fernandez 2010/12/05 19:58

Duela 20 urte gau berezia izan zen hau neuretzat. Euskaldunon Egunkariaren lehen alerako lana amaitu genuen, eta parranda egin genuen orduan Lasarten zegoen erredakzio hartan. Ikasle nintzela, amets moduko bat zen euskarazko egunkari batean parte hartzeko pribilejioa izan nintzakeela halao batean. Eta iritsi nintzen amets hori egiaztatuta ikustera. Harro nago lan apur bat egin nuelako, beste lagun askorekin, proiektu hura gauzatzen.

Argazkiak dira Egunkaria.info webgunekoak.

Biharamunean, hauxe egon zen salgai. Besteak beste, Durangoko Azokan. Egun hartan bertan Egunero izeneko proiektu baten simulakroa banatu zuten Jaurlaritzaren kontra-ekimen batekoek. Euskadi Irratiak kazetari praktikante bat zeukan Durangoko Azokan, eta instrukzioak jaso zituen Irratitik galdeketa egiteko Azokako bisitariei: ea zer iruditzen zitzaien Egunero. Horixe da egia, Euskadi Irratiak zer galdetu zuen Durangoko Azokako kale-inkesta hartan, Euskaldunon Egunkaria jaio zen goizean, 1990eko abenduaren 6an.

Egun hauetan ez dut inon ikusi urteurren honekin ezer egingo denik. Ni behintzat ez naiz enteratu.

Eguneraketa, abenduak 6: Goio Aranak emandako erantzunetik eta kargatutako irudietatik, horra Egunero haren azala:


Argazkiak.org | Egunero (1990) 1. orrialdea © cc-by-sa: goioarana

Mono lakuko izaki bizidun harrigarriak

Luistxo Fernandez 2010/12/03 21:23

Nola apur bat nerd edo geek ere banaizen, pendiente nengoen zer esango ote zuen NASAk bizitza estralurtarrari buruzko prentsaurrekoa iragarri zuenean. Ez zuten zioa oso ondo azaldu, ze estralurtarra barik, oso lurtarra izan da aurkitu dutena, baina hala ere, garrantzi objektibo handikoa, gainerako izaki bizidun guztiak fosforoa darabilgun lekuan arsenikoa erabil dezakeen izaki bat aurkitu baitute, mikrobio bat. Eta zirrara pixka bat sortu dit berriak bakteria hori non aurkitu duten jakinda: Mono lakuan, Kalifornian.

Eta horra, Mono lakuan, nire izaki bizidun gogoenak:

Bi ugaztun ikusiko dituzue argazkian, nik maiteen ditudan izakiak, duda barik. Baina adi ur ertzari. Geruza beltz hori. Ez da zikina. Masa bizi-bizi bat da. Sekula ezagutu dudan animaliarik harrigarrienek osatzen dute kapa hori, Mono lakuko euliak dira.

Mono lakuko eulien ezaugarri batzuk:

  • Txikiak eta beltz-beltzak dira.
  • Isilak dira. Hegan ez dute burrunda txikiena egiten, eta harritzen zaitu horrek euliak baitira, azken batean.
  • Ez dute nahi traturik gizakiokin. Zoaz milioi bat euli dauden putzura, erditik igaro, eta altxatuko dira denak hegan zure inguruan, baina ez zaizu bat bera ere gainean jarriko, ez zaituzte ukituko ez bada okertu direla edo zuk mugimendu azkar bat egin duzula, eta zure inguruan buelta bat eman ondoren, eseriko dira berriro lurrean. Efektua harrigarria: milaka euliz inguratuta ibili zabiltza, isiltasunean, ukitzen ez zaituztela, eulien jauna sentitzen zara.
  • Jangarriak dira: nagusi direnean txorientzat; larbak direla, gizakiontzat ere bai.
  • Mono lakuko uretan bizi den bi espezietako bat da. Besteak dira izkira txiki batzuk, bertan bakarrik bizi direnak. Beste animaliarik ez da bizi uretan, izaki unizelularrak bai, oraingo bakteria hau eta beste asko.


Mono lakuko urak dira hiper-gaziak eta hiper-alkalinoak. Basamortu paisaia bolkaniko batean daude, apenas mila urte dituen sumendi kate baten ondoan, Yosemite parketik ordu pare batera, baina hango turistarik gabe. Uretan ez da bizi arrainik edo ornodunik. Eta artropodoak, bi bakarrik, krustazeo txiki horiek, eta euli hauek. Hori bai, nolako kantitatean. Baso bat urez hartu, eta izkira zopa dela ikusiko duzu, larba batzuk tarteko. Laku guztia da zopa bizidun bat. Eta bai, inguruko indiarren janari iturri nagusietako bat ziren larba horiek. Kaliforniako state park rangerrak eskaini zigun eskukada larba bisita gidatuko taldeari, baina ez zuen inork jan, ez amerikar ez kanpotar, salbu eta rangerrak berak eta nik neuk. Getariako maaulixuak jatea bezalatsu, gazi gaziak dira.

Euliok dira txori kantitate ikaragarri baten janaria. Oso erraz elikatzen dira txoriak. Ibilian dabiltza lasai antzean, ibarrean, mokoa ireki eta itxi: ez dute besterik egin behar euliak harrapatzeko. Lehen argazkian ikusten dira txori batzuk, urrutiago, umeen atzean.

Mono lakua garbi dago. Ez dago kutsadurarik. Baina bertara ematen duten ur-iturri naturalak gizakiak eten ditu, eta horregatik ur maila jaisten ari dela ikusi dute. Ur emariak ohiko ziklora itzuli nahian dabiltza, izan ere, ur maila asko jaitsiz gero, alkalinitatea eta gazitasuna gehiegizkoa bihur daiteke bertako bizidunentzat, eta hil daitezke izaki unizelularrak, izkirak, eta euliak, eta baita, ondorioz, txoriak ere.

Udan bainatu zaitezke, ura tenperatura egokian egoten da, eta badaude bainatzeko moduko hondartza seguruak. Hori bai, prest egon behar duzu zopa bizidun hipergazi eta alkalino batean sartzeko. Azalerentzat ona dela esan zigun rangerrak. Gu bainatu ginen. Apur bat itsaskor irteten zara.

Bigarren argazkian halako gatz dorre batzuk ikusten dira, tufak, formakuntza naturalak uretatik altxatzen direnak urteen poderioz, ez dakit ze prozesu biologikok edo kimikok sortzen dituzten arrefize moduko batzuk. Horietako batzuetan, arrano arrantzaleek habiak dituzte. Arrantzale izanda, han ez dute ezer jateko, ez baitago arrainik, baina ingurunea asko aldatzen apenas 20 kilometroan, mendi eta laku eder alpinoak baitaude inguruan, June lakua ezagunena. Hango arrainekin elikatzen dira arranoak.

Ez da jende asko bizi inguru hauetan, eta turistak ere gutxi. Yosemite ondoan dago, ederra eta jendez gainezka, baina gutxik dakite ondoan Mono lakuaren eskualdea dagoela. Bertako bati euskaldunak ginela esan, eta frantsesez egin zigun. Kalifornia farwestiko samarra da paraje hori.

Ezagutu nuen Mono lakua, aukera neukan garaian. Uste dut dirua inbertitu eta gastatzeko modu on bat dela bidaiatzea. Orain ezin dut. Baina ahal badur, egingo dut berriro. Bitartean, irakurri dut tuiten bat, ekainaren 29an greba ez egiteagatik sistema zapaltzaile eta jasangaitz honen konplizetzat hartu ninduen jendearena, elurretara eskiatzera doazela asteburu luze honetan. Oi, Northfacearen konpromiso proletarioa, zein urruti sentitzen naizen zuengandik; handia da kapitalista kalifornianoa izatea, neure umeei Mono lakuko bizitza harrigarria erakutsi ahal izan nielako pozik oheratzea, arsenikoaren zapore gaziarekin, harropuztuta.

Euskotrend izan zen izen probisionala

Luistxo Fernandez 2010/11/06 10:16

Umap proiektuaren lehen zirriborroa hemen itsatsitako hau izan zen, udaberrian nik neuk Paint tristearekin (Windows sistema eragilean) marraztua, eta izen probisional honekin: Euskotrend.


Argazkiak.org | Euskotrend Umap lehen zirriborroa © cc-by-sa: Luistxo.F

Ideia zera zen: berba gakoen jarraipena, trending kontu hori, gero eta indartsuago ikusten nuela, zer zen unean unean sarean komentagai zena, eta trend horietan klikatuz informazioa eta iritzia eskuratzeko modua zegoela. Beste hizkuntza batzuetan, hala ere. Ez euskaraz. Eta hori lortzea ona izango zela pentsatu nuen, euskarazko trend edo joeren jarraipeneko tresna bat. Izen logikoa iruditu zitzaidan Euskotrend.


Argazkiak.org | Euskotren Umap pentsatzen © cc-by-sa: Luistxo.F

Zirriborroan (ikusi handiago) nik ikuskatu nuen Euskotrend Sustatun integratua. Eta beste osagai batzuk: batez ere, Nirenews, David Gonzalez Ketarik martxan jarri zuen proiektu bat, ibilbidea oparoagoa merezi zuena (itxita dago orain). Hirien araberako azpi-twitter moduko batzuk ziren Nirenews desberdinak, eta arreta deitu zidan #hash bat sartuz gero bertara, auto-erreferentzia egiten zuela, esteka Twitterrera bueltan bidali barik. Duela egun batzuk erakutsi nion pantaila-irudi hau Ketariri, eta inspiraziotzat balio izan bazuen, pozten zela erantzun zidan. Eskerrik asko. Gipuzkoako Interneteko ekintzaile ipurloka eta jatorrenetakoa da Ketari. Banku batean, sistemetako katakunbetan, omen dago lanean, baina beti beste gauza batzuk makinatzen, orain ere izango du zerbait esku artean.

Irudian erantsi nituen beste osagaiak dira Trend jarioa, Twitterren garai hartan agertzen zen bazala; eta The Huffington Post albistegi digitalak sortutako Twitter edition direlakoetan ikusitako kutxa bat, bertatik zuzenean tweet egiteko modu sinple bat.

Eta horixe zen Euskotrend. Nola egin euskarazko tuitak biltzeko, eta haietan gakoak aurkitzeko, hori nik ez nekien. CodeSyntax-eko injineruek asmatu zuten modua, bereziki Josu Azpillagak. Baina behin euskarazko modua asmatuta, beste hizkuntza batzuetan ere aplika zitekeela ikusi genuen. Umap izena etorri zen gero, aspalditik erosia genuelako, umap.eu domeinu labur samarra, kontingentziaren baterako edo...

Eta gero, ba, hauteskundeak deitu zituzten Katalunian. Horregatik, ideia zen Umap Euskaraz eta Umap Català aldi berean irekitzea, azaroaren 5a baino lehen (nik data tope hori jarri nuen bi hilabetean pentsatu izan dudalako atzoko egunez hasten zela Kataluniako kanpaina ofiziala, eta bi hilabete data horrekin obsesionatuta egon naiz. Sekulako esprintak azkenean, harik eta azaroaren 4an bertan konturatu nintzen, arratsaldez, kanpaina 5ean barik, 11n hasten zela! Tira, azkenean, badugu Umap bikoitz bat, eta espero dut gehiago etorriko direla.


Argazkiak.org | Umap.eu zentrala © cc-by-sa: codesyntax

Gainera, katalanezkoa egitea zaildu egin zitzaigun bidean, eta une batzuez ez genekien hizkuntza-detekzioa zuzen asmatuko ote genuen deadline hori baino lehen... baina iritsi ginen, eta ez bakarrik katalanezko detekzio egoki samar batekin, baizik eta beste gehigarri interesgarri batekin: TopNews edo albistegi automatiko bat, jendeak trukaturiko esteketan oinarritua.


Argazkiak.org | Umap.cat albistegia © cc-by-sa: codesyntax

Aurkezpena

Luistxo Fernandez

Lan egiten dut CodeSyntaxen, Sustatun ere dexente editatzen dut. Eibarren jaioa naiz (1966) eta Donostian bizi naiz. Twitterren @Luistxo naiz. Azpìtituluak.com proiektuan ere banabil, eta niren kontsumo kulturala zertifikatzeko. Gainera, blog honek erdarazko bi bertsio ditu:

The English Cemetery

El cementerio de los ingleses

Nire kontsumo kulturala: 2012/13 | Zinea | Telebista | Artea | Liburuak | Antzerkia | Musika

Hemengo edukien lizentzia: Creative Commons by-sa.

E-postaz harpidetu: hemendik.

artxiboa
2022 2021 2020 2019 2018 2017 2016 2015 2014 2013 2012 2011 2010 2009 2008 2007 2006 2005 2004