Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Ingelesen hilerria

Sandra Carrasco peajean

Luistxo Fernandez 2008/04/25 13:02

Atzo arratsaldean medio asko Arrasatera begira. Neuk ere han igaro nuen arratsaldea, bezero batekin lanean. Peajetik irten eta kabinan kobratzeko momentuan, kontxo, emakumezko gazte bat, begi haundi eder batzuk, pirtzin bat beheko ezpainean, oso neska polita, eta ezaguna: Sandra Carrasco zen, Isaias Carrasco hildako zinegotzi-ohi sozialistaren alaba. Aitaren lanpostu berean.



Begira geratu nintzen, eta konturatu zen, ezagutu nuela, beste askok ezagutuko duten bezala, hark gu nor garen jakin barik, ofizinista aspertuak bolantean besterik ez. Ez nion ezer esan, eskerrik asko bakarrik, tiketa jasotzean. Zerbait esan behar ote nion pentsatzen jarraitu nuen kotxearekin, oso indartsua eta oso duina iruditu zitzaidala nola eman zuen aurpegia aita hil ziotenean.

Iluntzean etxean, notiziak ikusten, pentsatu nuen berriro kontu hartan: inor konturatuko ote zen atzo, Arrasatera peajetik joandako kazetari guztien artean, nork zuen txanda hango kabinan, non zegoen notizia.

Gaur errepasoa egin dut han eta hemen. Kazetari bakarrari egin zaio aipagarri: M. Rueda delako bat, El Diario Montañes-erako.

Bloga aipagarri Euskadi Irratiko albistegileen artean?

Luistxo Fernandez 2008/04/25 10:46

Atzo, Juan Kruz Lakastaren Euskadi Irratiko goizeko prentsa errepaso eruditoan, eta baita arratsaldez Maite Artolaren Mezularian, blog euskaldun bat aipagarri. Volgako Batelariak aipatu zituzten!

Aibadios! Azkenean bagara zerbait!

Baina ez, alarma faltsua. Lakastak eta Artolak esandakoa ez da irten Batelarienean (zergatik ote?); paperean argitaratu dutena da notizia, paperean argitaratu dutelako. Errepaso digitalik ez dugu merezi, bizitza honetan ez behintzat. Hausnarketa agindu ostean, 2006ko abendutik hona ez dituzte beren irizpideak aldatu. Interesa non dagoen argi dute, eta badakite Clarinek egunero egunero duela zerbait interesgarria, egunero kontatzen baitigute Interneten zer dioen Argentinako kabezera horrek.

Hamar urte, eta aurrera

Luistxo Fernandez 2008/04/18 09:24

Duela hamar urte aurkitu nuen Interneten Makelist izeneko gauza bat. Arratsalde hartan bertan pentsatu nuen probatzea, ea nola zebilen. Posta-zerrendak sortzeko trasto bat zen, eta gai baten inguruan sortu behar zerbait, eta, tira, eibartar batzuen e-postak gehitu eta Eibartarrak izena eman nion. Makelist haren sorrera kontatzen da hemen, posta-zerrenden sareko sistemen historia osoago baten barruan.

Data zehatza apirilaren 18a ala lehentxeago ote zen ez nago seguru. Zerrendaren sistemak eta artxiboak migrazio bat izan zuten duela 4 urte, eta migrazio horretan, zenbaketa eta data-nahasketa batzuk gertatu ziren, baina lehen mezuen haria hauxe da.

Lehen mezuaren data okerra da, baina 2. erantzunetik aurrera, apirilaren 18ko data ikusten da. Neure seme Peru jaioberria zen egun haietan (apirilaren 9koa da), eta ez dut hortaz Eibartarrak zerrendaren adinaz duda askorik: semearen adina dauka.

 

Historia gehiago hemen kontatu dut

. Zerrendan 99 harpidedun gara gaur. Ehun izan gaitezen lagundu nahi baduzu, hemendik eman izena.

 

Zerrendaren jardunak gauza asko eman dizkit. Eibar.org elkartea, laguntaldea eta webgunea, zerrendatik sortu ziren. Neure enpresa ere, zerrendaren bidez harremana estutu genuen lagunen artean konfabulaturik sortu zen. Eta aurrera goaz: gaur arratsaldez kotxeetako TomTom nabigatzailearen ahots sistema euskaratzeko auzolan elkarketa

bat dago, eta laster egongo da horren emaitza denen eskura.

 

 

 

Aita eta amaren berbetak

Luistxo Fernandez 2008/04/17 10:10

Euskal Herriko Ahotsak proiektuan Badihardugu elkarteak egin duena sekulakoa da. Barkatuko ahal dit Asier Sarasuak inoiz adarra jo izana Eztihardugu elkarteaz berba egin izan dudala-eta... Euskararen doinua gordetzeko ahalegin paregabea, Internetez partekatzeko moduan gainera.

Aita Elgetakoa dut, Jose Luis Fernandez Zubimendi, Panaderokua etxean jaiotakoa. Gerra hasi zenean, 14 urterekin, hanka egin behar izan zuen herritik, eta handik gutxira Eibarren jarri zen bizitzen, baina bere hizkera eta doinuak beste elgetar honen tankerakoa da, duda barik.

Hau ikusteko Macromedia Flash Player behar duzu. Doan da. Jaitsi produktu hori.

Gure ama zena, Josefa Ostolaza Sarasua, Mallabiako Gerea auzoko Barrenengua baserrian jaio zen. Gereako emakume honen berbeta da hark, bideokoak bezala, ezkondutakoan Eibarrera ekarri zuena.

Hau ikusteko Macromedia Flash Player behar duzu. Doan da. Jaitsi produktu hori.

Eibarko berbetak, ostera, ez daude Ahotsak proiektuan. Eibartarren Ahotan proiektua antzeko gauza bat da. Jende bertsua ibili da batean eta bestean lana egiten, baina itxura baten trabak jarri ditu Eibarko Udalak gure herriko bozak Ahotsak honetan egon ez daitezen. Espero dut zuzenduko dela, ez bada bihar, etzi.

Aurkezpena

Luistxo Fernandez

Lan egiten dut CodeSyntaxen, Sustatun ere dexente editatzen dut. Eibarren jaioa naiz (1966) eta Donostian bizi naiz. Twitterren @Luistxo naiz. Azpìtituluak.com proiektuan ere banabil, eta niren kontsumo kulturala zertifikatzeko. Gainera, blog honek erdarazko bi bertsio ditu:

The English Cemetery

El cementerio de los ingleses

Nire kontsumo kulturala: 2012/13 | Zinea | Telebista | Artea | Liburuak | Antzerkia | Musika

Hemengo edukien lizentzia: Creative Commons by-sa.

E-postaz harpidetu: hemendik.