Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Ingelesen hilerria

Karaktere-kateak itzultzen interfazeetan

Luistxo Fernandez 2004/09/29 15:32

Produktu informatikoetan, web interfaze batean edo programa baten pantaila-irudietan, menuak, botoiak eta abarrak diseinatzean testu-kateen luzera arazo izaten da batzuetan. Adibidez, menuok eta abarrok, ingelesez egin, pentsatu eta diseinatu badira, alemanezko bertsioa egitean, akaso alemanezko ordainak ez dira "sartuko" diseinuko elementuetan. Esaten dute, zer diseinatzen duzula ere, %30eko espazio libre bat utzi behar duzula zure testuaren eta haren oinarriaren artean (menuko zatia, botoia, dena delakoa), aplikazio hori ganoraz itzuliko bada... Euskarak ere badu, alemanak bezala, luzera handiagoa izateko joera, gaztelaniarekin alderatuta, zer esanik ez ingelesarekin.

ItzuL zerrendan azaldutako mezu batzuen harira idatzi dut hau, nahiz eta ez nagoen seguru zerikusia ote duen.

Beste kontu bat: testu-kateak bere horretan itzulita, eta luzeretan ere bat etorrita ere, itzulpena askotan alferrik da. Ze, interfazeak, aplikazio informatikoak egokitzen direnean hizkuntza batetik bestera, itzulpena baino gehiago, lokalizazioa dago jokoan.

Hona adibidetxo bat, webgune elebidun batean aurkitua. Lehenbizi, Erdarazko kontaktu formularioa. Informazioa eskatzeko karaktere-kate batek gonbita egiten digu, testu-kutxa batean idatz dezagun nahi duguna:


Baina, hara, hori bera euskaraturik:


Itzultzaileak zuzen jokatu du: Informacion sobre itzultzeko esan diote, eta ..i buruz informazioa eman du. Testu-katearen luzeran bat dator. Baina emaitza absurdoa da.

Metadona hertzianoa

Luistxo Fernandez 2004/09/24 15:30

Mariano Ferrer kendu zigutenetik, zer entzun? "mono" hau nola ase?

Nork aterako die punta zorrotza Aznarrek esandako astakeriei ? (The culp is of the moors in the eigth century, then we did the re-conquest very well fandango)

Heroinaren ordez, metadona tratamentuarekin dabiltza batzuk... Lagun batek esaten dit goizeko 7etan eta 8etan Iñaki Gabilondo aktualitate-komentario majoak egiten dituela, bereziki 7etan, denbora gehiagorekin.

Ez dakit, gaur estreinakoz entzun dut 8etan, eta albistegi arrunt bat zuzentzen entzun dut Gabilondo... 7etarako jaiki beharko naiz.

Eguraldia emateko moduak Interneten

Luistxo Fernandez 2004/09/24 15:22

Joan den larunbatean, Berria-n, Euskalmet-eko buruarekin elkarrizketa zetorren. Pozez zioen Euskalmetek 91.000 bisitari izan zituela uztailean: www.euskalmet.net helbideak hirukoiztu egin du urtebetean sarrera kopurua. Euskalmetek lehendabiziko urtea bete du ofizialki hasi zenetik. Elkarrizketa zetorren gero, baina Internetez ez zuen ezer esaten.

Ez dirudi hainbeste bisitari, duten propaganda guztiarekin. Nolanahi ere, oraindik gora egingo du bisita kopuru horrek, ze propagandarekin gogor segitzen dute, eta uztaila ere ez da oso oparoa nabigaziorako.

Hemen gai inportante bat dago: nola Euskalmet.net promozionatzen duten, ia ia negozio bat balitz bezala, eta espreski informazioa handik erabiltzeko zailtasunekin ("Debekatuta dago informazio hau, osorik nahiz zati bat, beste inon berariazko baimen idatzirik izan gabe sartzea")... Badirudi, irratian eta beste toki batzuetan lehengo informatzaile "pribatuei" konpetentzia publikoa eginez ere Euskalmet-eko parte ofizialak ematen dituztela orain.

Bada eguraldi informazioa beste modu batean emateko aukerarik. Baina zerbitzu publikoa, erakunde publikoek barik, elkarte pribatuek antolatu dute hemen:

Lan egiteko bi modu daude hemen:

  • Erakunde publikoa, datu publikoak jabego pribatua balira erabiltzen.
  • Erakunde pribatuak datu irekiak ematen, zerbitzu publikoa antolatzeko.

Blogetako komunikazioa definitzen: enpatia

Luistxo Fernandez 2004/09/20 14:22

Anjel Lertxundik blog-gintza aipagai izan zuen joan den astean Berria-ko hitz beste sortako hiru aletan. Aipamenak hiru egunetan irten ziren, eta batera ez daudenez inon... copyright eskubideak apur bat bortxatuz hemen pegatuko ditut Andurenak.

Eibarren duela hilabete batzuk egon zenean entzun nion erreflexio bat: ordenagailuarekin desberdin idazten dugu. Berba eta esaldi aukera... esandakoa ezabatzea eta zuzentzea hain erraza denean, idazkuntza ere aldatu egiten dela halabeharrez. Hori ordenagailuak dakarrena, berez. Eta denok konturatu gara horretaz, kopi-pega egitearen ondorioez, adibidez.

Orain Anduk Interneteko, eta, berez, blog-etako idazkuntzak ere zer ekarriko duen galdetzen dio bere buruari.

Honetan uste dut Andu bat datorrela beste batzuen kezka zalantzarekin: zein da Interneteko lengoaia, zein da blogaren komunikazio lengoaia? Nik uste dut erantzun definitiborik emateko goiz dela. Praktikak bakarrik erakutsiko digu. Baina, Eibarko praktika apurragatik, esango nuke lengoaia horren puntu nabarmen bat zera dela: enpatia. Kazetaritza lengoaiaz edo literatura doaiez aparte, blog batek konektatzen du enpatiaren bidez. Honetan Ogrosabel eta Maite-Etiam maisu ditugu, oraingoz.

Honaino, Luistxo, eta hemendik aurrera, Andu. Berria-n azalduak 2004ko irailean

Zaharberritzen

Anjel Lertxundi

«Informazioaren gizartea pertsona guztientzat», du aldarri hil honen bukaeran Donostian izango den teknologia berriei buruzko hitzaldi zikloak. " Teknologiak bakarrik al dira berri? Teknologiak berri eta gu zahar? Ezer aldatu al da gure baitan? Egiten ez diren galderak dira. Baina nago idazteari ekin aurreko gure psikologia eta prozedura mentala goitik behera aldatu direla. Ez dira hainbeste urte: orri zuria idazmakinaren arrabolean sartu aurretik, zuhur jokatzen genuen, ez ginen idazten hasten harik eta garbi izan arte eskema, baita esaldi bakoitzaren nondik norakoa ere, akats batek papera zakarrontzira bota beharra baitzekarren. Orain, pantailaren aurrean jarri, eta hau idatzi hura kendu, lanean hasten gara. Besterik gabe. Orri zuriari genion izua galdu dugu.Baina prozedura teknikoa zein mentala nolako, etekina ere halako, ezta?

Sarean

Zaharberritzen II

Anjel Lertxundi

Atzokoan, teknologia berriei buruzko nire jarduna bukatzeko, «prozedura teknikoa zein mentala nolako, etekina ere halako, ezta?» esaten nuen. Gu aldatu bagara, gure idazteko modua aldatu bada, idazten duguna ere aldatzen ari da. Ia modu ikusezinean, dabilen haizeak hareharriari forma berriak sortzen dizkion bezala: urteak beharko dira aldaketen nondik norakoak aztertzeko. Baina aldaketak, egon badaude. Lehenik eta behin, desberdin idazten dugu Interneten eta liburutarako. Oraingoz, bereizgarriak dira bi idazkuntzak. Baina laster, Interneteko idazkuntza libre, solte, bridarik gabea bere tokia egiten hasiko da liburuetan ere. Gero eta ugariagoa izango da liburuetan ere blog-etako estilo zatikatua, pasarte laburrez emana, disjecta membra batzuekin osatutako diskurtsoa, jauziak eta elipsiak eginez etena oinarri duen estetikaÉ

sarean

Zaharberritzen (eta III)

Anjel Lertxundi

Idazle handi ezagunen dietarioak gustatzen zaizkigunontzat, berebiziko interesa dute hainbat idazle anonimoren blog eta antzekoek ere, batez ere espero ez zenituen ikuspuntu eta iritziak politikoki zuzenaren itzal luzerik gabeak topa baititzakezu halakoetan. Argitaletxe eta hedabideetan edukien eta hizkuntzaren kontrol halako bat dago. Internet-eko orrialdeetan, aldiz, jardun ideologiko eta literarioa libre eta malgua da oro har, komisario ideologiko eta linguistikoen kontrolik gabea, jardunaren bizitasuna eta ekonomia zuzentasunaren gainetik jartzen duenaÉ

Horrek guztiak zer ekarriko duen, horrek guztiak nora eramango gaituen, auskalo. Baina «Informazioaren gizartea pertsona guztientzat» aldarri duen Donostiako ekimenak kontuok ere aztertu behar lituzkeelakoan nago, teknologia berriak ere ez baitira (zorionez!) neutro xaloak.

sarean

Xabier Mendiguren Elizegi, blogger akreditatua Donostiako Zinemaldian

Luistxo Fernandez 2004/09/20 12:37

Eibar.org elkarteko eibarnauta batek, bere blogarekin, jarraipena egiten dihardu Donostiako Zinemaldian. Xabier Mendiguren Elizegi da, idazle eta editore ezaguna, eta Sustatu.com-ek akreditatu du.

Nik argazkia atera diot XME-ri Kursaaleko alfonbra gorriaren aurrean, behar bezala akreditatua, eta koloreetan ere bat, kasu honetan Eibarko Matrallako irrati librearen kamiseta ofizialarekin.


Sustatun esan dugu bere dela zinemaldiko lehen blog akreditatua. Baina, egiazki, akreditatuen artean, Donostilandia.com delako blog erako jarraipena Batetik, akreditatuen artean, Donostilandia.com delakoa blog erako jarraipena egiten ari da.

XML feed-ik ez du eskaintzen, baina kritikak komentatzeko aukerarekin, eta egitura kronologiko horrekin, egunez egun, erderazko kontu hori blog bat dela esango nuke. Bakoitzari berea, eta hori aitorturik gera bedi.

Telefunken iragarkia, Mendaron

Luistxo Fernandez 2004/09/20 12:01

Telefunken-en iragarki hau, azulejoz egina, Mendaroko tren geltokian dago. Gaur trenez netorrela gelditu naiz aldamenean, eta klik!


Duela egun batzuk horma-irudi eta pintada kuriosoen gaineko Eibartarrak zerrenda bateko mezu batean azaldu zen hau.

Hain zuzen ere, gaur, inguruak zuriz pintatu berriak aurkitu ditut. Nonbait, graffitti lehiaketa edo erakusketa bat egingo da bertan. Espero dut espazio zuria aprobetxatuko dutela eta ez dutela ikutuko azulejozko artelan bitxi hau.

Osasuna, Joxe!

Luistxo Fernandez 2004/09/10 15:50

Bi urtez informatu eta astindu gaitu Joxe Aranzabalek, eta beti Bestelakoak ziren bere mezuak. Gaur izan da Minbiziaren kontrako borrokaren bere sortako azkena

Aurki berritu dugu Sustatu diseinuan eta egituran. Gaiak libreago izendatzeko aukera izango dugu hemendik aurrera. Apropos, Joxeri Osasuna! opa ahal izateko moduan egin dugula esan daiteke... Gai horretan klikaturik, haren artikuluak, haren liburua.

Aurrerantzean beste osasun kontu batzuk, beste bizipen batzuk, joango dira pilatzen gai horretan, baina oraingoz, Osasuna osoki Joxerena da.

Jamaika ikusteko jaio gara: Sustatuko atal berria azaltzen

Luistxo Fernandez 2004/09/08 17:19

Sustatun martxan jarri dugun ideia baten inguruan. Del.icio.us zerbitzu zeharo interesgarrian oinarriturik sortu dugu Jamaika ikusteko jaio gara (Bob Marley). Reggae maisuaren zita, jakina, gezurrezkoa da, [uste dut Zakilixutek edo Antton Olariagak asmatu zuela, batek ez bazuen egin, besteak] Joxean Sagastizabalek asmatu zuen. Askotan, aurkituako web euskaldu berri bat, urjentziazko kontu bat, aurkitutako diseinu polit bat, Berrian urtendako iritzi artikulu interesgarri bat.. artikulu luze batekin izan beharrean, loturarekin eta lerro batekin konpontzen da. Adibidez:

  • Amodioblog aurkitu dugu nikzerdakit.com/denadelakoan. Nahikoa da esatea: blog pertsonala euskaraz. Egilea gaztetxoa dirudi...
  • Notizia flashazo bat: 300 lagunekin esplotatu dute hegazkin bat txetxenoak (lotura CNN-ra edo Berriara, eta punto).
  • Web polit bat aurkitu dugu. Zertarako komentario gehiago? Ikusi maitesdesign.com, ze polita, dena arrosa, so romantic...
  • Anjel Lertxundi gaur. Interneten sorreraz idatzi du! Klikatu, eta irakurri.

Erreferentzia hauek, askotan, nabigatzen gaudela aurkitzen ditugu. Aurkitu dugunaren helbidea hartu, sustatura eroan, lerroak idatzi, moderatzera, handik onartu... Rollo bat da hori. Laburki, bi urratsetan, lotura edo mikro-albiste horiek gehitzeko modua badago, ordea, nabigatzen gauden bitartean, HARA, HAU JAMAIKA IKUSTEKO ATALERAKO MODUKOA DA, ba ti-ta egiten da, eta txispun, Sustatu-n azaltzen da.

Eta aukera hau denentzat irekita legoke, moderazio barik (spam eta gaiztakietarako aukera badago, baina murritza: gaiztoak errejistratu beharra dauka del.icio.us-en eta ia ia agerian geratzen da...).

Hor dago Jamaika ikusteko jaio gara atala

Eta hor dago azalduta nola gehitzen den edukia

Konplikatua da hasieran, baina behin del.icio.us ezagututa, oso erraza da. .

eta bai zuek eta bai besteok (CodeSyntax-en badaude batzuk dagoeneko del.icio.us-en kontua dugunak), ba gehi ditzagun, aproba gisa, hurrengo egunetan, Jamaikarako erreferentzia batzuk, sustaturako aginduak emanez del.icio.us-en.

del.icio.us

Del.icio.us zerbitzuan oinarritzen da atal honen magia.

del.icio.us erabili daiteke ez bakarrik Sustatun edukia era honetan gehitzeko... zuk ere, irakurle hipotetiko horrek erabil dezakezu ZURETZAT, zure lanerako, etab etab.

Ikusi beste erabiltzaile hau, Kelsey. Interes asko ditu, gutako edozeinek bezala, Musika, edo hizkuntza, eta baita, Minbizia,

Era berean, jende askok biltzen ditu cancer terminoarekin erlazionatutako erreferentziak: http://del.icio.us/tag/cancer

Eta orri horietan guztietan ikusiko duzu, RSS ikono laranja, feed-ari dagokiona, harpidetzeko.

Kelsey horren erreferentziak jarraituko dituen bat Joxe Aranzabal izango dela uste dut. Jada sortu da atala del.icio.us-en. Hasi da gauzak sustaturako markatzen, Jamaika atalean azal daitezen, baina beste batzuk bere erabilera propiorako markatzen eta gordetzen ditu.

Beste euskaldun batzuk del.icio.us-en:

Irakeko erraibindikazio bruto samarrak Interneten

Luistxo Fernandez 2004/09/07 18:54

Ona asmatu du Mendigreenek Oier G., the artist formerly known as Txikillana, izendatzeko eibarnauten artean: Ogrosabel.

Oierren anaia bikiaren erretratua topatu dut gaur, hain zuzen be, Interneten, hementxe

Itxura baten, komandante txetxeno wahabita bat ageri zaigu hor, Windows XP birusengandik askatzeko aholkuak ematen, urratsez urrats eta pantaila-irudi didaktikoekin lagunduta.

Zelan aurkitu dudan?

Azken aldi honetan behin eta berriro entzuten dugu hedabideetan. Irakeko honako bahiketaren bideoa, edo Saudi Arabiako Al-Qaedako zelula baten erreibindikazioa Internet bidez zabaldu dutela.

Baina nola da posible? Al-Qaeda edo Al-Zarkawi edo dena delakoak ez daukate webgune ofizialik. Ezin dute izan. Non agertzen dira gauza horiek? Ala hedabideen topiko erdi-asmatua besterik ez da kontu hau?

Gaur, azkenean, berriz ere aurkitu dut aipamen hau, baina behingoagatik, URL bat aipatzen da! Fernando Iturribarria kazetariak Paristik Vocentorako egindako kronika batean zetorren. Dioenez, Iraken bahitutako kazetari frantsesak askatzeko plazaratutako baldintza berriak webgune honetara bidali dituzte: http://www.islamic-minbar.com/

Sartu naiz eta, hara!, intro orri bat (haiek ere!!!). Ondoren, bulletin board erako foro bat, arabiera hutsez, PHP-rekin egina (software librea). Erreibindikazioa non ote dagoen zehazki, ez dakit, ez baitakit arabieraz. Bideoak-eta (buru-mozketak eta horiek) toki honetan bertan argitaratzeko ohitura ote daukaten ere ez. Hori bai, ez da dena gatazka armatua. Klik bat haruntzago, Ogrosabel-bis, birusen arriskuez abisatzen...

Orakulua bere bakardadean?

Luistxo Fernandez 2004/09/07 18:50

Blog batean idaztea isolatzea iruditzen zaio Oier Gorosabel eibarnauta lagunari, konparatuz posta-zerrendarekin... Beste askori, Internet bera, e-posta bera, isolatzaile, alineatzaile eta ez-naturala iruditzen zaie: sozializazio naturalaren kontrakoa.

Maitek gehiago egiten du blogean zerrendan baino. Beste batzuek gehiago zerrendan blog-ean baino. Nik, zerrendetan eta beste toki batzuetan idazten ditudanak jartzen ditu blogean (ez dut propio ezer sortzen blogerako, bestela sortzen ditudanak pilatzen ditut han). Mendigreenek egunero blogerako artikulu bat idazteko penitentzia ezarri dio bere buruari.

Kontua da ez dudala uste, ez Maite, ez Orakulua, ez Mendigreen, ez Luistxo, blog bat edukitzeagatik speakers corner batean etxian bakarrik egon gaudenik. Komunikatzeko beste kanal bat aukeratu dugu.

Eibartarrak zerrenda ere ez da, ez pentsa, kale zabaleko zarata... Hemengo harpidedunen %90ak ez du sekula ezer esaten.

Eibarnautak ez gaude bakarrik. Orakulua ez dago bakarrik. Bere blogak ze joera editorial-filosofiko-komunikatibo hartu behar ote duen... hori Orakuluaren jardunak berak esango du. Orakuluak tresna asko ditu eskura: jendearen esku daude, tresna horiek, Interneten, baina jende gehienak ez ditu manejatzen. Eibartarrak zerrendaren eta Eibar.org elkartearen bide xumean, eibarnauta batzuek suertea izan dugu tresnok geure buruaren zerbitzuan, erabilera praktikoan, lanean jartzeko, komunikazio modu berrietan barneratzeko 21. mende honetan. Nora iritsiko garen, ez dakit, baina oraingoz, aurrera goaz.

Aurkezpena

Luistxo Fernandez

Lan egiten dut CodeSyntaxen, Sustatun ere dexente editatzen dut. Eibarren jaioa naiz (1966) eta Donostian bizi naiz. Twitterren @Luistxo naiz. Azpìtituluak.com proiektuan ere banabil, eta niren kontsumo kulturala zertifikatzeko. Gainera, blog honek erdarazko bi bertsio ditu:

The English Cemetery

El cementerio de los ingleses

Nire kontsumo kulturala: 2012/13 | Zinea | Telebista | Artea | Liburuak | Antzerkia | Musika

Hemengo edukien lizentzia: Creative Commons by-sa.

E-postaz harpidetu: hemendik.