Gure inoizkarian berrikuntza batzuk egin behar ditugula eta, Volgako Batelarion erredakzio batzordearen azkeneko bileran erabaki dugu Enplegu Eskaintza Publiko bat luzatzea Juan Luis Zabalari, “Juan Luisen Zerrendak”, “Pipiren Txokoa”, “Txoko-Pipi” edo elkarren arteko bileran alde bien adostasunaz erabakiko dugun izenburupeko saila zuzen dezan.

Juan Luis Zabalak, azkeneko urteotan, abilezia berezia erakutsi du zerrenden langintzan, ez soilik Olerti Etxeak argitaratzen dizkion Euskal Liburuak sailari dagokionean (benetan eskertzeko lana dena, bertan jasotzen baitu, atalka, urte bakoitzeko euskarazko literatur liburuen produkzio osoa), baizik eta are interesgarriagoak diren zerrenda zoroastriko (edo dualisten) eraikuntzan iritsi duen maisutasunarengatik: hortxe daude, urrutira joan gabe, idazle abertzaleen eta ez abertzaleen zerrenda klasikoa, eta berriki aditzera eman duen AHTaren aldekoen eta (eliminazioz) aurkakoen zerrenda ezin argigarriagoa. Gure erredakzio batzordeko member batzuek saialdiak egin ditugun arren, gutako inor ez da heldu, eta hurbiletik ere, Zabalak aurkezten dituen iragarpenerako dohainak garatzera, ezta haren zorroztasun psikologikoaren mailara ere, eta hori dela eta, etsita, mundu guztiko enpresen estrategiara makurtzera deliberatu gara: abildade bat norberaren kabuz ezin denean lortu, merkatuan eskuratzen da eta kito.

Honatx gure proposamena, beraz: hilerik behin edo, bereziki sortzaile sentitzen bada, hamabostean behin, Juan Luis Zabalak bere zerrenda horietako bat idaztea, guk Volgako Batelariak inoizkariaren blogean atsegin handiz zintzilikatuko duguna. Abiapunturako ideia batzuk, zerrenda posibleetarako: “Pasaiako Ekoportuaren aldekoak / kontrakoak” (azpiegitura handien azpisail dudarik gabe emankorrerako), “Bic naranja / Bic crystal” (idazlearen konpromisoaren inguruko hautua baino funtsezkoagoa, azken berrogei urteotako literaturaren historian), “Héroes del Silencioren zaleak / detraktoreak” (inork ez baitu onartzen, oro har eta droga psikotropikoen eraginpean ez bada, Héroes gustura entzun duenik inoiz), “(Praka) Piratak jantziko lituzketen / sekula jantziko ez lituzketen intelektualak” (negu gorrirako erronka bat; orain, udan, ez luke meriturik)… Elkarren artean egingo dugun lehenengo brainstormingean finkatuko genituzke irizpideak, eta saila abiatzeko zerrenden zerrenda behin behinekoa.

Gure eskaintza kontuan hartuko duzulakoan, adeitasunez

Volgako Batelariak.