Teknosexua
audio
Ipod-arentzat sounddock bat erostekotan?
ETBko lagun Iñaki Olanori esker, pare bat astetan gadget batzuk izan ditugu, Teknoflash mikrosaiorako. Gero txostena egin dugunez, hemen nik frogatutako tresnak:
BOSE Sounddock-a
Lehenengo itxuran zirrara sortzen du trastoak, daukan itxura eta pixuagatik. Martxan jarri eta egia esan soinu espektakularra du, modernoa. Soinua oso garbi eta indartsua da, goi eta beheko frekuentzietan indartuta. Tono altuetan ere batere distortsio gabe funtzionatzen du.
Erabilpen aldetik, iPod-arekin dabilenarentzat egokia, baina apur bat motz gelditzen da beste tresna batzuekin lotu nahi badugu, hala nola kanpoko soinu iturri bat, CD-ak eta abar. Bluetooth bidezko konexioa ideia ona da baina ez du gehiegi zabaltzen tresnaren erabilpen esparrua.
Interneten ikusi dugun prezioa ondo badago (500 Euro inguru), luxuzko tresna bat dela esan dezakegu, iPod-arekin bakarrik erabiltzeko nahiko motz gelditzen bait da.
Yamaha Sounddock-a
Itxura guztiz klasikoa ematen du tresna honek, baina barrutik gaur egungo teknologia arrunta duela dirudi. Soinu aldetik tono klasikoagoa du, eta egokia izan daiteke musika "klasikoak" entzuteko (50. hamarkadatik honakoak). Soinu ona du, baina ez oso zorrotza eta arbia. Oso natural entzuten dira Eagles edo Led Zeppelin bezalako klasikoak.
Tresna honen abantaila handiena, barruan dauzkala iPod-a, CD-ak eta USB-ak irakurtzeko adaptadoreak. Horrez gain irratia dakar eta kanpotik lotzen zaion sarrera auxiliarra onartzen ditu. Errematatzeko, iratzargailu aukera. Logelan edukitzeko tresna edeeeerra!
Gainera, ikusi dugu 300 Eurotik beherako prezioa duela. Oso aukera ona.
Denon kaskoak
Txikiak eta erosoak dira. Agian belarrietan egiten duten presioagatik denbora luzez eramanez astun suertatu daitezke.
Soinu aldetik izugarri garbiak eta nekerik ez dute eragiten. Zarata kantzelatzeko aukera ere frogatu dugu eta oso efektiboa da bulego batean egoten den anbienteko zaratarekin. Lastima hain garestiak izatea, baina ulertzen dut eliteko kaskoak direla.
Eguneraketa: EITB-ren webgunean jarri dute BOSE katxarroaren bideoa:
Zarata isiltzeko kaskoak
Atzo Mr. Big taldearen kontzertuan egon nintzen. Taldeko gitarra jole Paul Gilbertek beti kaskoekin jotzen du, zarata kentzen diote kasko horiek. Nolabait esateko, isiltasuna "sortzen" dute.
Noise Cancelling headphones
Horrela esaten zaie: kanpoko zarata ezeztatzen duten aurikular edo kaskoak. Bose markak asmatu zituen duela zenbait urte eta orain denda askotan aurkituko dituzu.
Paul Gilbert gitarra joleak entzumen arazoak ditu eta babesteko erabiltzen ditu kasko horiek. Bide batez, kasko horiek monitore moduan erabiltzen ditu, eta hobeto kantatu eta gitarra jotzen laguntzen diote,
Oinarria
Oinarri sinplea da, baina teknikoki egiteko zaila: imajina dezagun entzuten ari garen soinu uhin bat. Orain, sor dezagun beste soinu uhin bat, berdin berdina, baina kontrakoa. Hau da, bat gora doanean bestea behera joango da, ispilu batean bezala. Sinplifikatuz, bigarren uhin hori ongi sortzea lortzen badugu, ez dugu ezer entzungo, bi uhinen gehiketa beti 0 izango bait da.
Gaia hau baino konplexuagoa da bozgorailuekin gela batean gaudenean, zer ikusia izango dutelako soinu iturriarenganako distantziek eta hormek sortutako erreboteek. Aldiz, kasko edo aurikularren kasuan, ingurune askoz kontrolatuagoa da eta merkatuan lan hori egiten duten produktu asko daude jadanik. Zenbait autotan ere ezarri da sistema, eta motorraren zarata gutxitzeko balio du.
