Dokumentu Akzioak
Eibartik
Birziklapenaren timoa
Erakundeak beti dabiltza kontu bera errepikatzen; herritarroi errepikatzen, jakina: birziklatu egin behar da, birziklatu, bai, gure ontzi, kristal eta paperak beste zakarrontzi batzuetara bota, natura zaindu.
Konforme. Demagun. Herritar kontzientziatua naiz, biologia ere ikasi nuen, eta ekologista amorratua naiz. Baina, ai ene! Eibarren bizi naiz. Zer egin? Bi aukera: entzungor egin eta ez birziklatu, edo bestela, lanean jai eskatu, eta egun erdi pasatu kontonedore (huts) baten bila.
Eibarko zaborren erantzule, Debabarreneko mankomunitatea ei da, eta galdera batzuk egin nahi dizkiot:
- Zelan leike, Sautsi moduko auzo berri baten, esate baterako, oraindik ere birziklatzeko kontenedorerik ez izatea?
- Zelan leike, iaz bertan Urkizuko parkean lurperatu dituzten kontenedoreen artean, 8 kontenedore normal jartzea, eta birziklatzeko bakarra?
- Zelan leike, Ardantzan lurperatu dituzten kontenedoreen artean, plastikoa birziklatzeko kontenedorerik ez egotea?
- Zergatik daude gero eta kontenedore gutxiago Eibarren? (erdikaldean, behintzat).
- Zergatik aurkitzen ditugu askotan kontenedoreak bete-beteta? Zergatik hartu behar dugu guk lana, eta eurak jai?
- Zergatik da odisea bat Eibarren birziklatzea?
Benetan uste dut birziklapenarena timo bat dela. Erakundeek, euren eskuak zuritzeko, hitzez barra-barra darabilten terminoa, baina benetan ezer gutxi egiten dutela horren alde. Herritarroi, behintzat, ez digute erraztasun handirik ematen.
Herritarrok ura, argindarra, eta energia aurreztu behar ditugu, eta zaborrak bereizi. Eibarren argindar gehien xahutzen duen etxea udaletxea izango da, edozein ordu dela ere, argi guztiak isiotuta dituztelako beti; eta kalefazioa topera. Ur gehien alperrik galtzen duena, ostera, Gipuzkoako Ur Zerbitzua, euren ubideetan dituzten jarioetan joaten delako gure herriko ur guztiaren ehuneko handi bat. Administrazioan gastatzen duten paper guztiarekin Amazonas osoa "birziklatuko" genuke, eta susmoa daukat (susmoa besterik ez, baina beti izan dudana) pilen ontzietan sartzen ditugun pilen gehienak ez direla sekula santan birziklatzen.
Birziklapenarena, Eibarren behintzat, timo bat da.
Urkuzuko kontenedoreak: birziklatzeko gutxi, eta gehienetan beteta.
Re: Birziklapenaren timoa
Arrazoi guztia dakazu Asierrek. Birziklatzeko ohiturekin herritarrak oso mantso goazela jakinik, erakundeak aurretik, bidea markatzen eta herritarrak bultzatzen joan beharko liratekela uste nuen. Eibarren justu kontrakoa da. Herritarrak motel eta erakundeak motelago. Urkizuko kontenedoreena iraingarria da. Horretaz jardun nuen nere blogean orain pare bat hillabete.
Re: Birziklapenaren timoa
Gaur bertan Eibarko zabor bilketen datu batzuk ematen ditu El Correok. Zabor mota guztiak aipatzen ditu (organikoa, beira, papera, arropa, olioa,...) baina plastiko eta ontziena ez! Eta olioaren bilketarentzat komentarioa ere badu: "no acaba de arrancar con fuerza." Izan ere, olioaren bilketak beste post bat aparte mereziko luke. Nor enteratzen da ba noiz eta non jasoko duten olioa? Eta enteratuz gero nork du bertara ordutegi zehatz horretan (hilean behin, astezken goiz batez edo izaten dela uste dut) joateko aukera? "no acaba de arrancar con fuerza." Baloria behar da gero!
Re: Birziklapenaren timoa
Aupa, Asier
Oierren blogian erantzun nebana erantzungo dot hamen. Astuntxua izango naiz, baiña barriro be ezagutzera emotia ez da alperrik izango
Mankomunidadeko bihargiñ batek kontauta, ez neri, lagun bateri, eta harek neri kontau (pribauan nahi badozu bixen izena emongo detsudaz eta galdetu geinkixe).
Fijau zara lurrazpiko reziklaje kontedorietan ze kamioik jasotzen daben zaborra? Ez, ba hurrenguan ikusizu! Organikuen berbera! Beste ordu batzueta, baiña kamioiak igualak dira. Bihargiñ horrek esan eban lurrazpiko kontenedortetakua dana toki berera juaten dala, beira izan ezik. Hori bai, horrek dirua emoten zebala, baiña bestiak ez. Horregaittik ete da hain gitxi jarri izana? Gauza testimonial bat zeozer egitten dabela aitzera emoteko. Nik, halan da be; jarraitzen dot botatzen bananduta. Zelan laga zaittu informaziñuak?
Re: Birziklapenaren timoa
Leirek diño:
>>Zelan laga zaittu informaziñuak?
Ba, egixa esan, ez nau larregi harrittu. Ezin dot daturik emon, eta ezin dot esan zer eta zelan eitten dan, baina aspaldi dakat susmua, alperriko lana eitten gabizela herritarrok.
Re: Birziklapenaren timoa
Asko poztu nau gai hau ikusteak, aukera ematen baitit nire esperientzia fustrantea kontatzeko.
Eibarko eskola batean lan egiten dut, Agenda 21 programan sartuta gaude eta geletan birziklapenaren garrantzia lantzen ibiltzen gara.
Kurtso honetan 5.mailetako ikasleak zentruko gela guztietan paperontzi bereziak ipini eta paper guztia jasotzeko ardura hartu dute berengain.
Orain hasten dira arazoak, teoriatik praktikara pasatzerakoan, kanpoan papera jasotzeko kontenedore bakarra dugu, kontenedore hau bere garaian kristala jasotzekoa zen eta orain kolorez aldatuta dugu, beraz sarrera oso txikia du.
Kontenedore egoki baten bila mankomunitatearekin harremanetan ipini gara: deitu dugu, deitu digute, deitu dugu, deitu digute.... halako batean etortzen dira ikastetxera egoeraren berri izatera eta.....erantzunaren zain gaude, beldur naiz kurtsoa bukatu eta erantzuna jaso gabe jarraituko ez ote dugun.
Beldur naiz oharkabean itxurakeriaren atzaparrak ez ote gaituen denok harrapatzen.