Dokumentu Akzioak
Prospektiba
Sormena, biharko ekonomiaren motorra
Sormena, biharko ekonomiaren motorra da Estitxu Eizagirre eta Xabier Letonak Argia astekarian koordinatu duten aste honetako Larrun gehigarriaren izenburua.
Gai interesgarria eta pil-pilean dagoena. Esate baterako, gaur bertan Gipuzkoako Diputatu Nagusiak Politika orokorrari buruzko eztabaidan, Batzar Nagusian , Gipuzkoaren erronka nagusiena berrikuntza dela esan omen du . Baina aurkeztutako jatorrizko dokumentuan (adi .pdf-a) berrikuntza ataltxoa baino ez da. Beharbada gehiago osatuko zuen atala eta errekurtso nahikoak jarri dizkiote gaiari.
Baina tira, Larrunek ohizkoa duen eskemari jarraituz mahainguru batean elkartu dituzte Juan Felix Garcia Fagorreko I+G+B zuzendaria, Jose Ramon Guridi GFAko Berrikuntzarako zuzendaria, eta Anton Borja eta Sabino Ayestaran EHko Unibertsitateko irakasleak.
Gainera, gaiaren inguruan gaur Artelekun ezagutu dudan Josu Amezaga, Luis Otano, Joseba Koldo Bilbao eta blog honetan idazten duenak, mahainguruaren osagarri izan nahi duten artikulu bana idatzi dugu.
Inork interesa badu aste honetako Argiaren alearekin batera paperean aurki dezake, gomendagarria, baina sarean ere dagoenez, hona hemen artikulu guztien lotura zuzenak:
- Juan Felix Garcia, Jose Ramon Guridi, Anton Borja eta Sabino Ayestaran-en arteko mahaingurua
- Josu Amezaga (EHUko irakaslea): Informazioa eta jendarte aldaketa
- Luis Otano (EAEko Curriculum Diseinurako Institutuko zuzendari ohia): Irakaskuntza berrikuntza ekonomian
- Eneko Astigarraga (Prospektiba irakaslea Deustuko Unibertsitatean eta CodeSyntax-eko kidea): Berrikuntza eta sormena etorkizuneko gizartean
- Joseba Koldo Bilbao: e-Administrazioa: herritarren eta administrazioaren arteko zubi digitala
Technorati Tags: sormena, berrikuntza, Argia
Re: Sormena, biharko ekonomiaren motorra
Zorionak Eneko. Zure artikuluaren esentziarekin erabat bat nator. Gakoa, zuk zeuk eman duzu:
"Herritar kreatiboak, sortzaileak
Hau da, azken joerak argi utzi duten bezala, berrikuntza prozesua Clay Christensen, Michael Porter edo Drucker guruek sortu zituzten ereduetatik harago doa, Zentro Teknologiko, Unibertsitate laborategi edo erakunde eta enpresen ikerkuntza eta garapen sailetatik harago, erabiltzaile, bezero eta, seguruenez, herritarrenganaino luzatuz." (zuk zeuk esana)
Gizarte baten, herri baten, edozein talde eta edozein pertsonaren menpe dago berrikuntza (seguruenez herritarrenganaino diozu, nik seguru ere esango nuke...), eta hor, hezkuntza sistemak dauka zeresan garrantzizkoenetarikoa, familia eta lagunekin batera. Berrikuntza gauza kulturala dela, dudarik ez daukat. Prozesu bat baino, bizimoduan dagoen zerbait. Hau dela eta, hainbat guruek aitortutako prozesu eta modeluek, kultura berritzaile baten ezean izan dezaketen arrakastan ez daukat itxaropen haundirik.
Pertsonengan, pertsona bakoitzarengan sinisten dutenak zoriondu beharrean aurkitzen naiz. Bere inguruan dauden pertsonek ahalmen "berritzaile" hori garatzeko aukera izango dutelako. Zorionak bada, Eneko.
Re: Sormena, biharko ekonomiaren motorra
Eskerrik asko,
idaztea praktikara eramatea baino zatia errazagoa da. Baina beno, zerbait bada. Mila esker.
artea
sormena herritarrek duten tresna eraldatzailea da, eta krudelkeria hutsa da sormenaren izenean merkatu kapitalistaren berrikuntzarako etekinak ateratzeko elementu sortzailea erabiltzea.
sormena motorra izango litzateke baldin eta ekonomiaren boterearen egitura piramidala hautsi eta balore berri eta parekideetan eraikitako merkatua eraikiko balu.