Dokumentu Akzioak
Nire uste harroan
Loti Ederraren ondoan
Iritsi da zalduna basoaren bihotzera, eta, sasiz inguraturiko soilgunean, arrosa-petalozko ohatzean etzanda, hor ikusi du neskatorik ederrena, lotan.
Bere ezpainak neskarenetan jartzera doa, hura esnatzeko. Badaki hala egin behar duela, eta neska esnatu egingo dela orduan, eta berari begiratuko diola, eta...
Bere buruari begiratu dio orduan: bideko hautsa dakar bere jantzian, bidearen nekea bere aurpegian. Hautsa kentzen saiatu da, bere soinekoa nola-hala atontzen. Alabaina, zalantza erne da bere barruan.
Neska lokartuari begiratu dio ostera. Hain da ederra haren begitartea, hain leuna haren azala... Itxuraren pareko goxotasuna balu izaeran, ezin zoriontsuagoa litzateke haren ondoan; baina, bestelakoa balitz?
Eta bera? Badaki gizon saiatu eta prestua dena; hala ikusiko ote du lotiak ordea? Ala zaldun trauskil, bidetako ibiltari ajatu, printzesa sorginduen bilatzaile purtzila irudituko zaio?
Zer egin ez dakiela, petalo arrosen ohean egin du txokoa, eta loti ederraren ondoan etzan da. Haren esku hotzari bere esku beroaz helduta, begiak itxi ditu, eta amets egin du, esna, hantxe geratzen dela bera ere, betiko lo.
Re: Loti Ederraren ondoan
Betiko lotan? Agian ez.
Noizbait iritsiko da Printzesa Zaldun bat arrosa-petaloen inguruetara Zaldun Loti Ederra esnatzera...
Re: Loti Ederraren ondoan
Einstein zena joan omen zen ekitaldi xarmant horietako batetara. Ezagutu du emakume eder bat,eta hizketan ari direla esan dio honek: "Bikote ederra egingo genuke biok. Eta nolako umeak izango genituzkeen zure jakinduriarekin eta nire edertasunarekin". Hala erantzun omen zion Einsteinek: "Ez dakit ba! Eta nire edertasunarekin eta zure jakinduriarekin egingo bagenitu?" Lotan harrapatzea ez da komeni, denik dela ere.
Re: Loti Ederraren ondoan
zorionak, Xabier! Gizon bat zara dagoeneko!
Re: Loti Ederraren ondoan
Txikitan, loti ederraren ipuina ikusten nuenean, inbidia ematen zidan printzesak: ile luze hori ederrarekin agertzen zen, hain guapa, hain fina...
Baina printzearen itxura beti xelebrea iruditzen zitzaidan. Leotardo erridikulo harekin, melenatxo hura, bigote xixtrin hura...
Printzesa izan nahi genuen, baina beste modu bateko printzipeek esnatzeko!
Re: Loti Ederraren ondoan
Noizko ederrak ez diren printzesak, eta hautsez beteriko "zaldun" xumeak? Egunen baten aldatu beharko ditugu ipuinen bertsioak, ezta? Edo hilkorrok ezin al dugu izan gure ondoan lotan geratuko den "printzearen" esperantzarik?