Artxiboa Maiatza 2009
Ikaskidearen laguna
Badakit fitxatuta naukala. Ikaskide baten laguna da bera. Ekitaldiren batean ikusi izan dut, eta askotan gurutzatu naiz berarekin kalean. Badakit nor den, eta badakit berak ere ezagutzen nauela.
Elkar ikusten dugunean nabaritzen dut nola pentsatzen duen "kabronzete, fitxatuta zaude", eta irribarre txiki bat antzematen diot. Baina sekula ez dugu hitz egin. Gurutzatzen garen bakoitzean pentsatzen dut ea agurtu beharko nukeen, baina inozoa iruditzen zait ezertaz ezagutu gabe agurtzen hastea.
Azken hileotan, baina, gogo biziagoa sentitzen dut kalean geratu eta besotik gogor heltzeko. Animo txo, segi aurrera esateko. Lagunak eta familia badituen arren, babestuago sentitzeko. Eta ez berarekin bakarrik, gauza bera sentitzen dut bere lankide askorekin. Horietako asko dauzkat fitxatuta, eta askotan izaten dut gogoa eurei besarkada bat emateko. Badakidalako ETAkoek ere fitxatuta dauzkatela, eta mutil baten hitzek horren aurrean kemena emango dielako. Bada garaia beldurrak astindu eta, armen aurrean, hitzak askatzeko. Animo.
eta kitto!, 2009/V/22 (ale osoa, pdf)
Ez dut denborarik
Ez dut iratzargailua entzun. OTA ordaindu gabe daukat. Txandalean egin dut lo. Zapatilak jantzi eta korrika jeitsi naiz autorantz. Eskilara batzuk igo eta emakume bati, zer zioen konturatu gabe, "no tengo tiempo" esan diot eta korrika egin dut ospa. Ordu galduak daramatzat geroztik, gogoetan.
Goizeko 9,40etan ireki ditut begiak. 9,00etan hasten dira isunak jartzen, eta nik autoa etxetik 5 minutura laga nuen atzo. Iturribide kalearen amaierako eskilarak igo, eta eskubira. Txandalaz sartu nintzen atzo ohera, eta hori jantzita esnatu naiz gaur. Zapatilak jantzi eta antxitxiketan jeitsi ditut 6 pisuetako eskilarak.
Iturribide kalea eta Santutxu arteko eskilaretara iritsi naiz, azkar igo eta eskubitara bira egiten nuen bitartean, emakume batek zerbait esan dit. Mezua oraindik belarrietatik burmuinera iritsi gabe, edo burmuinean bueltaka prozesatu gabe, "no tengo tiempo" erantzun diot, eta korrika jarraitu dut.
"Contra el cáncer". Hori da esan esan didana. Dozenaka irudik kolpatu dute nire burua segundu erdian. Abiadura moteltzen joan naiz. Hainbeste pertsonataz oroitu naiz, denbora gutxian. Minbiziaz joan zaizkit aita, bi aitonak eta lagun onenetako bat, besteak beste. Eta berriro ere datorkit emakume nagusi hori burura. Adinean sartutako boluntarioa eta, agian, nik bezain egoera gogorrak bizi izan dituena.
Hamar metro aurrerago ikusi dut parkinzaina, nire autoari isuna jartzen. Garaiz iritsi naiz, eta barkatu egin dit, baina ez naiz ase geratu. Hobe nukeen isuna ordaindu eta emakume horri beste horrenbeste eman. Eta okerrena da, orain zigarrotxo bat erreko nukeela... denbora apur bat gehiago galtzeko, adibidez.
Tuenti berritxuratzen ari dira
Oraindik aplikatu ez duten arren, ABC egunkariari erakutsi diote nolakoa izango den Tuenti aurki. Itxura berria, baina aparteko nobedaderik ez: dagoeneko Facebookek badaukan aukera: kontaktuen lagun komunak ikustea.
Perfilaren portadan argazki gehiago ikusten dira. Orain duten ratioari eutsi nahi diote (ia 2 milioi argazki berri egunero). Bideoak ikusteko sistema bat ere gehitu diote.
Oraindik ez dute argitaratu, baina ABC egunkarikoei erakutsi diete Tuentik izango duen diseinu berria. Aurrekoaren oso antzekoa, baina erabilterrazagoa dirudi. Hain zuzen, erabilterraztasuna aipatzen dute erabiltzaile gazteenek, Facebook beharrean Tuentin aritzeko. Hala ere, azken hilabeteotan Tuenti erabiltzaile hauetako asko hasi dira Facebookera saltoa ematen. ABCn ez dakar hizkuntzari buruzko informaziorik. Oraindik Tuenti gaztelera hutsez dago. Euskara berandu iritsiko da hona ere, iristen bada.
