Harrikadak
julen_iturbe
Baserri batean jaio nintzen ni
Julen Iturbek bere aitonaren bizimoduaz idatzitakoari tiraka.
Paradojas respecto a la calidad de vida apuntean, Julen Iturbe artisauak kontatzen du bere aitona nola bizi zen duela 50 urte. Nire kasuan, hori ez zen aitonaren bizimodua, aitarena baizik.
1932an aita jaiotako etxean hazi nintzen ni (1968an). 1990eko hamarkadaren hasiera arte, gutxi gorabehera, bi behi genituen etxean. Aita egunero, astelehenetik igandera, goizeko 6:00ak baino lehen jaikitzen zen aziendak gobernatzera. Julenen aitonaren bizimodu berdintsua zuen, baina aitaren kasuan lantegia (Porcelanas Bidasoa) bost minutura zuen (oinez) eta arratsaldeko 16:00ak pasata zegoen etxean.
Aitaren baserria jada ez dago zutik. 1990. hamarkadako "industri zonalde" batek eraman zuen aurretik. Hala eta guztiz ere, eta nire bizitzaren lehen 24 urteak baserri batean pasa baditut ere, ni asfaltokumea naiz. Tabernak, kioskoak (bai, periodikoak), supermerkatua.... Kalekumea naiz.
Ez dut faltan botatzen baserria, baina nire aitak bai. Amak dio jaiotako etxea utzi behar izateak asko aztoratu zuela senarra. Eta ama hemen aipatzen dudala, berak apenas egin zuen lan etxetik kanpo, baina makina bat eginkizun zituen berak ere.
Agian Julenen hausnarketa beste bide batetik zihoan, baina niri garai hartakoak berpiztu dizkit.
Eskerrik asko, Iturbe jauna.
Yo nací en un caserío, este apunte en castellano
Tonua zaindu behar da
Adegin ere e-maila erabiltzen dute langileei esateko idazkari nagusia botako dutela. Politikarien debateak, berriz, 90. hamarkadakoak dira Espainiako Erreinuan. Eta Anasagasti haserre blogari onenaren saria lortu ez duelako.
Adegi Gipuzkoako Enpresarien Elkartean ere moduak aldatu direla dirudi. Jende gaztea dator atzetik elkartea hainbat urtez gobernatu duten Ruiz Urchegui eta konpainiaren kalterako. Noticias de Gipuzkoa periodikoan asteartean azaldutako albisteari erreparatuz gero, Eduardo Zubiaurre presidenteak kendu ditu kargutik Ruiz Urchegui eta Arturo García. Aldez aurretik ezer esan gabe, bitxia suertatu da lehendakariak nola jakinarazi dion erakundeari kargu gabetzea: langile guztiei bidalitako e-mail baten bidez. Eta orain komeriak, orain aztertu behar omen dute ea presidentea gai ote den halako erabakia hartzeko edo eskuduntza hori ez ote dagoen komite exekutiboaren esku.
Berdin-berdin jarraitzen duena Espainiako politika da. Bi indar nagusietako hautagaien arteko sasi-debateak laurogeita hamargarren urteetako kutsua zuen, hasi aurkezlearekin, segitu estetikarekin eta bukatu zurruntasunarekin. Ez zen 2.0 izan eta debatea ikusi genuenon kopurua ere joan den hamarkadakoa dirudi: 13 milioi pertsona.Eta bere horretan jarraitzen duena Anasagasti jauna da. Argia.com webgunean irakurri diogu Jon Torneri Las Ideas guneak Espainiako politikari baten blog onena aukeratzeko lehiaketa antolatu zuela. Hiru blogari iritsi ziren finalera: bi euskaldun (Patxi López eta Anasagasti) eta Extremadurako lehendakaria (ez Ibarra, Guillermo Fernández Vara baizik). Irabazlea azken hau izan da eta Anasagasti kabreatu dela dirudi. EAJkoa izango ez balitz, bera izango litzatekeela garailea zioen pasa den astean blogean. Eta Extremadurako presidenteak erantzun egin dio.
Garai batean jarraitzen nuen politikari jeltzalearen bloga, baina ohitura hori baztertu behar izan nuen ezin nuelako jasan bera denen gainetik ibili beharra. Umilagoa izan beharko luke Anasagastik. Kasu egin beharko lieke apunte honetan Julen Iturbek enpresei egiten die aholkuei.
