Dokumentu Akzioak
Lagun batek esan dit...
Sutara
Joan den astean, Eroskiko poltsa bat hartuta, etxeko liburu batzuk sartu eta erretzera eraman nituen, San Joan suetara. Ez zen lan erraza izan: ez asko kostatu zitzaidalako nire apaletako liburuei agur esatea, baizik eta liburu txar guztiak ez zitzaizkidalako poltsa txiki hartan kabitzen. Zakarretarako poltsa beltz handi horietako bi hartu behar izan nituen, beraz.
Hantxe agertu nintzen, bada, poltsekin. Segituan etorri zitzaidan andre bat, harrituta, kezkatuta, fedea galdu ote nuen galdezka. Ezetz erantzun nion, lehen bezala edo gehiago sinisten nuela. Orduan, nire jokaera are okerragoa zela esan zidan, pertsona kabalak ez dituelako liburuak botatzen. Ea inkisidoreen moduan jokatu gura nuen, ea ez zitzaidan bururatu liburuok liburutegira eramatea. Gazteek gutxi irakurtzen dutela lehendik ere, eta ez emateko eredu txarrik.
Ze gustura ikusi nituen erretzen, ze pozik egiten zuten gazteek salto suaren gainetik! Liburu haien artean, o sakrilegioa, euskal literaturako zenbait ale zeuden. Liburuak sakratutzat baditugu, zer esanik ez gure hizkuntza nano eta jainkotuan idatzitakoak badira. Liburuei modu desberdinean begiratu nien lehenengo eguna ikastolan izan zen, munduko jakituria guztia liburuetan dagoela esan zigutenean. Literaturari dagokionez behintzat, hori gezurra zen, baina sinistu egin nuen. Institutuan esan ziguten liburuak goitik behera irakurri behar zirela, eta sinistu egin nuen. Orain, galdetzen didatenean ea garrantzitsua den liburu-azokak antolatzea, erantzuten diet ez dakidala literatura bera garrantzitsua ote den. Ez: literatura ez da garrantzitsua. Literatura gozamena da, leiho ederra; baina garrantzitsuak, benetan garrantzitsuak, beste gauza batzuk dira, sarritan ahaztu egiten ditugunak. Hori esanez hasi nintzen atal honetan, 2003ko azaroan, eta horrelaxe amaitzen dut.
Plazer bat izan da. Ondo esandakoak zuentzat opari. Txarto esandakoak, badakizue: sutara.
Re: Sutara
Irakurzaletasuna sustatzeko edo, Frantzian, hain zaletuak beraiek, gazteei "irakurtzeko-txekea" ematea proposatu dutela irakurri dut. Hau da, politono, garagardo edo porroetan gastatu ezinezko txekea; bakarrik egunkari edo liburuak erosiaz xahutu daitekeen txekea.
Bestalde, ezagutzen dut tipo bat inoiz lagun arteko afarietara etxean soberan dituen liburu kaja batekin joan dena, liburu guztiak bertan banatzeko asmo xelebrearekin :-)
Re: Sutara
Faltan bota diat erretako liburuen zerrenda ematea artikulu honetan. Blogetan dabilen abesti gustokoen meme memo hori baino askoz interesgarriagoa litzateke.
Re: Sutara
Neuri be jakinmina piztu deustazu. Zer bota dozu, gizona?
Re: Sutara
Bekatua esan daiteke, bekataria ez ;-)
Re: Sutara
Neuri be galdera hori etorri jata. Baiña esatia, igual, fuertetxoegixa.
Oin gitxi entzuen neban radixuan zuk zeuk erabilittako argumentuetako bat: liburu bat irakortzia ez da gauza traszendentaka, hautu bat baiña ez da. Oso idea barrixa begittandu jatan. Eta ez jakon errezoirik falta.
Nik, baiña, ezin dittut liburuak bota. Neuk be andre horren moduan esango netsuke: "Nora zoiaz?" eta eskandalizau. Eta badakitt larregi argitaratzen dana, eta gauza asko zakarra baiño ez dirana. Halan da be, gurtu egitten dira liburu formatua dakelako. C'est la vie, mon ami!
Re: Sutara
Oso ondo! nik ere liburu asko kendu ditut, baina ez dut erretzen, papera birziklatzeko kontenedoretara botatzen ditut. Askotan zerrendak egin izan ditut, Koldo Mitexelena Kulturguneari eskeini eta erantzunik pez, ba eman edo briziklatu, noski, bestela ez nuke lekurik izango nire habitakuloan!
Re: Sutara
Nik apirila aldean garbiketa egin nuen gelako apaletan. Kartoizko hiru kutxa handi liburuz bete nituen. Asteak eman zituzten liburuok terrazan hezetasuna hartzen, eurekin zer egin ez nekielako.
Orduan jakin nuen Liburuaren Egunean nire herrian bigarren eskuko liburuen azoka txiki bat egingo zela. Hantxe eman nuen asteburua udaletxe zaharreko arkupetan, eta kutxa eta erdi gutxienez hustu nuen.
Beste kutxa erdia liburu eta aldizkarik betetako apal batzuk dituen herriko taberna batera eraman nuen, badaezpada, han igual baten bati tragu artean irakurtzea otuko zitzaiolakoan.
Bestela ez nuke arazorik izango erretzeko, hori bai, baina pozik nago beste aukera bat izan dudalako.
Beraz, badakizue, Julen eta besteok, datorren urtean apuntatu ahal zaretela garrantzi bako gozamen hura taberna eta plazatan banatzera.
Re: Sutara
Ba ez da ideia txarra, Xabi.
Hurrengo urtean, abisetan badeustazu, Artziniegako azoka horretan egongo naz, Liburuaren Egunean. Benetan, e!