Zer da hau?
Nire txokoa dut Interneten. Arrateko Amari esker hemen kontatuko ditut nire gauzak. Gaztelaniaz ere idazten dut, izan ere bloga gaztelaniaz hasi nuen Lycosen mlog izeneko zerbait erabiliz, hori 2003ko ekainean izan zen.
Hainbat gauza kontatu ohi dut txoko honetan:
Xakea: ikastolan 4. mailan nenbilela hasi nintzen Eibarko Klub
Deportibora xakean ikastera eta jokatzera joaten. Orain, 16 urte
geroago, Deporreko presidentea naiz, xakea da nire bigarren bizitza
eta lagun mordoa egin eta ezagutzeko aukera eman didana. Xakea da
zerbait zor diedan pertsonen zerrendan, pertsona ez den lehenengo gauza.
Informatika: oraindik gogoan dut ikastolan 6. edo 7. mailan negoela
nire izebak bere eskolatik ordenagailu zahar bat ekarri zuen eguna.
Mahai gainean horizontalki jartzen zen ordenagailua eta bere gainean
pantaila erraldoia. Harek ez zuen Windowsik, WordPerfect zeukan, menu
gabe noski, eta hondo urdindun pantailan letra zuriekin. Oraindik hemen
egongo da 5 hatz eta laurdeneko disko bigunen bat jokuren batekin. Nork
esan behar zidan urteekin nire lana bihurtuko zela...
Internet: urteekin ordenagailuak eta internet afizio izatetik lan izatera pasatu dira. Ikasketak bukatuta, CodeSyntaxen egiten dut lan, web aplikazioak, webguneak, eta hitz arraro asko erabiliz gauzak egiten.
Musika: sekula ez naiz oso musika zalea izan. Ez naiz nota pare bat
entzun eta abestia eta taldea asmatzen dituztenetakoa, ez naiz zinta
asko zituztenetakoa, baina beno, zerbait beti gustatu izan zait.
Azkenaldian oso ColdPlayeroa naizela esaten didate. Azken egunotan Ken Zazpiren azkena entzuten ari naiz, hauek ere Coldplayero bihurtu direla irakurri nion kazetari bati lehengoan.
Euskara: "euskaldun orok du barnean filologo bat" irakurri
nuen Eibartarrak zerrendan orain dela denbora asko. Nireak ere idaztea
nahi izaten du. Ahal bada Mitxelena XVI.aren aginduak jarraituz. Izan
bedi ergatiboa zuekin.
Politika: ez dakit erdibidean nagoen ala ez, baina gauza bat argi dut. Nazkatuta nago.
Besteak: beste gauza askotarako ere balio du honek, adibidez
Eibarko trafikoari buruz idatzi eta Eibarko Udaltzainburu Jose Miguel
Callek DVn esaten dituen astakeriak komentatzeko.
